ಬೆಂಗಳೂರು: ರಾಜ್ಯ ಸರ್ಕಾರಿ ನೌಕರರು ಮತ್ತು ಅವರ ಕುಟುಂಬದ ಅರ್ಹ ಸದಸ್ಯರಿಗೆ ನಗದು ರಹಿತ ವೈದ್ಯಕೀಯ ಚಿಕಿತ್ಸೆ ಒದಗಿಸುವ ‘ಕರ್ನಾಟಕ ಆರೋಗ್ಯ ಸಂಜೀವಿನಿ ಯೋಜನೆ’ (KASS) ಕುರಿತು ಸರ್ಕಾರವು ಮಹತ್ವದ ಸುತ್ತೋಲೆಯನ್ನು ಹೊರಡಿಸಿದೆ. ಈ ಯೋಜನೆಯಡಿ ನೊಂದಾಯಿತ ಆಸ್ಪತ್ರೆಗಳಲ್ಲಿ ಚಿಕಿತ್ಸೆ ಪಡೆಯಲು ನೌಕರರ ವಿವರಗಳನ್ನು ಎಚ್.ಆರ್.ಎಂ.ಎಸ್ (HRMS) ತಂತ್ರಾಂಶದಲ್ಲಿ ಕಡ್ಡಾಯವಾಗಿ ನಮೂದಿಸುವಂತೆ ಎಲ್ಲಾ ಡಿ.ಡಿ.ಒ (DDO)ಗಳಿಗೆ ನಿರ್ದೇಶನ ನೀಡಲಾಗಿದೆ.
ಪ್ರಮುಖಾಂಶಗಳು:
- ನೋಂದಣಿ ಸ್ಥಿತಿಗತಿ: ರಾಜ್ಯದ ಒಟ್ಟು 3,76,955 ನೌಕರರು ಈ ಯೋಜನೆಗೆ ‘ಆಪ್ಟ್-ಇನ್’ (Opt-in) ಆಗಿದ್ದು, 23,081 ನೌಕರರು ‘ಆಪ್ಟ್-ಔಟ್’ (Opt-out) ಆಗಿದ್ದಾರೆ. ‘ಆಪ್ಟ್-ಇನ್’ ಆದ ನೌಕರರ ಪೈಕಿ 1,79,339 ನೌಕರರು ಮತ್ತು ಅವರ ಕುಟುಂಬದ ಸದಸ್ಯರ ಮಾಹಿತಿ ಮಾತ್ರ ತಂತ್ರಾಂಶದಲ್ಲಿ ನೊಂದಾವಣಿಯಾಗಿದೆ.
- ಬಾಕಿ ಉಳಿದಿರುವ ಮಾಹಿತಿ: ಇನ್ನುಳಿದ 1,97,616 ನೌಕರರು ಮತ್ತು ಅವರ ಅವಲಂಬಿತ ಕುಟುಂಬ ಸದಸ್ಯರ ವಿವರಗಳನ್ನು HRMS ತಂತ್ರಾಂಶದಲ್ಲಿ ನಮೂದಿಸಬೇಕಾಗಿದೆ.
- ಅಗತ್ಯತೆ: ವಿವರಗಳನ್ನು ನಮೂದಿಸುವುದರಿಂದ ಪ್ರತಿ ಅರ್ಹ ಸದಸ್ಯರಿಗೆ ‘ಯೂನಿಕ್ ಡಿಪೆಂಡೆಂಟ್ ಐಡಿ’ (Unique Dependant ID) ಸೃಷ್ಟಿಯಾಗಲಿದ್ದು, ಇದು ಫಲಾನುಭವಿಗಳನ್ನು ಗುರುತಿಸಲು ಮತ್ತು ನಗದು ರಹಿತ ಚಿಕಿತ್ಸೆ ಪಡೆಯಲು ಅನುಕೂಲವಾಗುತ್ತದೆ.
- ಕಟ್ಟುನಿಟ್ಟಿನ ಆದೇಶ: ಈಗಾಗಲೇ ಮಾಹಿತಿ ನಮೂದಿಸಿರುವವರನ್ನು ಹೊರತುಪಡಿಸಿ, ಉಳಿದ ಎಲ್ಲಾ ನೌಕರರ ವಿವರಗಳನ್ನು 15.07.2026ರೊಳಗೆ ತಪ್ಪದೇ HRMS ತಂತ್ರಾಂಶದಲ್ಲಿ ದಾಖಲಿಸುವಂತೆ ಸಂಬಂಧಪಟ್ಟ ಎಲ್ಲಾ ಡಿ.ಡಿ.ಒ (DDO)ಗಳಿಗೆ ಸಿಬ್ಬಂದಿ ಮತ್ತು ಆಡಳಿತ ಸುಧಾರಣೆ ಇಲಾಖೆ ಸೂಚಿಸಿದೆ.
