ಶಿವಮೊಗ್ಗ: ಜಿಲ್ಲೆಯ ಪ್ರಸಿದ್ಧ ಧಾರ್ಮಿಕ ಕ್ಷೇತ್ರವಾದ ಸೊರಬ ತಾಲೂಕಿನ ಚಂದ್ರಗುತ್ತಿ ಶ್ರೀ ರೇಣುಕಾ ಪರಮೇಶ್ವರಿ (ರೇಣುಕಾಂಬಾ) ಅಮ್ಮನವರ ಸನ್ನಿಧಿಯಲ್ಲಿ 2026-27ನೇ ಸಾಲಿನ ಶರನ್ನವರಾತ್ರಿ ಹಾಗೂ ವಿಜಯದಶಮಿ ಮಹೋತ್ಸವವು ಇಂದಿನಿಂದ ಅಕ್ಟೋಬರ್ 22ರ ಗುರುವಾರದವರೆಗೆ ಅತ್ಯಂತ ವಿಜೃಂಭಣೆಯಿಂದ ಜರುಗಲಿದೆ.
ಈ ಹಿನ್ನೆಲೆಯಲ್ಲಿ ಧಾರ್ಮಿಕ ದತ್ತಿ ಇಲಾಖೆ ಹಾಗೂ ದೇವಾಲಯದ ಆಡಳಿತ ಮಂಡಳಿಯು ಮಹೋತ್ಸವದ ಸಿದ್ಧತೆಗಳನ್ನು ಕೈಗೊಂಡಿದ್ದು, ಭಕ್ತಾದಿಗಳ ಅನುಕೂಲಕ್ಕಾಗಿ ವಿಶೇಷ ನಿಯಮಾವಳಿಗಳು ಹಾಗೂ ಮಾರ್ಗಸೂಚಿಗಳನ್ನು ಬಿಡುಗಡೆ ಮಾಡಿದೆ.
ದಿನನಿತ್ಯದ ಧಾರ್ಮಿಕ ಪೂಜಾ ಕೈಂಕರ್ಯಗಳು
ಉತ್ಸವದ ಅವಧಿಯಲ್ಲಿ ಶ್ರೀ ರೇಣುಕಾ ಪರಮೇಶ್ವರಿ ಅಮ್ಮನವರ ಸನ್ನಿಧಿಯಲ್ಲಿ ಲೋಕಕಲ್ಯಾಣಾರ್ಥವಾಗಿ ಪ್ರತಿದಿನ ವಿಶೇಷ ಪೂಜಾ ವಿಧಿವಿಧಾನಗಳು ಸಂಪನ್ನಗೊಳ್ಳಲಿವೆ. ಈ ಸಂದರ್ಭದಲ್ಲಿ ನವಗ್ರಹ ಜಪ, ಮಹಾಮೃತ್ಯುಂಜಯ ಜಪ, ಪವಮಾನ ಸೂಕ್ತ, ಶ್ರೀ ರೇಣುಕಾ ಸಹಸ್ರನಾಮ, ಶ್ರೀ ದುರ್ಗಾ ಸಹಸ್ರನಾಮ, ಲಲಿತಾ ಸಹಸ್ರನಾಮ ಪಠಣ ಹಾಗೂ ದೇವಿ ಪಾರಾಯಣ ಧಾರ್ಮಿಕ ಕಾರ್ಯಕ್ರಮಗಳು ನಿರಂತರವಾಗಿ ನೆರವೇರಲಿವೆ.
ನವರಾತ್ರಿಯ ಪ್ರಮುಖ ದಿನಗಳ ಕಾರ್ಯಕ್ರಮಗಳ ವಿವರ
ಇಂದು ಕಲಶ ಸ್ಥಾಪನೆ ಹಾಗೂ ಘಟಸ್ಥಾಪನೆಯೊಂದಿಗೆ ನವರಾತ್ರಿಯ ಧಾರ್ಮಿಕ ಕಾರ್ಯಗಳಿಗೆ ಚಾಲನೆ ದೊರೆಯಲಿದೆ. ನಂತರ ಅಕ್ಟೋಬರ್ 15ರ ಗುರುವಾರ ಲಲಿತಾ ಪಂಚಮಿ, ಅಕ್ಟೋಬರ್ 16ರ ಶುಕ್ರವಾರ ಸರಸ್ವತಿ ಪೂಜೆ ಹಾಗೂ ಅಕ್ಟೋಬರ್ 18ರ ಭಾನುವಾರ ಜಲದುರ್ಗಾ ಪೂಜೆ ನೆರವೇರಲಿದೆ. ಅಕ್ಟೋಬರ್ 20ರ ಮಂಗಳವಾರ ಮಹಾನವಮಿ, ಆಯುಧ ಪೂಜೆ, ಚಂಡಿಕಾ ಹೋಮ ಮತ್ತು ಘಟ ವಿಸರ್ಜನೆ ನಡೆಯಲಿದ್ದು, ಅಕ್ಟೋಬರ್ 21ರ ಬುಧವಾರ ವಿಜಯದಶಮಿ ಬನ್ನಿ ಉತ್ಸವ ಅತ್ಯಂತ ವಿಜೃಂಭಣೆಯಿಂದ ಜರುಗಲಿದೆ. ಅಕ್ಟೋಬರ್ 22ರಂದು ಭಕ್ತಾದಿಗಳಿಂದ ತುಲಾಭಾರ ಮತ್ತು ಹರಕೆ ಸಮರ್ಪಣೆ ನಡೆಯಲಿದ್ದು, ಅಕ್ಟೋಬರ್ 26ರ ಸೋಮವಾರ ಭೂಮಿ ಹುಣ್ಣಿಮೆಯ ಪ್ರಯುಕ್ತ ಅಮ್ಮನವರ ವೈಭವದ ಪಲ್ಲಕ್ಕಿ ಉತ್ಸವ ಜರುಗಲಿದೆ.
ಕಾಣಿಕೆ ಮತ್ತು ರಶೀದಿ ಕುರಿತು ಆಡಳಿತ ಮಂಡಳಿಯ ಎಚ್ಚರಿಕೆ
ಭಕ್ತಾದಿಗಳು ಶ್ರೀ ರೇಣುಕಾ ಪರಮೇಶ್ವರಿ ಅಮ್ಮನವರಿಗೆ ಸಮರ್ಪಿಸುವ ಕಾಣಿಕೆ, ಮುಡುಪು, ಧವಸ-ಧಾನ್ಯ, ಬೆಳ್ಳಿ ಹಾಗೂ ಬಂಗಾರದ ಆಭರಣಗಳನ್ನು ಕೇವಲ ದೇವಾಲಯದ ಕಾರ್ಯನಿರ್ವಾಹಕ ಅಧಿಕಾರಿಗಳಿಗೆ ಅಥವಾ ಅಧಿಕೃತ ಸಿಬ್ಬಂದಿಗೆ ಮಾತ್ರ ನೀಡಿ ಅಧಿಕೃತ ರಶೀದಿಯನ್ನು ಪಡೆದುಕೊಳ್ಳಬೇಕು. ದೇವಾಲಯದ ಹೆಸರಿನಲ್ಲಿ ಯಾವುದೇ ಪ್ರತ್ಯೇಕ ಸಂಘ-ಸಂಸ್ಥೆಗಳು, ಪ್ರಸಾದ ನಿಲಯ, ಕಲ್ಯಾಣ ಮಂಟಪ ಅಥವಾ ಟ್ರಸ್ಟ್‌ಗಳು ಅಸ್ತಿತ್ವದಲ್ಲಿಲ್ಲದ ಕಾರಣ ಅನಧಿಕೃತ ವ್ಯಕ್ತಿಗಳಿಗೆ ಹಣ ನೀಡಬಾರದು ಎಂದು ಸೂಚಿಸಲಾಗಿದೆ. ಶಾಶ್ವತ ವಂಶಪಾರಂಪರ್ಯ ನಂದಾದೀಪ ಪೂಜಾ ಸೇವೆ ಮಾಡಿಸಲು ಇಚ್ಛಿಸುವವರು ರೂ. 3,001 ಶುಲ್ಕದೊಂದಿಗೆ ತಮ್ಮ ಪೂರ್ಣ ವಿಳಾಸ ನೀಡಿ ರಶೀದಿ ಪಡೆಯಲು ಅವಕಾಶ ಕಲ್ಪಿಸಲಾಗಿದೆ.
ಪ್ರಾಣಿಬಲಿ ಹಾಗೂ ಬೇವಿನ ಉಡುಗೆ ಸೇವೆಗೆ ಕಟ್ಟುನಿಟ್ಟಿನ ನಿಷೇಧ
ಮಾನ್ಯ ಉಚ್ಚ ನ್ಯಾಯಾಲಯದ ಆದೇಶದ ಅನ್ವಯ ದೇವರ ಹೆಸರಿನಲ್ಲಿ ನಡೆಯುವ ಯಾವುದೇ ರೀತಿಯ ಪ್ರಾಣಿಬಲಿಯನ್ನು ಕಡ್ಡಾಯವಾಗಿ ನಿಷೇಧಿಸಲಾಗಿದೆ. ಇದರೊಂದಿಗೆ ದೇವಾಲಯದಲ್ಲಿ ಬೇವಿನ ಉಡುಗೆ ಸೇವೆ ಸಲ್ಲಿಸುವುದು ಹಾಗೂ ದೇವಾಲಯದ ಮೆಟ್ಟಿಲುಗಳಿಗೆ ಅರಿಶಿಣ-ಕುಂಕುಮ ಹಚ್ಚುವುದನ್ನು ಸಂಪೂರ್ಣವಾಗಿ ನಿರ್ಬಂಧಿಸಲಾಗಿದೆ. ದೇವಾಲಯದ ಪಾವಿತ್ರ್ಯತೆ ಮತ್ತು ಸ್ವಚ್ಛತೆಯನ್ನು ಕಾಪಾಡುವ ನಿಟ್ಟಿನಲ್ಲಿ ಆವರಣದಲ್ಲಿ ಪ್ಲಾಸ್ಟಿಕ್ ಚೀಲಗಳ ಬಳಕೆಯನ್ನು ಕೂಡ ಸಂಪೂರ್ಣ ನಿಷೇಧಿಸಲಾಗಿದೆ.
ಅಂಚೆ ಮತ್ತು ಬ್ಯಾಂಕ್ ಮೂಲಕ ದೇಣಿಗೆ ಸೌಲಭ್ಯ
ರೂ. 200 ಅಥವಾ ಅದಕ್ಕಿಂತ ಹೆಚ್ಚಿನ ಮೊತ್ತವನ್ನು ಮನಿ ಆರ್ಡರ್ (ಎಂ.ಒ.) ಮೂಲಕ ಕಳುಹಿಸುವ ಭಕ್ತರಿಗೆ ದೇವಿಯ ಕುಂಕುಮ ಪ್ರಸಾದವನ್ನು ಅಂಚೆ ಮೂಲಕ ತಲುಪಿಸಲಾಗುವುದು. ಇದಲ್ಲದೆ ಭಕ್ತರು ಕೆನರಾ ಬ್ಯಾಂಕ್ ಖಾತೆ ಸಂಖ್ಯೆ 1515101000001 (IFSC: CNRB0001515) ಮೂಲಕ ನೆಫ್ಟ್ (NEFT), ಡಿ.ಡಿ ಅಥವಾ ಚೆಕ್ ಮುಖಾಂತರವೂ ನೇರವಾಗಿ ಕಾಣಿಕೆ ಸಲ್ಲಿಸಬಹುದಾಗಿದೆ. ಈ ಮಹೋತ್ಸವದಲ್ಲಿ ಅಪಾರ ಸಂಖ್ಯೆಯ ಭಕ್ತಾದಿಗಳು ಪಾಲ್ಗೊಂಡು ಶ್ರೀ ದೇವಿಯ ಕೃಪೆಗೆ ಪಾತ್ರರಾಗಬೇಕಾಗಿ ಚಂದ್ರಗುತ್ತಿ ದೇವಾಲಯದ ಆಡಳಿತ ಮಂಡಳಿಯ ಇಒ ಪ್ರಮೀಳಾ ಕುಮಾರಿ ಪ್ರಕಟಣೆಯಲ್ಲಿ ಕೋರಿದ್ದಾರೆ.
ವರದಿ: ವಸಂತ ಬಿ ಈಶ್ವರಗೆರೆ, ಸಂಪಾದಕರು..
