ಬೆಂಗಳೂರು, : ಕಾರ್ಪೊರೇಟ್ ಕಂಪನಿಗಳಲ್ಲಿ ಕೆಲಸದ ಅವಧಿ ಮತ್ತು ನಿಯಮಗಳ ಹೆಸರಿನಲ್ಲಿ ಉದ್ಯೋಗಿಗಳನ್ನು ಅತಿಯಾಗಿ ನಿಯಂತ್ರಿಸುವ (Micromanagement) ಸಂಸ್ಕೃತಿ ದಿನದಿಂದ ದಿನಕ್ಕೆ ಹೇಗೆ ಮಿತಿ ಮೀರುತ್ತಿದೆ ಎಂಬುದಕ್ಕೆ ಪೂರಕವೆಂಬಂತೆ ಕಂಪನಿಯೊಂದರ ವಿಲಕ್ಷಣ ನೋಟಿಸ್ ಈಗ ಇಂಟರ್ನೆಟ್ನಲ್ಲಿ ಭಾರಿ ಕಿಡಿ ಹೊತ್ತಿಸಿದೆ. “ಲಂಚ್ ಬ್ರೇಕ್ನಲ್ಲಿ ಕೇವಲ ಒಂದು ನಿಮಿಷ ತಡವಾಗಿ ಬಂದಿದ್ದಕ್ಕೆ ಒಂದು ಗಂಟೆ ಕಾಲ ಉಚಿತವಾಗಿ ಕೆಲಸ ಮಾಡಬೇಕು” ಎಂಬ ಕಂಪನಿಯ ಮ್ಯಾನೇಜ್ಮೆಂಟ್ ಆಜ್ಞೆಗೆ ವಿಶ್ವದಾದ್ಯಂತ ನೆಟ್ಟಿಗರು ಕೆಂಡಾಮಂಡಲವಾಗಿದ್ದಾರೆ
ವೈರಲ್ ನೋಟಿಸ್ನಲ್ಲಿ ಏನಿದೆ?
ರೆಡ್ಡಿಟ್ ಹಾಗೂ ಎಕ್ಸ್ (ಟ್ವಿಟರ್) ಸಾಮಾಜಿಕ ಜಾಲತಾಣಗಳಲ್ಲಿ ಉದ್ಯೋಗಿಯೊಬ್ಬರು ಹಂಚಿಕೊಂಡಿರುವ ಕಚೇರಿಯ ನೋಟಿಸ್ ಬೋರ್ಡ್ನ ಫೋಟೋ ಈಗ ವಿಶ್ವಾದ್ಯಂತ ವೈರಲ್ ಆಗಿದೆ. ಉದ್ಯೋಗಿಗಳಿಗೆ ನೀಡಲಾದ 30 ನಿಮಿಷಗಳ ಊಟದ ವಿರಾಮದ ಅವಧಿಯನ್ನು ಮೀರಿದರೆ ಕಠಿಣ ಶಿಕ್ಷೆ ಗ್ಯಾರಂಟಿ ಎಂದು ಎಚ್ಚರಿಸಿರುವ ಆ ನೋಟಿಸ್ನಲ್ಲಿ ಹೀಗೆ ಬರೆಯಲಾಗಿದೆ:
“ಎಲ್ಲಾ ಉದ್ಯೋಗಿಗಳ ಗಮನಕ್ಕೆ: ನಿಮಗೆ ನಿಗದಿಪಡಿಸಿದ 30 ನಿಮಿಷಗಳ ಊಟದ ಅವಧಿಗಿಂತ ಹೆಚ್ಚುವರಿಯಾಗಿ ತೆಗೆದುಕೊಳ್ಳುವ ಪ್ರತಿ ಒಂದು ನಿಮಿಷಕ್ಕೆ, ನೀವು ಸಂಜೆ 6 ಗಂಟೆಯ ನಂತರ ಕಂಪನಿಗೆ 60 ನಿಮಿಷಗಳ ಕಾಲ (1 ಗಂಟೆ) ಉಚಿತವಾಗಿ ಕೆಲಸ ಮಾಡಿಕೊಡಬೇಕಾಗುತ್ತದೆ. ಉದಾಹರಣೆಗೆ, ನೀವು 31 ನಿಮಿಷಗಳ ಕಾಲ ಊಟದ ವಿರಾಮ ತಗೆದುಕೊಂಡರೆ, ಸಂಜೆ 6 ಗಂಟೆಗೆ ಮನೆಗೆ ಹೋಗುವ ಬದಲು 7 ಗಂಟೆಯವರೆಗೆ ಕಚೇರಿಯಲ್ಲೇ ಇರಬೇಕಾಗುತ್ತದೆ. ಇದರ ಹೆಚ್ಚುವರಿ ಕೆಲಸಕ್ಕೆ ಯಾವುದೇ ಸಂಬಳ (Unpaid Work) ಸಿಗುವುದಿಲ್ಲ ಬೇಗ ಊಟ ಮಾಡಿ “
ಅಂದರೆ, ನೋಟಿಸ್ನ ಕೊನೆಯಲ್ಲಿ “ಬೇಗ ಊಟ ಮಾಡಿ” ಎಂದು ಅತ್ಯಂತ ಉದ್ಧಟತನದಿಂದ ಆದೇಶಿಸಿರುವುದು ಉದ್ಯೋಗಿಗಳನ್ನು ಮನುಷ್ಯರಂತೆ ನೋಡದೆ ರೋಬೋಟ್ಗಳಂತೆ ನಡೆಸಿಕೊಳ್ಳುತ್ತಿರುವುದಕ್ಕೆ ಸಾಕ್ಷಿಯಾಗಿದೆ.
ಎಕ್ಸ್ (X) ನಲ್ಲಿ ವೈರಲ್; ಅತ್ಯುತ್ತಮ ಉದ್ಯೋಗಿಗಳು ರಾಜೀನಾಮೆ ನೀಡುವುದು ಖಚಿತ
ನಳಿನಿ ಉನಾಗರ್ ಎಂಬ ಎಕ್ಸ್ ಬಳಕೆದಾರರು ಈ ನೋಟಿಸ್ನ ಚಿತ್ರವನ್ನು ಹಂಚಿಕೊಂಡಿದ್ದು, “ನಿಮ್ಮ ಆಡಳಿತ ಮಂಡಳಿ ಇಂತಹ ನಿಯಮಗಳನ್ನು ರೂಪಿಸಿದರೆ, ನಿಮ್ಮ ಅತ್ಯುತ್ತಮ ಉದ್ಯೋಗಿಗಳು (Best Employees) ರಾಜೀನಾಮೆ ಪತ್ರ ಬರೆದಾಗ ಆಶ್ಚರ್ಯಪಡಬೇಡಿ” ಎಂದು ಕಂಪನಿಯ ಮ್ಯಾನೇಜ್ಮೆಂಟ್ಗೆ ಖಡಕ್ ಎಚ್ಚರಿಕೆ ನೀಡಿದ್ದಾರೆ. ಈ ಪೋಸ್ಟ್ ಸಾಮಾಜಿಕ ಮಾಧ್ಯಮಗಳಲ್ಲಿ ಭಾರಿ ಬಿರುಗಾಳಿ ಎಬ್ಬಿಸಿದೆ.
ಭಾರಿ ಆಕ್ರೋಶ: “ಇದು ಉದ್ಯಮ ಸಂಸ್ಥೆಯಲ್ಲ, ಕಾರ್ಪೊರೇಟ್ ಜೈಲು
ಈ ಪೋಸ್ಟ್ ವೈರಲ್ ಆಗುತ್ತಿದ್ದಂತೆಯೇ ಸಾರ್ವಜನಿಕರಿಂದ ಹಾಗೂ ಲಕ್ಷಾಂತರ ಉದ್ಯೋಗಿಗಳಿಂದ ತೀವ್ರ ಆಕ್ರೋಶದ ಕಮೆಂಟ್ಗಳು ಹರಿದುಬರುತ್ತಿವೆ:
ಇದು ಕಾರ್ಪೊರೇಟ್ ಜೈಲು: “ಕಂಪನಿಗಳು ಉದ್ಯೋಗಿಗಳ ದಕ್ಷತೆಯನ್ನು ಅಳೆಯುವ ಬದಲು, ಕಚೇರಿಯಲ್ಲಿ ಕುಳಿತುಕೊಳ್ಳುವ ಪ್ರತಿಯೊಂದು ನಿಮಿಷವನ್ನು ಲೆಕ್ಕ ಹಾಕುತ್ತಿರುವುದು ದೊಡ್ಡ ದುರಂತ. ಇದು ಕಚೇರಿಯಲ್ಲ, ಬದಲಿಗೆ ಕಾರ್ಪೊರೇಟ್ ಜೈಲು” ಎಂದು ಒಬ್ಬರು ಲೇವಡಿ ಮಾಡಿದ್ದಾರೆ.
ಹಸ್ಲ್ ಕಲ್ಚರ್ ಹೆಸರಲ್ಲಿ ಶೋಷಣೆ: “ಭಾರತದಲ್ಲಿ ಕಾರ್ಮಿಕರ ಶೋಷಣೆಯನ್ನು ಹಸ್ಲ್ ಕಲ್ಚರ್ (ಅತಿಯಾದ ದುಡಿಮೆ ಸಂಸ್ಕೃತಿ) ಎಂದು ವೈಭವೀಕರಿಸಲಾಗುತ್ತಿದೆ. ಹೆಚ್ಚುವರಿ ಕೆಲಸಕ್ಕೆ ಒನ್ ಪೈಸೆ ಸಂಬಳ ನೀಡದ ಕಂಪನಿಗಳು, ಕೇವಲ ಒಂದು ನಿಮಿಷ ತಡವಾದರೆ ಇಷ್ಟೊಂದು ದೊಡ್ಡ ಶಿಕ್ಷೆ ನೀಡುತ್ತಿರುವುದು ವ್ಯವಸ್ಥೆಯ ಹಿಂದುಳಿದ ಮಾನಸಿಕತೆಯನ್ನು ತೋರಿಸುತ್ತದೆ” ಎಂದು ಮತ್ತೊಬ್ಬರು ಬೇಸರ ವ್ಯಕ್ತಪಡಿಸಿದ್ದಾರೆ.
ಕಾನೂನುಬಾಹಿರ ನಿಯಮ: “ದುಡಿಮೆಗೆ ತಕ್ಕ ಸಂಬಳ ನೀಡದಿರುವುದು ಮತ್ತು ಒತ್ತಾಯಪೂರ್ವಕವಾಗಿ ಉಚಿತ ಕೆಲಸ ಮಾಡಿಸಿಕೊಳ್ಳುವುದು ಕಾರ್ಮಿಕ ಕಾಯ್ದೆಯ (Labour Law) ಸ್ಪಷ್ಟ ಉಲ್ಲಂಘನೆಯಾಗಿದೆ” ಎಂದು ಹಲವರು ಆಕ್ರೋಶ ಹೊರಹಾಕಿದ್ದಾರೆ.
ಈ ನಿಯಮದ ಹಿಂದಿನ ಅಸಲಿ ಮರ್ಮವೇನು?
ಎಚ್ಆರ್ (HR) ಮತ್ತು ಕಾರ್ಪೊರೇಟ್ ತಜ್ಞರ ಪ್ರಕಾರ, ಕಂಪನಿಗಳು ಇಂತಹ ಕಠಿಣ ನಿಯಮಗಳನ್ನು ಜಾರಿಗೆ ತರುವುದು ಉದ್ಯೋಗಿಗಳಲ್ಲಿ ಶಿಸ್ತು ಮೂಡಿಸಲು ಅಲ್ಲವೇ ಅಲ್ಲ. ಬದಲಿಗೆ ಸಿಬ್ಬಂದಿಗಳನ್ನು ಮಾನಸಿಕವಾಗಿ ಹೆದರಿಸಿ ಉಚಿತವಾಗಿ ಕೆಲಸ ಮಾಡಿಸಿಕೊಳ್ಳುವ ‘ಟಾಕ್ಸಿಕ್’ ತಂತ್ರಗಾರಿಕೆಯಾಗಿದೆ. ಈ ರೀತಿಯ ಮೈಕ್ರೋಮ್ಯಾನೇಜ್ಮೆಂಟ್ ನಿಯಮಗಳು ಉದ್ಯೋಗಿಗಳಲ್ಲಿ ಉತ್ಪಾದಕತೆಯನ್ನು (Productivity) ಹೆಚ್ಚಿಸುವ ಬದಲು, ಕಂಪನಿಯ ಮೇಲಿನ ಗೌರವವನ್ನು ಸಂಪೂರ್ಣವಾಗಿ ಕುಂದಿಸಿ ಉದ್ಯೋಗಿಗಳು ಮಾನಸಿಕ ಖಿನ್ನತೆಗೆ ಒಳಗಾಗುವಂತೆ ಮಾಡುತ್ತವೆ.
