ಬೆಂಗಳೂರು: ಯಲಹಂಕ ತಾಲ್ಲೂಕಿನ ವೆಂಕಟಾಲ ಗ್ರಾಮದಲ್ಲಿ ಪರಿಶಿಷ್ಟ ಪಂಗಡದ (ಎಸ್‌ಟಿ) ಕುಟುಂಬಗಳಿಗೆ ಸೇರಿದ ಕೋಟ್ಯಂತರ ರೂಪಾಯಿ ಮೌಲ್ಯದ ಜಮೀನನ್ನು ನಕಲಿ ದಾಖಲೆ ಸೃಷ್ಟಿಸಿ ಅಕ್ರಮವಾಗಿ ವರ್ಗಾವಣೆ ಮಾಡಿಕೊಳ್ಳಲಾಗಿದೆ ಎಂಬ ಗಂಭೀರ ಆರೋಪ ಕೇಳಿಬಂದಿದೆ. ಈ ಬೃಹತ್ ಭೂ ಹಗರಣ ಹಾಗೂ ಅಕ್ರಮ ಹಣ ವರ್ಗಾವಣೆ ಜಾಲದ ಸಮಗ್ರ ತನಿಖೆ ನಡೆಸುವಂತೆ ಕೋರಿ ನವದೆಹಲಿಯ ಜಾರಿ ನಿರ್ದೇಶನಾಲಯಕ್ಕೆ (ಇಡಿ) ಅಧಿಕೃತ ದೂರು ಸಲ್ಲಿಸಲಾಗಿದೆ.
ಸ್ಥಳೀಯ ನಿವಾಸಿಗಳಾದ ನರಸಿಂಹ ಮೂರ್ತಿ, ಮುನಿರಾಜು ಹಾಗೂ ಸರಿತಾ ಎಂಬುವರು ಇಡಿಗೆ ದೂರು ನೀಡಿದ್ದು, ಎಂಬಸಿ ಗ್ರೂಪ್, ಮ್ಯಾಕ್ ಚಾರ್ಲ್ಸ್ ಹಬ್ ಪ್ರಾಜೆಕ್ಟ್ಸ್ ಪ್ರೈವೇಟ್ ಲಿಮಿಟೆಡ್ ಸೇರಿದಂತೆ ನಾರ್ಮನ್ ಡಿಸೋಜಾ, ಆರ್. ವೆಂಕಟೇಶ್ ಮತ್ತು ಎಚ್.ಬಿ. ಜಯರಾಜ್ ಎಂಬವರ ವಿರುದ್ಧ ತನಿಖೆ ನಡೆಸುವಂತೆ ಒತ್ತಾಯಿಸಿದ್ದಾರೆ.
9 ಎಕರೆಗೂ ಅಧಿಕ ಎಸ್‌ಟಿ ಜಮೀನು ಕಬಳಿಕೆ ಆರೋಪ
ವೆಂಕಟಾಲ ಗ್ರಾಮದ ಸರ್ವೆ ನಂ. 56ರಲ್ಲಿರುವ 7 ಎಕರೆ 22 ಗುಂಟೆ ಹಾಗೂ ಸರ್ವೆ ನಂ. 41ರಲ್ಲಿರುವ ಸುಮಾರು 2 ಎಕರೆ 4 ಗುಂಟೆ ಜಮೀನು ವಿವಾದದ ಕೇಂದ್ರಬಿಂದುವಾಗಿದೆ. ಈ ಜಮೀನುಗಳು ಮೂಲತಃ ‘ತಲ್ವಾರಿ’ ಪರಿಶಿಷ್ಟ ಪಂಗಡದ ಕುಟುಂಬಗಳಿಗೆ ಸರ್ಕಾರದಿಂದ ಮಂಜೂರಾಗಿದ್ದವು. ಆದರೆ ನಕಲಿ ಜಿಪಿಎ (ಜನರಲ್ ಪವರ್ ಆಫ್ ಅಟಾರ್ನಿ), ಉಯಿಲು ಮತ್ತು ಅಕ್ರಮ ಮಾರಾಟ ಪತ್ರಗಳನ್ನು ಸೃಷ್ಟಿಸಿ, ಸರಣಿ ವಹಿವಾಟುಗಳ ಮೂಲಕ ಮೂಲ ವಾರಸುದಾರರನ್ನು ಒಕ್ಕಲೆಬ್ಬಿಸಿ ಭೂಮಿಯ ಹಕ್ಕನ್ನು ಕಸಿದುಕೊಳ್ಳಲಾಗಿದೆ ಎಂದು ದೂರುದಾರರು ಆರೋಪಿಸಿದ್ದಾರೆ.
ಕಂದಾಯ ದಾಖಲೆಗಳ ತಿರುಚುವಿಕೆ
ಅಕ್ರಮ ವಹಿವಾಟುಗಳಿಗೆ ಪೂರಕವಾಗಿ ಕಂದಾಯ ಮತ್ತು ನೋಂದಣಿ ಇಲಾಖೆಯ ದಾಖಲೆಗಳನ್ನು ವ್ಯವಸ್ಥಿತವಾಗಿ ತಿದ್ದಲಾಗಿದೆ. ಭೂ ಉಪವಿಭಜನೆ (ಪೋಡಿ) ಹಾಗೂ ಭೂ ಪರಿವರ್ತನೆ ಪ್ರಕ್ರಿಯೆಗಳಲ್ಲಿ ಕಾನೂನು ಉಲ್ಲಂಘಿಸಲಾಗಿದೆ. ಈ ಹಿನ್ನೆಲೆಯಲ್ಲಿ ವಿವಾದಿತ ಜಿಪಿಎ ಮತ್ತು ಮಾರಾಟ ಪತ್ರಗಳ ನೈಜತೆಯನ್ನು ಪರಿಶೀಲಿಸಬೇಕು ಎಂದು ದೂರಿನಲ್ಲಿ ಪ್ರಸ್ತಾಪಿಸಲಾಗಿದೆ. ವಿಶೇಷವಾಗಿ ಸರ್ವೆ ನಂ. 41/1ರ 2 ಎಕರೆ 2 ಗುಂಟೆ ಜಮೀನು ಮ್ಯಾಕ್ ಚಾರ್ಲ್ಸ್ ಹಬ್ ಪ್ರಾಜೆಕ್ಟ್ಸ್ ಪಾಲಾಗಿದ್ದು, ಈ ಖರೀದಿಗೆ ಬಳಸಲಾದ ಹಣದ ಮೂಲ ಹಾಗೂ ಸಂಸ್ಥೆಗಳ ನಡುವಿನ ನಂಟಿನ ಕುರಿತು ಶಂಕೆ ವ್ಯಕ್ತಪಡಿಸಲಾಗಿದೆ.
ಅಕ್ರಮ ಹಣ ವರ್ಗಾವಣೆ (PMLA) ಅಡಿ ಕ್ರಮಕ್ಕೆ ಆಗ್ರಹ
ಭೂ ವ್ಯವಹಾರದಲ್ಲಿ ನಡೆದಿರುವ ಬೃಹತ್ ಮೊತ್ತದ ಆರ್ಥಿಕ ವಹಿವಾಟು, ಹಣದ ಹರಿವು (Money Trail) ಮತ್ತು ಇದರ ಅಂತಿಮ ಫಲಾನುಭವಿಗಳನ್ನು ಪತ್ತೆಹಚ್ಚಬೇಕಿದೆ. ಅಕ್ರಮವಾಗಿ ಗಳಿಸಿದ ಹಣವನ್ನು ಬೇರೆ ಬೇರೆ ಖಾತೆಗಳ ಮೂಲಕ ವರ್ಗಾಯಿಸಿ ಇತರ ಆಸ್ತಿಗಳಲ್ಲಿ ಹೂಡಿಕೆ ಮಾಡಲಾಗಿದೆಯೇ ಎಂಬುದನ್ನು ಇಡಿ ತನಿಖೆ ನಡೆಸಬೇಕು. ಈ ಜಾಲದಲ್ಲಿ ಭಾಗಿಯಾಗಿರುವ ಮಧ್ಯವರ್ತಿಗಳು, ದಸ್ತಾವೇಜು ಬರಹಗಾರರು ಮತ್ತು ವಕೀಲರ ಪಾತ್ರವನ್ನೂ ತನಿಖೆಗೆ ಒಳಪಡಿಸಿ, ಹಣ ಅಕ್ರಮ ವರ್ಗಾವಣೆ ತಡೆ ಕಾಯ್ದೆ (ಪಿಎಂಎಲ್‌ಎ) ಅಡಿಯಲ್ಲಿ ತಪ್ಪಿತಸ್ಥರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಬೇಕೆಂದು ದೂರುದಾರರು ಮನವಿ ಮಾಡಿದ್ದಾರೆ.
