ಬೆಂಗಳೂರು: ಪೆಸಿಫಿಕ್ ಮಹಾಸಾಗರದಲ್ಲಿ ಸಂಭವಿಸುತ್ತಿರುವ ಅಸಹಜ ಪ್ರಕ್ರಿಯೆಯಿಂದಾಗಿ ಈಕ್ವೆಡಾರ್ ಮತ್ತು ಪೆರು ಕರಾವಳಿಯಲ್ಲಿ ಹುಟ್ಟಿಕೊಂಡಿರುವ 'ಎಲ್-ನಿನೋ' ಎಫೆಕ್ಟ್ ಮುಂದಿನ ದಿನಗಳಲ್ಲಿ ಭಾರತಕ್ಕೆ ತೀವ್ರ ಸಂಕಷ್ಟ ತಂದೊಡ್ಡಲಿದೆ. ಅದರಲ್ಲೂ ದಕ್ಷಿಣ ಭಾರತದ ರಾಜ್ಯಗಳು ಇದರ ಹೊಡೆತವನ್ನು ಹೆಚ್ಚಾಗಿ ಎದುರಿಸಲಿವೆ ಎಂದು ಚಿಕಾಗೋ ವಿಶ್ವವಿದ್ಯಾಲಯದ ಎನರ್ಜಿ ಪಾಲಿಸಿ ಇನ್ಸ್ಟಿಟ್ಯೂಟ್ ಸಂಶೋಧನಾ ವಿಭಾಗದ 'ಕ್ಲೈಮೇಟ್ ಇಂಪ್ಯಾಕ್ಟ್ ಲ್ಯಾಬ್' ಅಧ್ಯಯನ ವರದಿ ಎಚ್ಚರಿಸಿದೆ. ಈ ತಾಪಮಾನ ವೈಪರೀತ್ಯದಿಂದಾಗಿ ಮುಂಬರುವ ಸೆಪ್ಟಂಬರ್ 2026 ರಿಂದ ಫೆಬ್ರವರಿ 2027ರ ಅವಧಿಯಲ್ಲಿ ಭಾರತ ಒಂದರಲ್ಲೇ ತಾಪಮಾನಕ್ಕೆ ಸಂಬಂಧಿಸಿದಂತೆ ಸುಮಾರು 15,800ಕ್ಕೂ ಹೆಚ್ಚು ಸಾವುಗಳು ಸಂಭವಿಸಬಹುದು ಎಂದು ಅಂದಾಜಿಸಲಾಗಿದೆ.
ಜಾಗತಿಕವಾಗಿ ಭೂತಾಪಮಾನವು ಸಾಮಾನ್ಯಕ್ಕಿಂತ 1.2 ಡಿಗ್ರಿ ಸೆಲ್ಸಿಯಸ್‌ನಷ್ಟು ಹೆಚ್ಚಾಗುತ್ತಿರುವುದು ಈ ತೀವ್ರ ಹವಾಮಾನ ಬದಲಾವಣೆಗೆ ಪ್ರಮುಖ ಕಾರಣವಾಗಿದೆ. ಮುಂದಿನ 20 ವರ್ಷಗಳ ನಂತರ ಬರಬಹುದು ಎಂದು ಹವಾಮಾನ ತಜ್ಞರು ಅಂದಾಜಿಸಿದ್ದ ತಾಪಮಾನದ ತೀವ್ರ ಪರಿಸ್ಥಿತಿ ಈಗಲೇ ಎದುರಾಗುತ್ತಿದೆ. ಪರಿಣಾಮವಾಗಿ, ಮುಂಬರುವ ದಿನಗಳಲ್ಲಿ ತೀವ್ರ ಬಿಸಿಲಿನ ದಿನಗಳ ಸಂಖ್ಯೆ ಶೇಕಡಾ 44ರಷ್ಟು ಹೆಚ್ಚಾಗಲಿದ್ದು, ಜನಜೀವನದ ಮೇಲೆ ತೀವ್ರ ಪರಿಣಾಮ ಬೀರಲಿದೆ ಎಂದು ಅಧ್ಯಯನ ಸ್ಪಷ್ಟಪಡಿಸಿದೆ.
ಈ ಹವಾಮಾನ ವೈಪರೀತ್ಯದ ಹೊಡೆತ ಕೇವಲ ಭಾರತಕ್ಕಷ್ಟೇ ಸೀಮಿತವಾಗಿರದೆ ಜಾಗತಿಕ ಮಟ್ಟದಲ್ಲೂ ಭಾರಿ ಅನಾಹುತ ಉಂಟುಮಾಡಲಿದೆ. ಒಟ್ಟಾರೆಯಾಗಿ ವಿಶ್ವದಾದ್ಯಂತ 4,50,000ಕ್ಕೂ ಹೆಚ್ಚು ಸಾವುಗಳು ಸಂಭವಿಸುವ ಭೀತಿಯಿದ್ದು, ಅದರಲ್ಲಿ ಸುಮಾರು 2,40,000 ಸಾವುಗಳು ಸೆಪ್ಟಂಬರ್ 2026 ರಿಂದ ಫೆಬ್ರವರಿ 2027ರ ಅವಧಿಯಲ್ಲೇ ಸಂಭವಿಸಲಿವೆ. ನೈಜೀರಿಯಾ ಮತ್ತು ಸುಡಾನ್‌ನಂತಹ ದೇಶಗಳಲ್ಲಿ ಇದರ ಪ್ರಭಾವ ಅತಿ ಹೆಚ್ಚಾಗಿರಲಿದ್ದು, ಜಾಗತಿಕವಾಗಿ ಎಲ್-ನಿನೋದಿಂದ ಅತಿ ಹೆಚ್ಚು ಸಂಕಷ್ಟಕ್ಕೆ ಈಡಾಗುವ ದೇಶಗಳ ಪಟ್ಟಿಯಲ್ಲಿ ಭಾರತ ನಾಲ್ಕನೇ ಸ್ಥಾನದಲ್ಲಿದೆ.
ಎಲ್-ನಿನೋ ಎಂಬುದು ಈಕ್ವೆಡಾರ್ ಮತ್ತು ಪೆರು ಭಾಗದ ಪೆಸಿಫಿಕ್ ಮಹಾಸಾಗರದ ನೀರಿನಲ್ಲಿ ಉಂಟಾಗುವ ಅಸಹಜ ಉಷ್ಣತೆಯ ಪ್ರಕ್ರಿಯೆಯಾಗಿದೆ. ಇದು ಭಾರತದ ಮುಂಗಾರು ಮಳೆಯ ಮೇಲೆ ನೇರ ಹಾಗೂ ನಕಾರಾತ್ಮಕ ಪರಿಣಾಮವನ್ನು ಬೀರುವುದರ ಜೊತೆಗೆ ದೇಶದಾದ್ಯಂತ ಉಷ್ಣಾಂಶವನ್ನು ತೀವ್ರವಾಗಿ ಹೆಚ್ಚಿಸಲಿದೆ. ಪರಿಣಾಮವಾಗಿ ಮಳೆ ಕೊರತೆ ಮತ್ತು ಹೆಚ್ಚುವರಿ ತಾಪಮಾನದ ಜೋಡಿ ಹೊಡೆತಕ್ಕೆ ಭಾರತೀಯ ಪ್ರದೇಶಗಳು ಸಿಲುಕಲಿವೆ.
ಭಾರತದಲ್ಲಿ ಎಲ್-ನಿನೋದಿಂದ ಉಂಟಾಗುವ ಸಾವಿನ ಪ್ರಮಾಣವು ಆರಂಭದಲ್ಲೇ ಗರಿಷ್ಠ ಮಟ್ಟ ತಲುಪುವ ಬದಲು, ಹಂತಹಂತವಾಗಿ ಏರಿಕೆಯಾಗಲಿದೆ. ವಿಶೇಷವಾಗಿ ಡಿಸೆಂಬರ್ 2026 ರಿಂದ ಫೆಬ್ರವರಿ 2027ರ ಅವಧಿಯಲ್ಲಿ ಸುಮಾರು 7,400ಕ್ಕೂ ಹೆಚ್ಚು ಜನರು ಪ್ರಾಣ ಕಳೆದುಕೊಳ್ಳುವ ಸಾಧ್ಯತೆಯಿದೆ. ಜಗತ್ತಿನ ಇತರ ಪ್ರದೇಶಗಳಲ್ಲಿ ಇದರ ಭೀಕರತೆ ಕಾಲಕ್ರಮೇಣ ಕಡಿಮೆಯಾಗುತ್ತಾ ಬಂದರೂ, ಭಾರತದಲ್ಲಿ ಮಾತ್ರ ಇದರ ಅಪಾಯ ಸುಲಭವಾಗಿ ಕಡಿಮೆಯಾಗುವುದಿಲ್ಲ ಎಂದು ಈ ವರದಿಯನ್ನು ಸಿದ್ಧಪಡಿಸಿದ ಸಂಶೋಧಕರಾದ ಮೈಕಲ್ ಗ್ರೀನ್‌ಸ್ಟೋನ್, ಜೆನೆವಿವ್ ಮಾರಿಕಲ್ ಹಾಗೂ ಗ್ರೋವರ್ ಕೊಪೆಕ್ ಅಭಿಪ್ರಾಯಪಟ್ಟಿದ್ದಾರೆ.
