ನಿಮ್ಮ ವಾಹನವನ್ನು ಮಾರಾಟ ಮಾಡಿದ ಬಳಿಕ ಆರ್‌ಸಿ ವರ್ಗಾವಣೆ ಮಾಡಿಸುವುದನ್ನು ಮರೆತಿದ್ದೀರಾ? ಹಾಗಿದ್ದರೆ ಎಚ್ಚರ. ವಾಹನದ ಮಾಲೀಕತ್ವವನ್ನು ಸಾರಿಗೆ ಇಲಾಖೆ ದಾಖಲೆಗಳಲ್ಲಿ ವರ್ಗಾವಣೆ ಮಾಡದಿದ್ದರೆ, ಅಪಘಾತ, ಸಂಚಾರ ನಿಯಮ ಉಲ್ಲಂಘನೆ ಅಥವಾ ಯಾವುದೇ ಅಪರಾಧ ನಡೆದ ಸಂದರ್ಭದಲ್ಲಿ ಕಾನೂನು ತೊಡಕು ಎದುರಾಗಬಹುದು. ಹೀಗಾಗಿ ವಾಹನ ಮಾರಾಟ ಮಾಡಿದ ಕೂಡಲೇ ಅಗತ್ಯ ದಾಖಲೆಗಳನ್ನು ಸಲ್ಲಿಸಿ ಆರ್‌ಸಿ ಮಾಲೀಕತ್ವ ವರ್ಗಾವಣೆ ಪ್ರಕ್ರಿಯೆ ಪೂರ್ಣಗೊಳಿಸುವುದು ಕಡ್ಡಾಯವಾಗಿದೆ.
ನಿಮ್ಮ ಹಳೆಯ ಬೈಕ್, ಕಾರು ಅಥವಾ ಯಾವುದೇ ವಾಹನವನ್ನು ಮಾರಾಟ ಮಾಡಿದ ಬಳಿಕ ಹಣ ಕೈಗೆ ಬಂದ ತಕ್ಷಣ ತಮ್ಮ ಜವಾಬ್ದಾರಿ ಮುಗಿಯಿತು ಎಂದು ಹಲವರು ಭಾವಿಸುತ್ತಾರೆ. ಆದರೆ, ಸಾರಿಗೆ ಇಲಾಖೆಯ ದಾಖಲೆಗಳಲ್ಲಿ ಮಾಲೀಕತ್ವ ಬದಲಾವಣೆ ಆಗುವವರೆಗೆ ಕಾನೂನು ಪ್ರಕಾರ ಆ ವಾಹನ ಹಳೆಯ ಮಾಲೀಕರ ಹೆಸರಿನಲ್ಲೇ ಇರುತ್ತದೆ ಎಂಬುದನ್ನು ಹಲವರು ಮರೆಯುತ್ತಾರೆ. ಆ ವಾಹನದಿಂದ ಅಪಘಾತ ಸಂಭವಿಸಿದರೂ, ಸಂಚಾರ ನಿಯಮ ಉಲ್ಲಂಘನೆಗೆ ಚಾಲನ್ ಬಂದರೂ ಅಥವಾ ಯಾವುದೇ ಅಪರಾಧಕ್ಕೆ ವಾಹನ ಬಳಸಿದರೂ, ಪೊಲೀಸರು ಆರ್‌ಸಿಯಲ್ಲಿ ದಾಖಲಾಗಿರುವ ಮಾಲೀಕರಿಗೇ ನೋಟಿಸ್ ಕಳುಹಿಸಬಹುದು.
ಹೀಗಾಗಿ ಹಳೆಯ ವಾಹನವನ್ನು ಮಾರಾಟ ಮಾಡಿದ ಕೂಡಲೇ ಮಾಲೀಕತ್ವ ವರ್ಗಾವಣೆ (Ownership Transfer) ಪ್ರಕ್ರಿಯೆಯನ್ನು ಪೂರ್ಣಗೊಳಿಸುವುದು ಅತ್ಯಂತ ಮುಖ್ಯ.
ಆರ್‌ಸಿ ವರ್ಗಾವಣೆ ಪ್ರಕ್ರಿಯೆ, ಅಗತ್ಯ ದಾಖಲೆಗಳು
ವಾಹನವನ್ನು ಮಾರಾಟ ಮಾಡಿದವರು ಮತ್ತು ಖರೀದಿಸಿದವರು ಫಾರಂ-29 ಮತ್ತು ಫಾರಂ-30 ಅನ್ನು ಭರ್ತಿ ಮಾಡಿ ಸಹಿ ಮಾಡಬೇಕು. ಸಾರಿಗೆ ಇಲಾಖೆಯ ಪೋರ್ಟಲ್‌ನಲ್ಲಿ ಸ್ಲಾಟ್ ಬುಕ್ ಮಾಡಿಕೊಂಡು, ಮೂಲ ಆರ್‌ಸಿ, ವಿಳಾಸದ ಪುರಾವೆ, ಗುರುತಿನ ಚೀಟಿ, ವಿಮೆ ಹಾಗೂ PUC ಪ್ರಮಾಣಪತ್ರಗಳನ್ನು RTO ಕಚೇರಿಯಲ್ಲಿ ಸಲ್ಲಿಸಬೇಕು.ಖರೀದಿದಾರರು RTO ಕಚೇರಿಗೆ ಖುದ್ದಾಗಿ ಹಾಜರಾಗಿ ಫೋಟೋ, ಡಿಜಿಟಲ್ ಸಹಿ ಹಾಗೂ ಬೆರಳಚ್ಚು ನೀಡಬೇಕಾಗುತ್ತದೆ.
ಒಂದು ವೇಳೆ ವಾಹನದ ಮೇಲೆ ಸಾಲ ಅಥವಾ ಫೈನಾನ್ಸ್ ಇದ್ದರೆ, ಬ್ಯಾಂಕ್‌ನಿಂದ ‘ನೋ ಡ್ಯೂಸ್’ ಪತ್ರ ಪಡೆದು ಫಾರಂ-35 ಸಲ್ಲಿಸುವ ಮೂಲಕ ಹೈಪೋಥಿಕೇಶನ್‌ನ್ನು ತೆಗೆದುಹಾಕಬೇಕು.
ಬೇರೆ ಜಿಲ್ಲೆ ಅಥವಾ ರಾಜ್ಯಕ್ಕೆ ವಾಹನ ವರ್ಗಾವಣೆ
ಬೇರೆ ಜಿಲ್ಲೆಯ ವ್ಯಕ್ತಿಯೊಬ್ಬರು ವಾಹನವನ್ನು ಖರೀದಿಸಿದ್ದರೆ, ಮೊದಲು ವಾಹನ ನೋಂದಣಿಯಾಗಿರುವ RTO ಕಚೇರಿಯಿಂದ ಕ್ಲಿಯರೆನ್ಸ್ ಸರ್ಟಿಫಿಕೇಟ್ ಪಡೆಯಬೇಕು. ನಂತರ ಹೊಸ ಜಿಲ್ಲೆಯ RTO ಕಚೇರಿಯಲ್ಲಿ ಅಗತ್ಯ ದಾಖಲೆಗಳನ್ನು ಸಲ್ಲಿಸಬೇಕು.
ಅದೇ ರೀತಿ, ಬೇರೆ ರಾಜ್ಯದ ವ್ಯಕ್ತಿ ವಾಹನವನ್ನು ಖರೀದಿಸಿದರೆ, ಸ್ಥಳೀಯ ಪೊಲೀಸ್ ಠಾಣೆಯಿಂದ ನೋ ಅಬ್ಜೆಕ್ಷನ್ ಸರ್ಟಿಫಿಕೇಟ್ (NOC) ಪಡೆಯುವುದು ಅಗತ್ಯವಾಗಬಹುದು. ವಾಹನದ ಮೇಲೆ ಯಾವುದೇ ಪ್ರಕರಣಗಳಿಲ್ಲ ಎಂಬುದನ್ನು ಖಚಿತಪಡಿಸಿಕೊಂಡ ಬಳಿಕವೇ ಬೇರೆ ರಾಜ್ಯದಲ್ಲಿ ನೋಂದಣಿಗೆ ಸಾರಿಗೆ ಇಲಾಖೆ ಅನುಮತಿ ನೀಡುತ್ತದೆ.
