ಆಧುನಿಕ ಜಗತ್ತಿನಲ್ಲಿ ಎಐ ಪರಿಕರಗಳು ಕೆಲಸವನ್ನು ಸುಲಭಗೊಳಿಸುತ್ತಿವೆ ನಿಜ, ಆದರೆ ಇವುಗಳ ಅತಿಯಾದ ಬಳಕೆ ಮನುಷ್ಯನ ಸ್ವಂತ ನಿರ್ಧಾರ ತೆಗೆದುಕೊಳ್ಳುವ ಸಾಮರ್ಥ್ಯದ ಮೇಲೆ ಕೆಟ್ಟ ಪರಿಣಾಮ ಬೀರಬಹುದು ಎಂದು ಹೊಸ ಅಧ್ಯಯನವೊಂದು ತಿಳಿಸಿದೆ. ‘ಟೆಕ್ನಾಲಜಿ, ಮೈಂಡ್ ಅಂಡ್ ಬಿಹೇವಿಯರ್’ ಎಂಬ ನಿಯತಕಾಲಿಕೆಯಲ್ಲಿ ಪ್ರಕಟವಾದ ಈ ಸಂಶೋಧನೆಯು, ಎಐ ಬಳಕೆಯಿಂದ ಮನುಷ್ಯ ತನ್ನ ಸ್ವಂತ ಆಲೋಚನೆಗಳ ಮೇಲಿನ ಹಿಡಿತವನ್ನು ಹೇಗೆ ಕಳೆದುಕೊಳ್ಳುತ್ತಿದ್ದಾನೆ ಎಂಬುದನ್ನು ವಿವರಿಸಿದೆ.
ಅಧ್ಯಯನದ ಪ್ರಮುಖ ಅಂಶಗಳು ಇಂಗ್ಲೆಂಡ್‌ನ ಮಿಡ್ಲ್‌ಸೆಕ್ಸ್ ವಿಶ್ವವಿದ್ಯಾಲಯದ ಸಂಶೋಧಕಿ ಸಾರಾ ಬಾಲ್ಡಿಯೊ ನೇತೃತ್ವದಲ್ಲಿ ನಡೆದ ಈ ಅಧ್ಯಯನದಲ್ಲಿ ಅಮೆರಿಕ ಮತ್ತು ಕೆನಡಾದ ಸುಮಾರು 1,923 ಜನರನ್ನು ಬಳಸಿಕೊಳ್ಳಲಾಗಿತ್ತು. ಅವರಿಗೆ ಎಐ ನೆರವಿನೊಂದಿಗೆ ವಿವಿಧ ಕಚೇರಿ ಕೆಲಸಗಳನ್ನು ಮಾಡಲು ಸೂಚಿಸಲಾಯಿತು. ಕೆಲಸ ಮುಗಿದ ನಂತರ ಶೇಕಡಾ 58 ರಷ್ಟು ಜನರು ಎಐ ತಂತ್ರಜ್ಞಾನವೇ ಅವರಿಗಿಂತ ಹೆಚ್ಚು ಯೋಚಿಸಿದೆ ಎಂದು ಒಪ್ಪಿಕೊಂಡಿದ್ದಾರೆ. ಇಂತಹವರಲ್ಲಿ ತಮ್ಮ ಸ್ವಂತ ಆಲೋಚನಾ ಶಕ್ತಿಯ ಬಗ್ಗೆ ಆತ್ಮವಿಶ್ವಾಸ ಕಡಿಮೆಯಾಗಿರುವುದು ಕಂಡುಬಂದಿದೆ.
ಸಕ್ರಿಯ ಬಳಕೆ ಮತ್ತು ನಿಷ್ಕ್ರಿಯ ಅವಲಂಬನೆ ಎಲ್ಲಾ ಎಐ ಬಳಕೆದಾರರಿಗೂ ಈ ಸಮಸ್ಯೆ ಎದುರಾಗಿಲ್ಲ ಎಂಬುದು ಗಮನಾರ್ಹ. ಯಾರು ಎಐ ನೀಡಿದ ಉತ್ತರಗಳನ್ನು ಪ್ರಶ್ನಿಸಿ, ಬದಲಾವಣೆ ಮಾಡಿ ಅಥವಾ ತಿರಸ್ಕರಿಸಿ ತಮ್ಮದೇ ಆದ ವಿವೇಚನೆಯನ್ನು ಬಳಸಿದ್ದಾರೋ, ಅಂತಹವರಲ್ಲಿ ಆತ್ಮವಿಶ್ವಾಸ ಹೆಚ್ಚಾಗಿದೆ. ಆದರೆ, ಎಐ ನೀಡಿದ ಮಾಹಿತಿಯನ್ನು ಯಥಾವತ್ತಾಗಿ ಒಪ್ಪಿಕೊಂಡವರಲ್ಲಿ ಕೆಲಸದ ಮೇಲಿನ ಮಾಲೀಕತ್ವದ ಭಾವನೆ ಮತ್ತು ಸೃಜನಶೀಲತೆ ಕುಗ್ಗಿರುವುದು ಪತ್ತೆಯಾಗಿದೆ.
ತಜ್ಞರ ಸಲಹೆಗಳೇನು? ಸಂಶೋಧಕಿ ಸಾರಾ ಬಾಲ್ಡಿಯೊ ಅವರ ಪ್ರಕಾರ, ಎಐ ಅನ್ನು ಒಂದು ಸಹಾಯಕ ಸಾಧನವಾಗಿ ಬಳಸಬೇಕೇ ಹೊರತು ನಮ್ಮ ಮೆದುಳಿಗೆ ಪರ್ಯಾಯವಾಗಿ ಅಲ್ಲ. ಯಾವುದೇ ಕೆಲಸಕ್ಕೆ ಎಐ ಮೊರೆ ಹೋಗುವ ಮೊದಲು ಸ್ವತಃ ಪರಿಹಾರ ಕಂಡುಕೊಳ್ಳಲು ಪ್ರಯತ್ನಿಸಬೇಕು. ಕೆಲಸದ ನಡುವೆ ಎಐ ಬಳಕೆಯಿಂದ ವಿರಾಮ ತೆಗೆದುಕೊಳ್ಳುವುದು ಮತ್ತು ಅದನ್ನು ಒಬ್ಬ ಮನುಷ್ಯನಂತೆ ಭಾವಿಸಿ ಪೂರ್ಣವಾಗಿ ಅವಲಂಬಿಸದಿರುವುದು ಒಳಿತು. ಕೆಲಸದ ಸ್ಥಳದಲ್ಲಿ ನಿಮ್ಮ ವಿಶಿಷ್ಟ ಗುರುತು ಮತ್ತು ಸೃಜನಶೀಲತೆಯನ್ನು ಉಳಿಸಿಕೊಳ್ಳಲು ಸ್ವಂತ ನಿರ್ಧಾರಗಳಿಗೆ ಹೆಚ್ಚಿನ ಒತ್ತು ನೀಡಬೇಕು ಎಂದು ಸಂಶೋಧನೆ ಎಚ್ಚರಿಸಿದೆ.
