ಸೊರಬ : ಕುಟುಂಬಗಳನ್ನು ಸಾಲದ ಸುಳಿಯಿಂದ ಪಾರು ಮಾಡುವ ಮತ್ತು ಅದ್ದೂರಿ ಆಚರಣೆಗಳ ಹೆಸರಿನಲ್ಲಿ ನಡೆಯುವ ದುಂದುವೆಚ್ಚಕ್ಕೆ ಕಡಿವಾಣ ಹಾಕುವ ಮಹತ್ವದ ಉದ್ದೇಶದಿಂದ ಸೊರಬ ತಾಲ್ಲೂಕಿನ ಚಿಕ್ಕಶಕುನ ಹಾಗೂ ಸೀಗೆಹಳ್ಳಿ ಗ್ರಾಮಸ್ಥರು ಸ್ವಯಂಪ್ರೇರಿತವಾಗಿ ಬೀಗರೂಟವನ್ನು ನಿಷೇಧಿಸಿ ಐತಿಹಾಸಿಕ ತೀರ್ಮಾನ ಕೈಗೊಂಡಿದ್ದಾರೆ. ಶಿಕಾರಿಪುರ ತಾಲ್ಲೂಕಿನ ಹರಗಿ ಗ್ರಾಮದ ಬಳಿಕ, ಈಗ ಸೊರಬ ತಾಲ್ಲೂಕಿನಲ್ಲೂ ಈ ಮಾದರಿ ಹೆಜ್ಜೆ ಇಡಲಾಗಿದೆ.
ಮಲೆನಾಡಿನ ದೀವರು (ಈಡಿಗ) ಸಮುದಾಯದಲ್ಲಿ ಮದುವೆ ಸಂದರ್ಭದಲ್ಲಿ ನಡೆಯುವ ಬೀಗರೂಟದ ಆಚರಣೆಯು ವರ್ಷದಿಂದ ವರ್ಷಕ್ಕೆ ಪ್ರತಿಷ್ಠೆಯ ಸಂಕೇತವಾಗಿ ಮಾರ್ಪಟ್ಟಿತ್ತು. ಬರಗಾಲ ಮತ್ತು ತೀವ್ರ ಆರ್ಥಿಕ ಸಂಕಷ್ಟದ ಸಮಯದಲ್ಲೂ ಸಾಲ ಮಾಡಿ ಅದ್ದೂರಿ ಔತಣಕೂಟಗಳನ್ನು ಏರ್ಪಡಿಸುವುದು ಕುಟುಂಬಗಳ ಮೇಲೆ ಅಪಾರ ಆರ್ಥಿಕ ಹೊರೆಯನ್ನು ಹೊರಿಸುತ್ತಿತ್ತು. ಈ ದುಂದುವೆಚ್ಚದ ಪೈಪೋಟಿಗೆ ಅಂತ್ಯ ಹಾಡಲು ಗ್ರಾಮಸ್ಥರು ಒಮ್ಮತದ ನಿರ್ಧಾರ ತೆಗೆದುಕೊಂಡಿದ್ದಾರೆ.
ಈ ಕುರಿತು ಗ್ರಾಮದ ಬಸವೇಶ್ವರ ದೇವಸ್ಥಾನದಲ್ಲಿ ಸಭೆ ಸೇರಿದ ಚಿಕ್ಕಶಕುನ ಮತ್ತು ಸೀಗೆಹಳ್ಳಿ ಗ್ರಾಮಸ್ಥರು, ಇನ್ಮುಂದೆ ಯಾವುದೇ ಕುಟುಂಬಗಳು ಅದ್ದೂರಿ ಬೀಗರೂಟ ನಡೆಸದಿರಲು ನಿರ್ಧರಿಸಿದ್ದಾರೆ. ಔತಣಕೂಟಕ್ಕಾಗಿ ಮಾಡುವ ಅನಗತ್ಯ ಖರ್ಚನ್ನು ಉಳಿಸಿ, ಆ ಹಣವನ್ನು ಕುಟುಂಬದ ಆರ್ಥಿಕ ಶ್ರೇಯೋಭಿವೃದ್ಧಿಗೆ ಬಳಸಿಕೊಳ್ಳಲು ತೀರ್ಮಾನಿಸಲಾಗಿದೆ.
ಸರಳ ಆಚರಣೆಗಳಿಗೆ ಒತ್ತು ನೀಡುವ ಮೂಲಕ ಸಮಾಜಕ್ಕೆ ಮಾದರಿಯಾಗಿರುವ ಈ ಗ್ರಾಮಗಳು, ಸೊರಬ ತಾಲ್ಲೂಕಿನಲ್ಲಿಯೇ ಸ್ವಯಂಪ್ರೇರಿತವಾಗಿ ಬೀಗರೂಟಕ್ಕೆ ಕಡಿವಾಣ ಹಾಕಿದ ಮೊದಲ ಗ್ರಾಮಗಳೆಂಬ ಹೆಗ್ಗಳಿಕೆಗೆ ಪಾತ್ರವಾಗಿವೆ. ಈ ಸಭೆಯಲ್ಲಿ ಗ್ರಾಮದ ಮುಖಂಡರಾದ ಸಣ್ಣಪ್ಪ, ಕೆರಿಯಪ್ಪ, ವೀರಭದ್ರ, ಪರಶುರಾಮ, ವೈ.ಜಿ. ಗುರುಮೂರ್ತಿ ಸೇರಿದಂತೆ ಹಲವು ಗ್ರಾಮಸ್ಥರು ಉಪಸ್ಥಿತರಿದ್ದರು.
