ಟೀಮ್ ಇಂಡಿಯಾದ ಪ್ರಮುಖ ಲೆಗ್‌ಸ್ಪಿನ್ನರ್ ಯುಜ್ವೇಂದ್ರ ಚಹಾಲ್, ಕ್ರಿಕೆಟ್ ಜೊತೆಗೆ ಫುಟ್‌ಬಾಲ್‌ನಲ್ಲೂ ಅಪಾರ ಆಸಕ್ತಿ ಹೊಂದಿದ್ದಾರೆ. ಇಂಗ್ಲಿಷ್ ಪ್ರೀಮಿಯರ್ ಲೀಗ್‌ನ (EPL) ಪ್ರಸಿದ್ಧ ಫುಟ್‌ಬಾಲ್ ಕ್ಲಬ್ ‘ಮ್ಯಾಂಚೆಸ್ಟರ್ ಯುನೈಟೆಡ್’ (Manchester United) ತಂಡದ ಕಟ್ಟಾ ಅಭಿಮಾನಿಯಾಗಿರುವ ಚಹಾಲ್, ಇತ್ತೀಚಿನ ಸವಾಲಿನ ದಿನಗಳ ನಡುವೆಯೂ ತಮ್ಮ ನೆಚ್ಚಿನ ಕ್ಲಬ್ ಪ್ರಬಲವಾಗಿ ಕಂಬ್ಯಾಕ್ ಮಾಡಲಿದೆ ಎಂದು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
ಇತ್ತೀಚೆಗೆ ಓಲ್ಡ್ ಟ್ರಾಫೋರ್ಡ್ ಮೈದಾನದಲ್ಲಿ ನಡೆದ ಮ್ಯಾಂಚೆಸ್ಟರ್ ಡೆರ್ಬಿ ಪಂದ್ಯವನ್ನು ನೇರವಾಗಿ ವೀಕ್ಷಿಸಿದ್ದ ಚಹಾಲ್, ಜಿಯೋಸ್ಟಾರ್ (JioStar) ಜೊತೆ ಮಾತನಾಡುತ್ತಾ ತಮ್ಮ ಬಾಲ್ಯದ ಫುಟ್‌ಬಾಲ್ ಪ್ರೀತಿಯನ್ನು ಹಂಚಿಕೊಂಡಿದ್ದಾರೆ.
ಬಾಲ್ಯದ ನೆಚ್ಚಿನ ತಂಡಕ್ಕೆ ಚಹಾಲ್ ಬೆಂಬಲ:
“ಬಾಲ್ಯದಿಂದಲೂ ಮ್ಯಾಂಚೆಸ್ಟರ್ ಯುನೈಟೆಡ್ ಎಂದರೆ ನನಗೆ ಅಚ್ಚುಮೆಚ್ಚು. ಸಿಕ್ಕ ಉಚಿತ ಸಮಯದಲ್ಲಿ ಸ್ನೇಹಿತರೊಡನೆ ಕುಳಿತು ಯುನೈಟೆಡ್ ಪಂದ್ಯಗಳನ್ನು ವೀಕ್ಷಿಸುವುದೇ ಒಂದು ರೋಮಾಂಚನಕಾರಿ ಅನುಭವ. ಇತ್ತೀಚೆಗೆ ಸಿಟಿ ವಿರುದ್ಧದ ಪಂದ್ಯದಲ್ಲಿ ಮಾಂಚೆಸ್ಟರ್ ಸಿಟಿ ಆಟಗಾರ ರೆಡ್ ಕಾರ್ಡ್ ಪಡೆದು ಹೊರನಡೆದಾಗ ನಮಗೆ ಗೆಲ್ಲುವ ಅವಕಾಶವಿತ್ತು. ಆದರೆ ಅರ್ಲಿಂಗ್ ಹಾಲ್ಯಾಂಡ್ ಗೋಲ್ ಬಾರಿಸಿದ್ದು ಹಾಗೂ ವಿಎಆರ್ (VAR) ಡ್ರಾಮಾದಿಂದ ಪಂದ್ಯ ಕೈಜಾರಿದ್ದು ಅಭಿಮಾನಿಯಾಗಿ ಬೇಸರ ಮೂಡಿಸಿತು,” ಎಂದು ಚಹಾಲ್ ನೆನಪಿಸಿಕೊಂಡಿದ್ದಾರೆ.
ತಂಡದ ಕುರಿತು ಚಹಾಲ್ ಮಾತು:
ತಂಡದ ಪ್ರಸ್ತುತ ಪ್ರದರ್ಶನದ ಕುರಿತು ಮಾತನಾಡುತ್ತಾ, “ಈ ಯುನೈಟೆಡ್ ತಂಡದಲ್ಲಿ ಹೋರಾಟದ ಮನೋಭಾವ ಮತ್ತು ಅನಿರೀಕ್ಷಿತ ತಿರುವು ನೀಡುವ ಸಾಮರ್ಥ್ಯವಿದೆ. ಮ್ಯಾಥ್ಯೂಸ್ ಕುನ್ಹಾ ಅವರ ಆಟದ ಶೈಲಿ ಮತ್ತು ಆಕ್ರಮಣಕಾರಿ ಎನರ್ಜಿ ನನಗೆ ತುಂಬಾ ಇಷ್ಟ. ಈ ತಂಡ ಖಂಡಿತವಾಗಿಯೂ ಎಲ್ಲರಿಗೂ ಅಚ್ಚರಿಯ ತಿರುವು ನೀಡಲಿದೆ ಎಂಬ ಭರವಸೆ ನನಗಿದೆ. ಬಾಲ್ಯದ ಅಭಿಮಾನಿಯಾಗಿ ನಾನು ಎಂದಿಗೂ ನನ್ನ ತಂಡವನ್ನು ಬೆಂಬಲಿಸುತ್ತೇನೆ,” ಎಂದು ಹೇಳಿದ್ದಾರೆ.
ಅಂತರರಾಷ್ಟ್ರೀಯ ವಿರಾಮದ ನಂತರ ಮ್ಯಾಂಚೆಸ್ಟರ್ ಯುನೈಟೆಡ್ ತನ್ನ ಮುಂದಿನ ಪ್ರೀಮಿಯರ್ ಲೀಗ್ ಪಂದ್ಯದಲ್ಲಿ ಶನಿವಾರ ಟೊಟೆನ್‌ಹ್ಯಾಮ್ ಹಾಟ್ಸ್‌ಪರ್ ವಿರುದ್ಧ ಸೆಣಸಲಿದೆ.
