ಸಾಗರ: ಸಾಂಸ್ಕೃತಿಕ ಹಾಗೂ ಸಮಾಜಮುಖಿ ಚಟುವಟಿಕೆಗಳಲ್ಲಿ ಸಕ್ರಿಯವಾಗಿರುವ ‘ಜೀವನ್ಮುಖಿ’ ಸಂಘಟನೆಯು ತನ್ನ ‘ಮುಂದಣ ಹೆಜ್ಜೆ - 12’ ಸರಣಿಯ ಅಂಗವಾಗಿ ಇಂದಿನಿಂದ ಆಯೋಜಿಸಿರುವ ಮೂರು ದಿನಗಳ ವಿಶೇಷ ಕಸೂತಿ ತರಬೇತಿ ಕಾರ್ಯಾಗಾರ ‘ದಾರ-ಚಿತ್ತಾರ’ಕ್ಕೆ ನಗರದಲ್ಲಿ ಚಾಲನೆ ದೊರೆತಿದೆ.
ಶಿವಮೊಗ್ಗ ಜಿಲ್ಲೆಯ ಸಾಗರ ನಗರದ ಎಸ್.ಪಿ.ಎಂ. ರಸ್ತೆಯಲ್ಲಿರುವ ‘ಚರಕ’ ಮಳಿಗೆಯಲ್ಲಿ ಅಕ್ಟೋಬರ್ 8ರ ಇಂದಿನಿಂದ ಅಕ್ಟೋಬರ್ 10 ರವರೆಗೆ ಈ ವಿಶಿಷ್ಟ ಕಲಾ ಕಾರ್ಯಾಗಾರ ನಡೆಯಲಿದೆ.
ಹಿರಿಯ ಕಸೂತಿ ಕಲಾವಿದೆ ದೇವೀರಮ್ಮ ವೀರಪ್ಪ ಅವರಿಂದ ಉದ್ಘಾಟನೆ
ಇಂದು ನಡೆದ ಸಮಾರಂಭದಲ್ಲಿ 1970ರ ದಶಕದಲ್ಲೇ ಕಸೂತಿ ಕಲೆಯಲ್ಲಿ ಗಮನಾರ್ಹ ಸಾಧನೆ ಮಾಡಿದ್ದ ಮೈದೊಳಲಿನ ಹಿರಿಯರಾದ ಡಿ. ಎಚ್. ದೇವೀರಮ್ಮ ವೀರಪ್ಪ ಅವರು ಕಾರ್ಯಾಗಾರವನ್ನು ಉದ್ಘಾಟಿಸಿದರು.
ಹೆಗ್ಗೋಡಿನ ಖ್ಯಾತ ‘ಚರಕ’ ಸಂಸ್ಥೆಯ ಕಸೂತಿ ವಿಭಾಗದ ಮುಖ್ಯಸ್ಥರಾದ ಸತ್ಯವತಿ ಎಸ್. ಎನ್. ಅವರು ಪ್ರಮುಖ ಸಂಪನ್ಮೂಲ ವ್ಯಕ್ತಿಯಾಗಿ ಭಾಗವಹಿಸಿದ್ದು, ಶಿಬಿರಾರ್ಥಿಗಳಿಗೆ ಸೂಕ್ತ ತಾಂತ್ರಿಕ ಮಾರ್ಗದರ್ಶನ ನೀಡಲಿದ್ದಾರೆ.
20 ಮಹಿಳೆಯರಿಗೆ ಪ್ರಾಯೋಗಿಕ ತರಬೇತಿ
ನಶಿಸಿಹೋಗುತ್ತಿರುವ ಪಾರಂಪರಿಕ ಕಸೂತಿ ಕಲೆಗೆ ಮರುಜೀವ ನೀಡುವುದು ಹಾಗೂ ಗ್ರಾಮೀಣ ಮಹಿಳೆಯರಿಗೆ ಸ್ವಯಂ ಉದ್ಯೋಗದ ಹಾದಿ ತೋರಿಸುವುದು ಈ ಶಿಬಿರದ ಮುಖ್ಯ ಆಶಯವಾಗಿದೆ.
ಈ ಮೂರು ದಿನಗಳ ಕಾರ್ಯಾಗಾರದಲ್ಲಿ ಸಾಗರ ಪಟ್ಟಣ ಹಾಗೂ ಸುತ್ತಮುತ್ತಲಿನ ಹಳ್ಳಿಗಳಿಂದ ಆಯ್ಕೆಯಾದ 20 ಮಹಿಳೆಯರು ತರಬೇತಿ ಪಡೆಯುತ್ತಿದ್ದಾರೆ. ಸಾಂಪ್ರದಾಯಿಕ ಕಲೆಯ ಸೌಂದರ್ಯವನ್ನು ಕರಗತ ಮಾಡಿಕೊಳ್ಳಲು ಇದು ಅತ್ಯುತ್ತಮ ವೇದಿಕೆಯಾಗಿದೆ.
ವರದಿ: ವಸಂತ ಬಿ ಈಶ್ವರಗೆರೆ, ಸಂಪಾದಕರು..
