ಕರ್ನಾಟಕ ಹೈಕೋರ್ಟ್ ಮಹತ್ವದ ಆದೇಶವೊಂದನ್ನು ಹೊರಡಿಸಿದ್ದು, ಗಾರ್ಡಿಯನ್ ಅಂಡ್ ವಾರ್ಡ್ಸ್ ಕಾಯ್ದೆಯ ಅಡಿಯಲ್ಲಿ ಬರುವ ವಿಚಾರಣೆಗಳು ಹಾಗೂ ಎಲ್ಲಾ ಕುಟುಂಬ ನ್ಯಾಯಾಲಯಗಳು ಇನ್ನು ಮುಂದೆ 'ಭೇಟಿ' (visitation) ಎಂಬ ಪದದ ಬದಲಿಗೆ 'ಪೇರೆಂಟಿಂಗ್ ಟೈಮ್' (parenting time) ಅಂದರೆ ಪೋಷಕರ ಸಮಯ ಎಂಬ ಪದವನ್ನು ಕಡ್ಡಾಯವಾಗಿ ಬಳಸುವಂತೆ ನಿರ್ದೇಶನ ನೀಡಿದೆ. ನ್ಯಾಯಮೂರ್ತಿ ಲಲಿತಾ ಕಣ್ಣೆಗಂಟಿ ಅವರು ಈ ಕುರಿತು ವಿವರವಾದ ಮಧ್ಯಂತರ ಆದೇಶವನ್ನು ಪ್ರಕಟಿಸಿದ್ದಾರೆ.
ಯಾವ ಪೋಷಕರೂ ತಮ್ಮ ಮಗುವಿನ ಜೀವನದಲ್ಲಿ ಕೇವಲ ಭೇಟಿಗಾರರಲ್ಲ ಎಂಬ ಸರಳ ಸತ್ಯವನ್ನು 'ಪೇರೆಂಟಿಂಗ್ ಟೈಮ್' ಎಂಬ ಪದವು ಗುರುತಿಸುತ್ತದೆ ಎಂದು ನ್ಯಾಯಾಲಯ ಅಭಿಪ್ರಾಯಪಟ್ಟಿದೆ. ಒಂಬತ್ತು ವರ್ಷದ ಬಾಲಕನ ಪಾಲನೆಗೆ ಸಂಬಂಧಿಸಿದ ವ್ಯಾಜ್ಯದ ವಿಚಾರಣೆ ನಡೆಸುವ ವೇಳೆ ನ್ಯಾಯಪೀಠ ಈ ಆದೇಶ ನೀಡಿದ್ದು, ಹೈಕೋರ್ಟ್‌ನ ರಿಜಿಸ್ಟ್ರಾರ್ ಜನರಲ್ ಅವರಿಗೆ ಈ ಆದೇಶವನ್ನು ಎಲ್ಲಾ ಕುಟುಂಬ ನ್ಯಾಯಾಲಯಗಳಿಗೆ ತಲುಪಿಸಲು ಮತ್ತು ಈ ಕುರಿತು ಸುತ್ತೋಲೆ ಹೊರಡಿಸುವಂತೆ ಸೂಚಿಸಲಾಗಿದೆ.
ಮಕ್ಕಳ ಪಾಲನಾ ಹಕ್ಕಿಗೆ ಸಂಬಂಧಿಸಿದ ಪ್ರಕರಣಗಳಲ್ಲಿ, ಪಾಲನಾ ಅಧಿಕಾರ ಹೊಂದಿರದ ಪೋಷಕರು ಮಗುವಿನೊಂದಿಗೆ ಕಳೆಯುವ ಸಮಯವನ್ನು ವಿವರಿಸಲು ನ್ಯಾಯಾಲಯಗಳು ಸಾಮಾನ್ಯವಾಗಿ 'ವಿಸಿಟೇಷನ್' ಎಂಬ ಪದವನ್ನು ಬಳಸುತ್ತವೆ. ಆದರೆ ಈ ಪದವು ಮಗುವಿನ ಜೀವನದಲ್ಲಿ ಒಬ್ಬರು ಕೇವಲ ಅತಿಥಿಯಂತೆ ಬಂದು ಹೋಗುವವರು ಎಂಬ ತಪ್ಪು ಭಾವನೆಯನ್ನು ಮೂಡಿಸುತ್ತದೆ ಎಂದು ನ್ಯಾಯಮೂರ್ತಿಗಳು ತಿಳಿಸಿದ್ದಾರೆ. ಮಗುವಿನ ಮೇಲಿನ ಪ್ರೀತಿ ಮತ್ತು ಸಂಬಂಧವನ್ನು ಬಿಂಬಿಸುವಾಗ 'ಪೇರೆಂಟಿಂಗ್' ಎಂಬ ಪದವು ಹೆಚ್ಚು ಮಾನವೀಯತೆಯಿಂದ ಕೂಡಿರುತ್ತದೆ ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.
ಪ್ರಸ್ತುತ ಪ್ರಕರಣದಲ್ಲಿ, ತಂದೆಗೆ ಪೇರೆಂಟಿಂಗ್ ಟೈಮ್ ಮಂಜೂರು ಮಾಡಿದ ಕುಟುಂಬ ನ್ಯಾಯಾಲಯದ ಆದೇಶವನ್ನು ಪತ್ನಿ ಪ್ರಶ್ನಿಸಿದ್ದರು. ತಂದೆ ಮತ್ತು ಮಗನ ನಡುವಿನ ಪರಸ್ಪರ ಸಂವಹನಕ್ಕಾಗಿ ಕೇವಲ 30 ನಿಮಿಷಗಳನ್ನು ನಿಗದಿಪಡಿಸಲಾಗಿತ್ತು. 2017 ರಿಂದ ಪ್ರತ್ಯೇಕವಾಗಿ ವಾಸಿಸುತ್ತಿರುವ ಈ ದಂಪತಿಯ ತಂದೆ, ಮಗನಿಗೆ ಮೂರು ತಿಂಗಳ ಕಂದಮ್ಮನಾಗಿದ್ದಾಗ ಕೊನೆಯ ಬಾರಿ ನೋಡಿದ್ದರು. ಈ ಹಿನ್ನೆಲೆಯಲ್ಲಿ, ಕೇವಲ ಅರ್ಧ ಗಂಟೆಯ ಅವಧಿ ಸಾಲದು ಎಂದು ಗಮನಿಸಿದ ಹೈಕೋರ್ಟ್, ಕುಟುಂಬ ನ್ಯಾಯಾಲಯಗಳು ಯಾವುದೇ ಪೂರ್ವಯೋಜಿತ ಕಟ್ಟುನಿಟ್ಟಿನ ಸೂತ್ರವಿಲ್ಲದೆ, ಪ್ರಕರಣದ ಪ್ರತಿಯೊಬ್ಬರ ಭಾವನೆಗಳು ಮತ್ತು ವಾಸ್ತವ ಅಂಶಗಳನ್ನು ಪರಿಗಣಿಸಿ ಆದೇಶಿಸಬೇಕು ಎಂದು ತಿಳಿಸಿದೆ.
ಕುಟುಂಬ ನ್ಯಾಯಾಲಯವು ನಿಗದಿಪಡಿಸಿದ ಸಮಯವು ಪ್ರಾಯೋಗಿಕವಾಗಿ ಅನುಷ್ಠಾನಗೊಳಿಸಲು ಅಸಾಧ್ಯವಾದುದು ಎಂದು ಅಭಿಪ್ರಾಯಪಟ್ಟ ಹೈಕೋರ್ಟ್, ಪ್ರಕರಣದ ಮುಂದಿನ ವಿಚಾರಣೆವರೆಗೂ ತಂದೆಗೆ ಎರಡು ದಿನಗಳ ಕಾಲ ಬೆಳಗ್ಗೆ 10 ರಿಂದ ಮಧ್ಯಾಹ್ನ 2 ಗಂಟೆಯವರೆಗೆ ಮಗುವಿನೊಂದಿಗೆ ಕಾಲ ಕಳೆಯಲು (ಪೇರೆಂಟಿಂಗ್ ಟೈಮ್) ಅವಕಾಶ ಕಲ್ಪಿಸಿ ಮಧ್ಯಂತರ ಆದೇಶ ನೀಡಿದೆ.
