ಭಾರತ ಮಹಿಳಾ ಕ್ರಿಕೆಟ್ ತಂಡದ ನಾಯಕತ್ವದಿಂದ ಹರ್ಮನ್‌ಪ್ರೀತ್ ಕೌರ್ ಕೆಳಗಿಳಿದ ಬೆನ್ನಲ್ಲೇ, ಉಪನಾಯಕಿ ಸ್ಮೃತಿ ಮಂಧನಾ ನೂತನ ನಾಯಕಿಯಾಗಿ ಆಯ್ಕೆಯಾಗುವುದು ಬಹುತೇಕ ಖಚಿತವಾಗಿದೆ. ಆದರೆ, ಈ ನಾಯಕತ್ವದ ಬದಲಾವಣೆಯು ತಂಡದ ಆಟಗಾರರಲ್ಲಿ ಹಾಗೂ ಡ್ರೆಸ್ಸಿಂಗ್ ರೂಮ್‌ನಲ್ಲಿ ತೀವ್ರ ಅಸಮಾಧಾನ ಮತ್ತು ವಿಭಜನೆಗೆ ಕಾರಣವಾಗಿದೆ ಎಂದು ವರದಿಯಾಗಿದೆ.
ನಾಯಕತ್ವದ ವಿಚಾರದಲ್ಲಿ ವೈಮನಸ್ಸು: ವರದಿಗಳ ಪ್ರಕಾರ, ಕಳೆದ ಕೆಲವು ಸಮಯದಿಂದ ಹರ್ಮನ್‌ಪ್ರೀತ್ ಕೌರ್ ಮತ್ತು ಸ್ಮೃತಿ ಮಂಧನಾ ನಡುವೆ ಸಂಬಂಧಗಳು ಸರಿಯಿಲ್ಲ. ಇಬ್ಬರೂ ಮುಖಾಮುಖಿ ಮಾತನಾಡದಷ್ಟು ದೂರವಾಗಿದ್ದು, ಇದು ಡ್ರೆಸ್ಸಿಂಗ್ ರೂಮ್‌ನಲ್ಲಿ ಆತಂಕದ ವಾತಾವರಣ ಸೃಷ್ಟಿಸಿದೆ. ಭಾರತ ತಂಡವು ಜಪಾನ್‌ನಲ್ಲಿ ನಡೆದ ಏಷ್ಯನ್ ಗೇಮ್ಸ್‌ನಲ್ಲಿ ಸತತ ಎರಡನೇ ಬಾರಿಗೆ ಚಿನ್ನದ ಪದಕ ಗೆದ್ದ ನಂತರ, ಬಿಸಿಒಐ (BCCI) ಜೊತೆ ನಡೆದ ಪರಿಶೀಲನಾ ಸಭೆಯಲ್ಲಿ ನಾಯಕತ್ವ ಬದಲಾವಣೆ ಅನಿವಾರ್ಯ ಎಂಬ ಮುನ್ಸೂಚನೆ ಸಿಕ್ಕಿದ್ದರಿಂದ ಹರ್ಮನ್‌ಪ್ರೀತ್ ತಮ್ಮ ಹುದ್ದೆಗೆ ರಾಜೀನಾಮೆ ನೀಡಿದ್ದಾರೆ.
ಆಯ್ಕೆ ಮಂಡಳಿ ನಿರ್ಧಾರಕ್ಕೆ ಅಸಮಾಧಾನ: ಕಳೆದ ವರ್ಷ ಭಾರತ ಏಕದಿನ ವಿಶ್ವಕಪ್ ಗೆದ್ದು ಇತಿಹಾಸ ಬರೆದಾಗ ಹಾಗೂ ಇತ್ತೀಚೆಗೆ ನಡೆದ ಟಿ೨೦ ವಿಶ್ವಕಪ್‌ಗಳಲ್ಲಿ ತಂಡ ಮುಂಚಿತವಾಗಿ ನಿರ್ಗಮಿಸಿದಾಗ ನಾಯಕತ್ವ ಬದಲಾಯಿಸಬೇಕಿತ್ತು ಎಂಬ ಮಾತುಗಳು ಕೇಳಿಬಂದಿದ್ದವು. ಮಾಜಿ ನಾಯಕಿ ಮಿಥಾಲಿ ರಾಜ್ ಕೂಡ ಎರಡು-ಮೂರು ವರ್ಷಗಳ ಹಿಂದೆಯೇ ಮಂಧನಾಗೆ ಏಕದಿನ ತಂಡದ ನಾಯಕತ್ವ ನೀಡಬೇಕಿತ್ತು ಎಂದು ಅಭಿಪ್ರಾಯಪಟ್ಟಿದ್ದರು.
೩೭ ವರ್ಷದ ಹರ್ಮನ್‌ಪ್ರೀತ್ ಕೌರ್ ಇನ್ನೂ ೨-೩ ವರ್ಷಗಳ ಕಾಲ ಆಟಗಾರ್ತಿಯಾಗಿ ಮುಂದುವರಿಯಲು ಬಯಸಿದ್ದು, ೩೦ ವರ್ಷದ ಸ್ಮೃತಿ ಮಂಧನಾ ನಾಯಕಿಯಾಗಿ ತಂಡವನ್ನು ಹೇಗೆ ಮುನ್ನಡೆಸಲಿದ್ದಾರೆ ಹಾಗೂ ಇಬ್ಬರ ನಡುವಿನ ಈ ವೈಮನಸ್ಸು ತಂಡದ ಪ್ರದರ್ಶನದ ಮೇಲೆ ಹೇಗೆ ಪರಿಣಾಮ ಬೀರಲಿದೆ ಎಂಬುದನ್ನು ಕಾದುನೋಡಬೇಕಿದೆ.
