‘ನಮಗೆ ನಿಮ್ಮ ಬಗ್ಗೆ ಹೆಮ್ಮೆ ಇದೆ’: ಫ್ಲೈದುಬೈ ಪೈಲಟ್ ಕ್ಯಾಪ್ಟನ್ ಸ್ಮಿತ್ ಮಚ್ಚಾರ್ ಭೇಟಿಯಾದ ದುಬೈ ಯುವರಾಜ

ದುಬೈನ ಯುವರಾಜ ಶೇಖ್ ಹಮ್ದಾನ್ ಬಿನ್ ಮೊಹಮ್ಮದ್ ಬಿನ್ ರಶೀದ್ ಅಲ್ ಮಕ್ತೂಮ್ ಅವರು ಶನಿವಾರ ಫ್ಲೈದುಬೈ ಪೈಲಟ್ ಕ್ಯಾಪ್ಟನ್ ಸ್ಮಿತ್ ಮಚ್ಚಾರ್ ಅವರನ್ನು ಭೇಟಿಯಾದರು.

ಈ ವಾರ ನಡೆದ ಘಟನೆಯೊಂದರಲ್ಲಿ, ಓಮಾನಿ ಸಹ-ಪೈಲಟ್ ವಿಮಾನವನ್ನು ಪತನಗೊಳಿಸಲು ಪ್ರಯತ್ನಿಸಿದಾಗ, ಮಚ್ಚಾರ್ ಅವರ ಸಾಹಸಮಯ ಕಾರ್ಯವು ದೊಡ್ಡ ದುರಂತವನ್ನು ತಪ್ಪಿಸಿತು ಮತ್ತು 174 ಜನರ ಪ್ರಾಣ ಉಳಿಸಲು ನೆರವಾಯಿತು.

ಯುಎಇಯ ಉಪ ಪ್ರಧಾನಿ ಮತ್ತು ರಕ್ಷಣಾ ಸಚಿವರೂ ಆಗಿರುವ ಮಕ್ತೂಮ್, 39 ವರ್ಷದ ಮಚ್ಚಾರ್ ಅವರೊಂದಿಗಿನ ಭೇಟಿಯ ಫೋಟೋಗಳನ್ನು ‘ಎಕ್ಸ್’ (ಹಿಂದಿನ ಟ್ವಿಟರ್) ವೇದಿಕೆಯಲ್ಲಿ ಹಂಚಿಕೊಂಡರು. ದೇಶದ ಸಂಪೂರ್ಣ ನಾಯಕತ್ವವು ಅವರ ಬಗ್ಗೆ ‘ಮೆಚ್ಚುಗೆ ಮತ್ತು ಪ್ರಶಂಸೆ’ಯನ್ನು ಹೊಂದಿದೆ ಎಂದು ಅವರು ಹೇಳಿದ್ದಾರೆ.

“ಅತ್ಯುನ್ನತ ಮಟ್ಟದ ಧೈರ್ಯ, ಜವಾಬ್ದಾರಿ ಮತ್ತು ಮಾನವ ಜೀವದ ಬಗ್ಗೆ ಕಾಳಜಿಯನ್ನು ಪ್ರದರ್ಶಿಸಿದ ಫ್ಲೈದುಬೈ ಪೈಲಟ್ ಕ್ಯಾಪ್ಟನ್ ಸ್ಮಿತ್ ಮಚ್ಚಾರ್ ಅವರ ಭೇಟಿಯ ಸಂದರ್ಭದಲ್ಲಿ” ಎಂದು ಮಕ್ತೂಮ್ ಫೋಟೋ ಹಂಚಿಕೊಂಡಿದ್ದಾರೆ.

“ಅವರು ನಮ್ಮ ತಂಡದ ಭಾಗವಾಗಿರುವುದಕ್ಕೆ… ನಮ್ಮ ರಾಷ್ಟ್ರದ ಕಥೆಯ ಭಾಗವಾಗಿರುವುದಕ್ಕೆ… ಮತ್ತು ಯುಎಇ ಯಾವುದನ್ನು ಪ್ರತಿನಿಧಿಸುತ್ತದೆಯೋ ಅದರ ಭಾಗವಾಗಿರುವುದಕ್ಕೆ ನಮಗೆ ಹೆಮ್ಮೆ ಇದೆ… ಅದು ಸಹಾನುಭೂತಿಯ ರಾಷ್ಟ್ರ… ಶಾಂತಿಯ ರಾಷ್ಟ್ರ… ಮತ್ತು ಜೀವವನ್ನು ಗೌರವಿಸುವ ರಾಷ್ಟ್ರ,” ಎಂದು ತಿಳಿಸಿದ್ದಾರೆ.

ಮಚ್ಚಾರ್ ಅವರ ಸಾಹಸದಿಂದ ತಪ್ಪಿದ ದೊಡ್ಡ ದುರಂತ

ಬುಧವಾರ ದುಬೈನಿಂದ ಇಸ್ರೇಲ್‌ ನ ಟೆಲ್ ಅವೀವ್‌ಗೆ ಪ್ರಯಾಣಿಸುತ್ತಿದ್ದ FZ1073 ವಿಮಾನದಲ್ಲಿ, ಓಮಾನಿ ಸಹ-ಪೈಲಟ್ (ಅಲ್ ಅರೇಬಿಯಾ ಇಂಗ್ಲಿಷ್ ವರದಿಯ ಪ್ರಕಾರ ಹಮ್ಮಮ್ ಅಲ್-ಹಮ್ಮಮಿ ಎಂದು ಗುರುತಿಸಲಾಗಿದೆ) ಮಚ್ಚಾರ್ ಅವರ ಮೇಲೆ ಹಲ್ಲೆ ನಡೆಸಿ ಗಂಭೀರವಾಗಿ ಗಾಯಗೊಳಿಸಿದ್ದರು. ಗಾಯಗೊಂಡಿದ್ದರೂ ಸಹ, ಮಚ್ಚಾರ್ ಅವರು ವಿಮಾನವನ್ನು ಪತನಗೊಳಿಸುವ ಅಲ್-ಹಮ್ಮಮಿ ಅವರ ಪ್ರಯತ್ನವನ್ನು ವಿಫಲಗೊಳಿಸಿದರು.

ಅವರ ಧೈರ್ಯಕ್ಕಾಗಿ ಪ್ರಧಾನಿ ನರೇಂದ್ರ ಮೋದಿ ಕೂಡ ಅವರನ್ನು ಶ್ಲಾಘಿಸಿದರು ಮತ್ತು ನಂತರ ಅವರೊಂದಿಗೆ ಹಾಗೂ ಅವರ ಕುಟುಂಬದ ಸದಸ್ಯರೊಂದಿಗೆ ಮಾತನಾಡಿದರು. ಇದಲ್ಲದೆ, ಶಾಂತಿಕಾಲದ ಭಾರತದ ಅತ್ಯುನ್ನತ ಮಿಲಿಟರಿ ಗೌರವ ಪ್ರಶಸ್ತಿಯಾದ ‘ಅಶೋಕ ಚಕ್ರ’ವನ್ನು ಮಚ್ಚಾರ್ ಅವರಿಗೆ ನೀಡಬೇಕೆಂದು ಅನೇಕರು ಒತ್ತಾಯಿಸುತ್ತಿದ್ದಾರೆ.

ಇಬ್ಬರು ಮಕ್ಕಳ ತಂದೆಯಾಗಿರುವ ಈ ಫ್ಲೈದುಬೈ ಪೈಲಟ್‌ ಗೆ ಧೈರ್ಯ ಪ್ರಶಸ್ತಿಯನ್ನು ನೀಡುವಂತೆ ಕೋರಿ ಪೈಲಟ್‌ಗಳ ಸಂಘಟನೆಯಾದ ‘ಫೆಡರೇಶನ್ ಆಫ್ ಇಂಡಿಯನ್ ಪೈಲಟ್ಸ್’ (FIP) ಪ್ರಧಾನಿ ಮೋದಿಯವರಿಗೆ ಪತ್ರ ಬರೆದಿದೆ. “ಕ್ಯಾಪ್ಟನ್ ಸ್ಮಿತ್ ಅವರು ತಮ್ಮ ಕರ್ತವ್ಯವನ್ನು ನಿರ್ವಹಿಸಿದ ಸಂದರ್ಭಗಳು ವಿಶೇಷ ಮನ್ನಣೆಗೆ ಅರ್ಹವಾಗಿವೆ,” ಎಂದು FIPಯ ಅಧ್ಯಕ್ಷರಾದ ಕ್ಯಾಪ್ಟನ್ ಸಿ.ಎಸ್. ರಂಧಾವಾ ಅವರು ಬರೆದ ಪತ್ರದಲ್ಲಿ ತಿಳಿಸಲಾಗಿದೆ.

“ತೀವ್ರವಾಗಿ ಗಾಯಗೊಂಡಿದ್ದರೂ ಮತ್ತು ವಿಮಾನದ ಕಾಕ್‌ ಪಿಟ್‌ ನಲ್ಲಿ ಅತ್ಯಂತ ಅಪಾಯಕಾರಿ ಪರಿಸ್ಥಿತಿಯನ್ನು ಎದುರಿಸುತ್ತಿದ್ದರೂ, ಕ್ಯಾಪ್ಟನ್ ಸ್ಮಿತ್ ಅವರು ‘ಪೈಲಟ್-ಇನ್-ಕಮಾಂಡ್’ (ಮುಖ್ಯ ಪೈಲಟ್) ಆಗಿ ತಮ್ಮ ಜವಾಬ್ದಾರಿಗಳನ್ನು ನಿರ್ವಹಿಸುವುದನ್ನು ಮುಂದುವರಿಸಿದರು” ಎಂದು ಅದರಲ್ಲಿ ಹೇಳಲಾಗಿದೆ. “ಧೈರ್ಯ ಮತ್ತು ಕರ್ತವ್ಯನಿಷ್ಠೆಯ ಈ ಅಸಾಧಾರಣ ಕಾರ್ಯವನ್ನು ಭಾರತ ಸರ್ಕಾರವು ಗುರುತಿಸಿದರೆ ಫೆಡರೇಶನ್‌ಗೆ ಗೌರವವೆನಿಸುತ್ತದೆ” ಎಂದು ತಿಳಿಸಲಾಗಿದೆ.