ರಾತ್ರೋರಾತ್ರಿ ಸೋಷಿಯಲ್ ಮೀಡಿಯಾದಲ್ಲಿ ‘ನ್ಯಾಷನಲ್ ಕ್ರಶ್’ ಎನಿಸಿಕೊಳ್ಳುವುದು, ಸಾವಿರಾರು ಹೊಸ ಫಾಲೋವರ್ಸ್ ಹಾಗೂ ಪ್ರಶಂಸೆಗಳ ಸುರಿಮಳೆಯಾಗುವುದು ಯಾರಿಗೆ ತಾನೇ ಇಷ್ಟವಿಲ್ಲ? ಆದರೆ, ಈ ಆನ್‌ಲೈನ್ ಜನಪ್ರಿಯತೆಯ ಹಿಂದೆ ಅಷ್ಟೇ ಕಿರಿಕಿರಿ ಮತ್ತು ಕರಾಳ ಮುಖವೂ ಅಡಗಿರುತ್ತದೆ ಎಂಬುದಕ್ಕೆ ಹಿಂದಿ ಮತ್ತು ಮರಾಠಿ ಚಿತ್ರರಂಗದ ಖ್ಯಾತ ನಟಿ ಗಿರಿಜಾ ಓಕ್ ಅವರ ಜೀವನದಲ್ಲಿ ನಡೆದ ಘಟನೆಯೇ ಸಾಕ್ಷಿ.
ಹಿಂದಿ ಹಾಗೂ ಮರಾಠಿ ಚಿತ್ರರಂಗದಲ್ಲಿ ಕಳೆದ ಎರಡು ದಶಕಗಳಿಂದ ಸಕ್ರಿಯರಾಗಿರುವ ಗಿರಿಜಾ ಓಕ್, ಇತ್ತೀಚೆಗೆ ತಮ್ಮ ಬೋಲ್ಡ್ ಫೋಟೋಶೂಟ್ ಒಂದರ ಮೂಲಕ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಸದ್ದು ಮಾಡಿದ್ದರು. ಅವರ ಸೌಂದರ್ಯವನ್ನು ಹಾಲಿವುಡ್ ನಟಿ ಸಿಡ್ನಿ ಸ್ವೀನಿಗೆ ಹೋಲಿಸಿದ್ದ ನೆಟ್ಟಿಗರು, ಅವರನ್ನು ‘ಇಂಡಿಯಾಸ್ ಸಿಡ್ನಿ ಸ್ವೀನಿ’ ಎಂದೇ ಕರೆದಿದ್ದರು. ಆದರೆ, ಈ ಪ್ರಶಂಸೆಗಳ ಬೆನ್ನಲ್ಲೇ ನಟಿಗೆ ಕಹಿ ಅನುಭವಗಳ ಸರಣಿಯೇ ಎದುರಾಗಿದೆ.
ಇನ್‌ಬಾಕ್ಸ್‌ನಲ್ಲಿ ಅಸಭ್ಯ ಪ್ರಶ್ನೆಗಳು ಹಾಗೂ ವಿಕೃತ ಸಂದೇಶಗಳು
‘ದಿ ಲಲ್ಲೂನ್ ಟಾಪ್’ ನೀಡಿದ ಹಳೆಯ ಸಂದರ್ಶನವೊಂದರಲ್ಲಿ ಗಿರಿಜಾ ಓಕ್, ತಮ್ಮ ಫೋಟೋಗಳು ವೈರಲ್ ಆದ ನಂತರ ಸಾಮಾಜಿಕ ಜಾಲತಾಣಗಳ ಇನ್‌ಬಾಕ್ಸ್‌ನಲ್ಲಿ ಎದುರಾದ ಮಾನಸಿಕ ಕಿರುಕುಳದ ಬಗ್ಗೆ ಮುಕ್ತವಾಗಿ ಮಾತನಾಡಿದ್ದಾರೆ. ಅಪರಿಚಿತ ವ್ಯಕ್ತಿಗಳು ಗಡಿ ಮೀರಿ ಅಸಭ್ಯ ಪ್ರಸ್ತಾವನೆಗಳನ್ನು ಕಳುಹಿಸಲು ಪ್ರಾರಂಭಿಸಿದ್ದರು ಎಂದು ನಟಿ ಬಹಿರಂಗಪಡಿಸಿದ್ದಾರೆ.
“ಒಬ್ಬ ವ್ಯಕ್ತಿ ನನಗೆ ಒಂದು ಅವಕಾಶ ನೀಡಿದರೆ ನಿನಗಾಗಿ ಏನು ಬೇಕಾದರೂ ಮಾಡಲು ಸಿದ್ಧ ಎಂದು ಬರೆದಿದ್ದ. ಇನ್ನು ಕೆಲವರಂತೂ ‘ನಿಮ್ಮೊಂದಿಗೆ ಒಂದು ಗಂಟೆ ಕಳೆಯಲು ರೇಟ್ ಎಷ್ಟು?’ ಎಂದು ನೇರವಾಗಿಯೇ ಕೇಳಿ ಆಘಾತ ಉಂಟುಮಾಡಿದ್ದರು” ಎಂದು ಗಿರಿಜಾ ಓಕ್ ತಮ್ಮ ಅಳಲನ್ನು ತೋಡಿಕೊಂಡಿದ್ದಾರೆ.
ಆನ್‌ಲೈನ್ ಹಾಗೂ ಆಫ್‌ಲೈನ್ ನಡವಳಿಕೆಯ ದ್ವಿಮುಖ ನೀತಿ
ಇಂತಹ ವಿಕೃತ ಸಂದೇಶಗಳು ತಮಗೆ ಹೊಸದೇನಲ್ಲ ಎಂದಿರುವ ನಟಿ, ಜನರ ದ್ವಿಮುಖ ನೀತಿಯನ್ನು ಕಟುವಾಗಿ ವಿಮರ್ಶಿಸಿದ್ದಾರೆ. “ಸ್ಕ್ರೀನ್ ಹಿಂದಿ ಕುಳಿತು ಅಸಭ್ಯ ಕಾಮೆಂಟ್ ಮಾಡುವ ಹಾಗೂ ಅಶ್ಲೀಲ ಮೆಸೇಜ್ ಕಳುಹಿಸುವ ವ್ಯಕ್ತಿಗಳು, ನಿಜ ಜೀವನದಲ್ಲಿ ಎದುರಿಗೆ ಸಿಕ್ಕಾಗ ನನ್ನ ಕಣ್ಣಲ್ಲಿ ಕಣ್ಣಿಟ್ಟು ನೋಡುವ ಧೈರ್ಯವನ್ನೂ ತೋರುವುದಿಲ್ಲ. ನೇರವಾಗಿ ಸಿಕ್ಕಾಗ ಅತ್ಯಂತ ಗೌರವದಿಂದ ಹಾಗೂ ಪ್ರೀತಿಯಿಂದ ನಡೆದುಕೊಳ್ಳುವ ಜನರೇ, ಜಾಲತಾಣಗಳಲ್ಲಿ ಮೊಬೈಲ್ ಸ್ಕ್ರೀನ್ ಹಿಂದೆ ಅಡಗಿ ಇಂತಹ ವಿಕೃತ ಮನಸ್ಥಿತಿ ಪ್ರದರ್ಶಿಸುತ್ತಾರೆ” ಎಂದು ಅವರು ಹೇಳಿದ್ದಾರೆ.
2007ರ ಪ್ರಸಿದ್ಧ ಚಿತ್ರ ‘ತಾರೆ ಜಮೀನ್ ಪರ್’, ‘ಶೋರ್ ಇನ್ ದಿ ಸಿಟಿ’ (2010), ‘ಲೇಡೀಸ್ ಸ್ಪೆಷಲ್’ (2011) ಹಾಗೂ ‘ಮಾಡೆರ್ನ್ ಲವ್: ಮುಂಬೈ’ (2022) ಸೇರಿದಂತೆ ಹಲವು ಉತ್ತಮ ಸಿನಿಮಾಗಳು ಮತ್ತು ಸರಣಿಗಳಲ್ಲಿ ನಟಿಸಿರುವ ಗಿರಿಜಾ ಓಕ್ ಅವರ ಈ ಅನುಭವವು, ಇಂಟರ್ನೆಟ್‌ನಲ್ಲಿ ಸಿಗುವ ಉಚಿತ ಅನಾಮಧೇಯತೆಯು ಜನರ ವಿಕೃತ ಮನಸ್ಥಿತಿಗೆ ಹೇಗೆ ವೇದಿಕೆಯಾಗುತ್ತದೆ ಎಂಬುದಕ್ಕೆ ಸ್ಪಷ್ಟ ಉದಾಹರಣೆಯಾಗಿದೆ.
