ಬೆಂಗಳೂರು: ‘ಬಿಗ್ ಬಾಸ್ ಕನ್ನಡ ಸೀಸನ್ 13’ರಲ್ಲಿ ತಾಂಡವ್ ರಾಮ್ ಮತ್ತೆ ಮನೆಗೆ ಬಂದಿದ್ದಾರೆ. ಆದರೆ ಈ ಬಾರಿ ಅವರು ಸಾಮಾನ್ಯ ಸ್ಪರ್ಧಿಯಾಗಿ ಎಂಟ್ರಿ ಕೊಟ್ಟಿಲ್ಲ. ನೇರವಾಗಿ ಮನೆಯ ಕ್ಯಾಪ್ಟನ್ ಆಗಿ ದೊಡ್ಮನೆ ಪ್ರವೇಶಿಸಿದ್ದಾರೆ. ಈ ಅಚ್ಚರಿಯ ಬೆಳವಣಿಗೆ ಮನೆಯ ಇತರ ಸ್ಪರ್ಧಿಗಳಿಗೆ ಶಾಕ್ ನೀಡಿದೆ.
ಮಿಡ್‌ವೀಕ್ ಎಕ್ಸಿಟ್ ಬಳಿಕ ವಾಪಸ್
ಮೂರನೇ ವಾರದಲ್ಲಿ ನಡೆದ ಎಮರ್ಜೆನ್ಸಿ ಎಲಿಮಿನೇಷನ್‌ನಲ್ಲಿ ಕ್ಯಾಪ್ಟನ್ ಸಂಗೀತಾ ಭಟ್ ಅವರನ್ನು ಹೊರತುಪಡಿಸಿ ಉಳಿದ ಸ್ಪರ್ಧಿಗಳು ನಾಮಿನೇಟ್ ಆಗಿದ್ದರು. ಕಡಿಮೆ ಮತಗಳ ಕಾರಣ ತಾಂಡವ್ ರಾಮ್ ಮನೆಯಿಂದ ಹೊರಬಂದಿದ್ದರು.
ತಾಂಡವ್ ಹೊರಹೋಗುವಾಗ ಅವರ ಆಪ್ತ ಗೆಳೆಯ ಗಗನ್ ಚಿನ್ನಪ್ಪ, ಕಾವ್ಯಾ ಗೌಡ ಹಾಗೂ ಸಂಗೀತಾ ಭಟ್ ಭಾವುಕರಾಗಿದ್ದರು. ಗಗನ್ ಅವರು ತಾಂಡವ್ ಅವರನ್ನು ಮನೆಯಿಂದ ಕಳುಹಿಸಬಾರದು ಎಂದು ಬಿಗ್ ಬಾಸ್ ಬಳಿ ಮನವಿ ಕೂಡ ಮಾಡಿದ್ದರು.
ವಾರಾಂತ್ಯದ ‘ಕಿಚ್ಚನ ಪಂಚಾಯಿತಿ’ ವೇಳೆ ಸುದೀಪ್ ಅವರು ತಾಂಡವ್‌ಗೆ, ನಿಮ್ಮ ಆಟ ಇನ್ನೂ ಮುಗಿದಿಲ್ಲ ಎಂಬ ಸೂಚನೆ ನೀಡಿದ್ದರು. ಇದಾದ ಬಳಿಕ ತಾಂಡವ್ ಮತ್ತೆ ಯಾವಾಗ ಮನೆಗೆ ಬರುತ್ತಾರೆ ಎಂಬ ಕುತೂಹಲ ವೀಕ್ಷಕರಲ್ಲಿತ್ತು.
ಮಾಸ್ಕ್ ತೆಗೆದಾಗ ಗೊತ್ತಾದ ಸರ್ಪ್ರೈಸ್
ನಾಲ್ಕನೇ ವಾರದಲ್ಲಿ ತಾಂಡವ್ ಅವರ ರೀ-ಎಂಟ್ರಿ ನಡೆದಿದೆ. ಬಿಗ್ ಬಾಸ್ ಮನೆಯವರಿಗೆ ಹೊಸ ಕ್ಯಾಪ್ಟನ್ ಬಗ್ಗೆ ಮಾಹಿತಿ ನೀಡಿದ್ದು, ಕ್ಯಾಪ್ಟನ್ ರೂಮ್‌ನಲ್ಲಿ ಮಾಸ್ಕ್ ಹಾಕಿಕೊಂಡು ಕುಳಿತಿದ್ದ ತಾಂಡವ್ ಅವರನ್ನು ಮನೆಯೊಳಗೆ ಪರಿಚಯಿಸಿದ್ದಾರೆ.
ಮಾಸ್ಕ್ ತೆಗೆದ ತಾಂಡವ್ ಅವರನ್ನು ನೋಡುತ್ತಿದ್ದಂತೆ ಮನೆಯ ಸ್ಪರ್ಧಿಗಳು ಅಚ್ಚರಿಗೊಂಡಿದ್ದಾರೆ. ಗಗನ್ ಚಿನ್ನಪ್ಪ ಮಾತ್ರ ಸ್ನೇಹಿತನನ್ನು ನೋಡಿ ಖುಷಿಯಾಗಿದ್ದಾರೆ. ತಾಂಡವ್ ಕೂಡ ಗಗನ್ ಅವರನ್ನು ತಬ್ಬಿಕೊಂಡಿದ್ದಾರೆ.
‘ನನ್ನಿಂದ ಒಳ್ಳೆತನ ನಿರೀಕ್ಷೆ ಮಾಡಬೇಡಿ’
ಮನೆಗೆ ಬಂದ ತಕ್ಷಣ ತಾಂಡವ್ ತಮ್ಮ ಆಟದ ಬಗ್ಗೆ ಸ್ಪಷ್ಟವಾಗಿ ಮಾತನಾಡಿದ್ದಾರೆ.“ತುಂಬಾ ಒಳ್ಳೆತನ ತೋರಿಸಿ ನೋವು, ಪೆಟ್ಟು ತಿಂದಿದ್ದೇನೆ. ಇನ್ಮೇಲೆ ಈ ಮನೆಯಲ್ಲಿ ನಾನು ಇರೋವರೆಗೂ ನನ್ನಿಂದ ಆ ಒಳ್ಳೆತನವನ್ನು ಎಕ್ಸ್‌ಪೆಕ್ಟ್ ಮಾಡಬೇಡಿ. ನ್ಯಾಯ, ನ್ಯಾಯ, ನಮ್ಮ ತಾಯಾಣೆ ನ್ಯಾಯ” ಎಂದು ತಾಂಡವ್ ಹೇಳಿದ್ದಾರೆ.
ತಮ್ಮ ಹಿಂದಿನ ಆಟಕ್ಕಿಂತ ಈ ಬಾರಿ ಬೇರೆಯ ರೀತಿಯಲ್ಲಿ ಆಡಲಿದ್ದಾರೆ ಎಂಬುದನ್ನು ಅವರ ಮಾತುಗಳು ಸೂಚಿಸಿವೆ.
ಕ್ಯಾಪ್ಟನ್ಸಿ ಟಾಸ್ಕ್ ರದ್ದು, ತಾಂಡವ್‌ಗೆ ಪಟ್ಟ
ಈ ವಾರ ಕ್ಯಾಪ್ಟನ್ಸಿ ಟಾಸ್ಕ್ ಕೂಡ ನಡೆದಿತ್ತು. ಆದರೆ ಲಿಖಿತ್ ಹಾಗೂ ಮಂಜ ಅವರ ಎಡವಟ್ಟಿನಿಂದಾಗಿ ಟಾಸ್ಕ್ ರದ್ದಾಗಿತ್ತು. ಇದರ ಬೆನ್ನಲ್ಲೇ ಬಿಗ್ ಬಾಸ್ ತಾಂಡವ್ ಅವರನ್ನು ಮನೆಯ ಹೊಸ ಕ್ಯಾಪ್ಟನ್ ಆಗಿ ಘೋಷಿಸಿದ್ದಾರೆ.
ಹೀಗಾಗಿ ಮಿಡ್‌ವೀಕ್ ಎಕ್ಸಿಟ್ ಬಳಿಕ ಮತ್ತೆ ಮನೆಗೆ ಬಂದಿರುವ ತಾಂಡವ್, ಈ ಬಾರಿ ಕ್ಯಾಪ್ಟನ್ ಸ್ಥಾನದಲ್ಲೇ ಆಟ ಮುಂದುವರಿಸಲಿದ್ದಾರೆ.
ತಾಂಡವ್ ಅವರ ಈ ಬದಲಾದ ಆಟ ಮುಂದಿನ ದಿನಗಳಲ್ಲಿ ಮನೆಯ ಇತರ ಸ್ಪರ್ಧಿಗಳ ಮೇಲೆ ಯಾವ ರೀತಿಯ ಪರಿಣಾಮ ಬೀರುತ್ತದೆ ಎಂಬುದು ಕುತೂಹಲ ಮೂಡಿಸಿದೆ. ವಿಶೇಷವಾಗಿ ಸಂಗೀತಾ ಭಟ್ ಸೇರಿದಂತೆ ಉಳಿದ ಸ್ಪರ್ಧಿಗಳೊಂದಿಗೆ ಅವರ ಮುಂದಿನ ನಡೆ ಹೇಗಿರಲಿದೆ ಎಂಬುದನ್ನು ಕಾದು ನೋಡಬೇಕಿದೆ.
