ಬಾಲಿವುಡ್ ನಟ ಗೋವಿಂದಾ ಹಾಗೂ ಅವರ ಪತ್ನಿ ಸುನಿತಾ ಅಹುಜಾ ಅವರ ವೈಯಕ್ತಿಕ ಜೀವನ ಮತ್ತೆ ಸುದ್ದಿಯಲ್ಲಿದೆ. ಗೋವಿಂದಾ ಹಾಗೂ ನಟಿ ಕೋಮಲ್ ರಾಣಿ ಸ್ವರ್ಣಕಾರ್ ನಡುವಿನ ಆಪ್ತತೆಯ ಬಗ್ಗೆ ಬಾಲಿವುಡ್‌ನಲ್ಲಿ ಹರಿದಾಡುತ್ತಿರುವ ವದಂತಿಗಳ ನಡುವೆಯೇ, ಇಬ್ಬರೂ ಇತ್ತೀಚೆಗೆ ಮುಂಬೈನ ಪ್ರಸಿದ್ಧ ಲಾಲ್‌ಬಾಗ್‌ಚಾ ರಾಜ ಗಣಪತಿ ಮಂಟಪಕ್ಕೆ ಭೇಟಿ ನೀಡಿ ದರ್ಶನ ಪಡೆದಿದ್ದರು. ವಿಶೇಷವೆಂದರೆ, ಗೋವಿಂದಾ ಆಗಮಿಸುವ ಕೆಲವೇ ಗಂಟೆಗಳ ಮೊದಲು ಸುನಿತಾ ಅಹುಜಾ ಸಹ ಅದೇ ಮಂಟಪಕ್ಕೆ ಭೇಟಿ ನೀಡಿದ್ದರು.
ಸುನಿತಾ ಅಹುಜಾ ನೀಡಿರುವ ಪ್ರತಿಕ್ರಿಯೆ: ಈ ಘಟನೆಯ ನಂತರ ಹರಿದಾಡುತ್ತಿರುವ ಸುದ್ದಿ ಹಾಗೂ ನಟಿ ಕೋಮಲ್ ರಾಣಿ ಬಗ್ಗೆ ಮಾಧ್ಯಮವೊಂದಕ್ಕೆ ಪ್ರತಿಕ್ರಿಯಿಸಿರುವ ಸುನಿತಾ ಅಹುಜಾ, “ನನಗೆ ಗೋವಿಂದಾ ಬಗ್ಗೆ ಆಗಲಿ ಅಥವಾ ಅವರ ಸಹನಟಿ ಬಗ್ಗೆಯಾಗಲಿ ಏನೂ ಹೇಳಲು ಇಷ್ಟವಿಲ್ಲ. ಅವರು ಸಂತೋಷವಾಗಿದ್ದಾರೆ ಎಂಬುದಷ್ಟೇ ನನಗೆ ಕಾಣಿಸುತ್ತಿದೆ. ದೇವರಿಗೆ ಅವರ ಮೇಲಿರಲಿ. ಅವರಿಗೆ ಹೇಗೆ ಜೀವನ ನಡೆಸಬೇಕೋ ಹಾಗೆ ನಡೆಸಲಿ” ಎಂದಿದ್ದಾರೆ.
ಮುಂದುವರಿದು ಮಾತನಾಡಿದ ಅವರು, “ನನಗೆ ಈ ವಿಷಯಗಳ ಮೇಲೆ ಗಮನ ಹರಿಸಲು ಇಷ್ಟವಿಲ್ಲ. ಅವರು ಎಲ್ಲೇ ಇರಲಿ, ಯಾರೊಂದಿಗೇ ಇರಲಿ, ಸಂತೋಷವಾಗಿರಲಿ ಎಂಬುದಷ್ಟೇ ನನ್ನ ಪ್ರಾರ್ಥನೆ. ನನ್ನ ಗಮನವೆಲ್ಲಾ ಪ್ರಸ್ತುತ ನನ್ನ ಕೆಲಸದ ಮೇಲಿದೆ. ಮತ್ತೆ ಮತ್ತೆ ಅನಗತ್ಯ ವಿವಾದಗಳಲ್ಲಿ ಸಿಲುಕಿಕೊಳ್ಳಲು ನನಗೆ ಇಷ್ಟವಿಲ್ಲ” ಎಂದು ಸ್ಪಷ್ಟಪಡಿಸಿದ್ದಾರೆ.
ಕೆಲ ದಿನಗಳ ಹಿಂದೆಯಷ್ಟೇ ನಟಿ ಕೋಮಲ್ ರಾಣಿ, ಸುನಿತಾ ಅಹುಜಾ ವಿರುದ್ಧ ಗಂಭೀರ ಆರೋಪಗಳನ್ನು ಮಾಡಿದ್ದರು. ಸುನಿತಾ ಅವರು ಗೋವಿಂದಾ ಅವರ ಜೀವನ ಹಾಳು ಮಾಡಲು ಯತ್ನಿಸುತ್ತಿದ್ದಾರೆ ಹಾಗೂ ತಾವೇನೂ ಒಡೆದ ಮನೆಗೆ ಪ್ರವೇಶಿಸಿದವರಲ್ಲ ಎಂದು ಹೇಳಿಕೆ ನೀಡಿದ್ದರು. ಈ ಬೆನ್ನಲ್ಲೇ ಸುನಿತಾ ಅವರ ಈ ಶಾಂತ ಪ್ರತಿಕ್ರಿಯೆ ಗಮನ ಸೆಳೆದಿದೆ.
