ಸಾಮಾನ್ಯವಾಗಿ ದೇವಸ್ಥಾನಗಳು, ಧಾರ್ಮಿಕ ಕಾರ್ಯಕ್ರಮಗಳು ಅಥವಾ ಭಜನಾ ಮಂದಿರಗಳಲ್ಲಿ ಭಕ್ತಿಗೀತೆಗಳನ್ನು ಕೇಳುತ್ತೇವೆ. ಆದರೆ ಇದೀಗ ಕನ್ಸರ್ಟ್ ಮಾದರಿಯ ವಾತಾವರಣದಲ್ಲಿ ಭಜನೆ, ಸಂಗೀತ, ಚಪ್ಪಾಳೆ ಮತ್ತು ನೃತ್ಯವನ್ನು ಒಟ್ಟಿಗೆ ಸೇರಿಸುವ ‘ಭಜನ್ ಕ್ಲಬ್ಬಿಂಗ್’ ಹೊಸ ರೀತಿಯ ಗಮನ ಸೆಳೆಯುತ್ತಿದೆ. ದೆಹಲಿಯಲ್ಲಿ ನಡೆದ ಇಂತಹ ಕಾರ್ಯಕ್ರಮದಲ್ಲಿ ಪ್ರಧಾನಿ ನರೇಂದ್ರ ಮೋದಿ ಕೂಡ ಭಾಗವಹಿಸಿ ಭಜನೆಯ ತಾಳಕ್ಕೆ ಚಪ್ಪಾಳೆ ತಟ್ಟಿದ್ದು ಸುದ್ದಿಯಾಗಿದೆ.
ಪ್ರಧಾನಿ ನರೇಂದ್ರ ಮೋದಿ ಅವರು ಶುಕ್ರವಾರ ದೆಹಲಿಯಲ್ಲಿ ನಡೆದ ‘ಭಜನ್ ಕ್ಲಬ್ಬಿಂಗ್’ ಕಾರ್ಯಕ್ರಮದಲ್ಲಿ ಪಾಲ್ಗೊಂಡರು. ಯುವಕರು ಒಂದೆಡೆ ಸೇರಿ ಕನ್ಸರ್ಟ್‌ನಂತಹ ವಾತಾವರಣದಲ್ಲಿ ಸಾಂಪ್ರದಾಯಿಕ ಹಿಂದೂ ಭಕ್ತಿಗೀತೆಗಳನ್ನು ಹಾಡುವುದು, ಚಪ್ಪಾಳೆ ತಟ್ಟುವುದು ಮತ್ತು ಸಂಗೀತದ ಲಯಕ್ಕೆ ಹೆಜ್ಜೆ ಹಾಕುವುದು ಈ ಕಾರ್ಯಕ್ರಮದ ವಿಶೇಷವಾಗಿತ್ತು.
ಬಿಜೆಪಿ ಕೇಂದ್ರ ಕಚೇರಿಯ ಎದುರಿನ ಉದ್ಯಾನವನದಲ್ಲಿ ದೀನ್ ದಯಾಳ್ ಉಪಾಧ್ಯಾಯ ಅವರ 110ನೇ ಜನ್ಮದಿನದ ಅಂಗವಾಗಿ ಕಾರ್ಯಕ್ರಮ ಆಯೋಜಿಸಲಾಗಿತ್ತು. ಹೆಚ್ಚಿನ ಸಂಖ್ಯೆಯಲ್ಲಿ ಯುವಕರು ಹಾಗೂ Gen Z ಸಮುದಾಯದವರು ಭಾಗವಹಿಸಿದ್ದರು.
https://x.com/narendramodi/status/2103505259301933209
ಕಾರ್ಯಕ್ರಮದ ಮೊದಲ ಸಾಲಿನಲ್ಲಿ ಕುಳಿತಿದ್ದ ಪ್ರಧಾನಿ ಮೋದಿ ಅವರು ಶ್ರೀರಾಮನ ಕುರಿತ ಭಜನೆಯೊಂದಕ್ಕೆ ತಾಳ ಹಾಕುತ್ತಾ ಚಪ್ಪಾಳೆ ತಟ್ಟಿದರು. ಇದೇ ವೇಳೆ ತಂಬೂರಿಯಂತಹ ವಾದ್ಯವನ್ನು ನುಡಿಸುತ್ತಿರುವುದು ಕೂಡ ಕಂಡುಬಂತು. ಪ್ರಧಾನಿ ಮೋದಿ ಅವರೊಂದಿಗೆ ಕಾರ್ಯಕ್ರಮದಲ್ಲಿದ್ದ ಯುವಕರೂ ಭಜನೆಗೆ ಧ್ವನಿಗೂಡಿಸಿದರು.
ಕಾರ್ಯಕ್ರಮದಲ್ಲಿ ‘ಶ್ರೀ ರಾಮ್ ಜೈ ರಾಮ್ ಜೈ ರಾಮ್’, ‘ಸೀತಾ ರಾಮ್’ ಸೇರಿದಂತೆ ಹಲವು ಭಜನೆಗಳನ್ನು ಹಾಡಲಾಯಿತು. ರಾಧೆ-ಕೃಷ್ಣ ಹಾಗೂ ಶ್ರೀರಾಮ-ಸೀತೆಗೆ ಸಂಬಂಧಿಸಿದ ಭಕ್ತಿಗೀತೆಗಳನ್ನೂ ಪ್ರಸ್ತುತಪಡಿಸಲಾಯಿತು.
ಸಾಂಪ್ರದಾಯಿಕ ಭಜನೆಗಳನ್ನು ಆಧುನಿಕ ಸಂಗೀತದ ಲಯದಲ್ಲಿ, ಕನ್ಸರ್ಟ್ ಮಾದರಿಯ ಉತ್ಸಾಹಭರಿತ ವಾತಾವರಣದಲ್ಲಿ ಪ್ರಸ್ತುತಪಡಿಸುವುದೇ ‘ಭಜನ್ ಕ್ಲಬ್ಬಿಂಗ್’ನ ವಿಶೇಷತೆ. ಯುವಜನರನ್ನು, ಅದರಲ್ಲೂ Gen Z ಅನ್ನು ಭಕ್ತಿಗೀತೆಗಳೊಂದಿಗೆ ಹೆಚ್ಚು ಸಂಪರ್ಕಿಸುವ ಉದ್ದೇಶದಿಂದ ಇಂತಹ ಕಾರ್ಯಕ್ರಮಗಳು ನಡೆಯುತ್ತಿವೆ.
ಕಾರ್ಯಕ್ರಮದಲ್ಲಿ ಯುವಕರು ಭಜನೆಗಳಿಗೆ ಚಪ್ಪಾಳೆ ತಟ್ಟುತ್ತಾ, ಹಾಡುತ್ತಾ ಹಾಗೂ ನೃತ್ಯ ಮಾಡುತ್ತಾ ಸಂಭ್ರಮಿಸಿದರು. ಮದ್ಯಪಾನವಿಲ್ಲದ ಕ್ಲಬ್‌ ಮಾದರಿಯ ವಾತಾವರಣದಲ್ಲಿ ಸಾಂಪ್ರದಾಯಿಕ ಭಕ್ತಿಗೀತೆಗಳನ್ನು ಪ್ರಸ್ತುತಪಡಿಸುವ ಈ ರೀತಿಯ ‘ಭಜನ್ ಕ್ಲಬ್ಬಿಂಗ್’ ಈಗ ಹೊಸ ಸಾಂಸ್ಕೃತಿಕ ಟ್ರೆಂಡ್ ಆಗಿ ಗಮನ ಸೆಳೆಯುತ್ತಿದೆ.ಕಾರ್ಯಕ್ರಮದ ಬಳಿಕ ಪ್ರಧಾನಿ ಮೋದಿ ಅವರು ‘ಭಜನ್ ಕ್ಲಬ್ಬಿಂಗ್’ ಅನುಭವವನ್ನು ‘ಅದ್ಭುತ’ ಎಂದು ಬಣ್ಣಿಸಿದರು.
