ರಣಬೀರ್ ಕಪೂರ್ ಅಭಿನಯದ ಬಿಗ್ ಬಜೆಟ್ ರಾಮಾಯಣ ಸಿನಿಮಾ ತೆರೆಗೆ ಬರುವ ಮುನ್ನವೇ ಅದೇ ಕಥಾಹಂದರ ಹೊಂದಿರುವ ‘ಮಹಾಕಾವ್ಯ ಶ್ರೀ ರಾಮಾಯಣ ಕಥಾ’ ಚಿತ್ರ ಚಿತ್ರಮಂದಿರಗಳಿಗೆ ಪ್ರವೇಶಿಸಿದೆ. ಲಾಕ್‌ಅಪ್ ಖ್ಯಾತಿಯ ಅಂಜಲಿ ಅರೋರಾ, ದೇವ್ ಶರ್ಮಾ ಮತ್ತು ರಜನೀಶ್ ದುಗ್ಗಲ್ ಪ್ರಮುಖ ಪಾತ್ರಗಳಲ್ಲಿ ನಟಿಸಿರುವ ಈ ಸಿನಿಮಾ ಶುಕ್ರವಾರ ತೆರೆಕಂಡಿದೆ. ಆದರೆ ಸಿನಿಮಾ ಬಿಡುಗಡೆಯ ಬೆನ್ನಲ್ಲೇ ಚಿತ್ರತಂಡ ಹಂಚಿಕೊಂಡ ಪೋಸ್ಟರ್ ಒಂದರ ಹಿನ್ನೆಲೆಯಲ್ಲಿ ನಟರೊಬ್ಬರು ಆಧುನಿಕ ಕನ್ನಡಕ ಧರಿಸಿರುವುದು ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಹಾಸ್ಯಕ್ಕೆ ಗ್ರಾಸವಾಗಿದೆ.
ಚಿತ್ರದಲ್ಲಿ ಸುಗ್ರೀವನ ಪಾತ್ರವನ್ನು ಪರಿಚಯಿಸುವ ಪೋಸ್ಟರ್ ಅನ್ನು ಬಿಡುಗಡೆ ಮಾಡಲಾಗಿತ್ತು. ಇದರಲ್ಲಿ ಹಿನ್ನೆಲೆಯಲ್ಲಿ ನಿಂತಿರುವ ಕ್ಯಾರೆಕ್ಟರ್‌ ಆರ್ಟಿಸ್ಟ್ ಒಬ್ಬರು ಚಶ್ಮಾ ಧರಿಸಿರುವುದು ಸ್ಪಷ್ಟವಾಗಿ ಕಾಣಿಸುತ್ತಿದೆ. ಇದನ್ನು ಗಮನಿಸಿದ ಜಾಲತಾಣಿಗರು ಟ್ರೋಲ್ ಮಾಡಲು ಶುರುಮಾಡಿದ್ದಾರೆ. “ತ್ರೇತಾಯುಗದಲ್ಲೂ ಕನ್ನಡಕ ಇತ್ತೇ?”, “ಎಡಿಟಿಂಗ್ ಮಾಡುವಾಗ ಕನಿಷ್ಠ ಇದನ್ನಾದರೂ ತೆಗೆಯಬಾರದಿತ್ತೇ?” ಎಂದೆಲ್ಲಾ ನೆಟ್ಟಿಗರು ಕಾಲೆಳೆಯುತ್ತಿದ್ದಾರೆ.
ಈ ಸಿನಿಮಾದ ಟೀಸರ್ ಬಿಡುಗಡೆಯಾದ ದಿನದಿಂದಲೂ ಇದರ ಪಾತ್ರವರ್ಗದ ಆಯ್ಕೆ ಬಗ್ಗೆ ಸಾಕಷ್ಟು ವಿರೋಧ ವ್ಯಕ್ತವಾಗಿತ್ತು. ವಿಶೇಷವಾಗಿ ‘ಕಚ್ಚಾ ಬದಾಮ್’ ವೈರಲ್ ಹಾಡಿನ ಮೂಲಕ ಪ್ರಸಿದ್ಧಿಗೆ ಬಂದಿದ್ದ ಅಂಜಲಿ ಅರೋರಾ ಅವರನ್ನು ಸೀತಾಮಾತೆಯ ಪಾತ್ರಕ್ಕೆ ಆಯ್ಕೆ ಮಾಡಿದ್ದಕ್ಕೆ ಪ್ರೇಕ್ಷಕರು ಅಸಮಾಧಾನ ವ್ಯಕ್ತಪಡಿಸಿದ್ದರು. ಈ ಟ್ರೋಲ್‌ಗಳಿಗೆ ಉತ್ತರಿಸಿದ್ದ ಅಂಜಲಿ, “ನಾವು ಸಾರ್ವಜನಿಕ ರಂಗದಲ್ಲಿರುವ ಕಲಾವಿದರು, ನಮ್ಮನ್ನು ವಿಮರ್ಶಿಸುವ ಹಕ್ಕು ಜನರಿಗಿದೆ. ಸೀತಾಮಾತೆಯ ಪಾತ್ರಕ್ಕೆ ನನ್ನ ಶೇಕಡಾ 100 ರಷ್ಟು ಶ್ರಮ ಹಾಕಿದ್ದೇನೆ” ಎಂದು ಹೇಳಿಕೊಂಡಿದ್ದರು. ಆದರೆ ಈಗ ಬಿಡುಗಡೆಯಾದ ಪೋಸ್ಟರ್‌ನ ಎಡವಟ್ಟು ಸಿನಿಮಾ ತಂಡಕ್ಕೆ ಮುಜುಗರ ತಂದಿಟ್ಟಿದೆ.
