ಬೆಂಗಳೂರು: ರಾಜ್ಯದಲ್ಲಿ ಈ ಬಾರಿ ಮಳೆ ಕೊರತೆಯಾಗಿ ಬರ ಆವರಿಸಿರುವ ಹಿನ್ನೆಲೆಯಲ್ಲಿ ಸಾರ್ವಜನಿಕರ ದಿನನಿತ್ಯದ ಜೀವನದ ಮೇಲೆ ತೀವ್ರ ಪೆಟ್ಟು ಬಿದ್ದಿದೆ. ಮಳೆ ಇಲ್ಲದೆ ಬೆಳೆಗಳು ನಾಶವಾಗಿ ಫಸಲು ರೈತನ ಕೈ ಸೇರದಿರುವುದು ಹಾಗೂ ಹಲವೆಡೆ ಕೃಷಿ ಚಟುವಟಿಕೆಗಳೇ ನಡೆಯದಿರುವುದು ಇಂದಿನ ಅಗತ್ಯ ವಸ್ತುಗಳ ಅಭಾವಕ್ಕೆ ಮುಖ್ಯ ಕಾರಣವಾಗಿದೆ. ಇದರ ನೇರ ಪರಿಣಾಮವಾಗಿ ಮಾರುಕಟ್ಟೆಯಲ್ಲಿ ತರಕಾರಿ ಸೇರಿದಂತೆ ದಿನಬಳಕೆಯ ವಸ್ತುಗಳ ದರ ನಿರಂತರವಾಗಿ ಏರಿಕೆಯಾಗುತ್ತಿದ್ದು, ಜನಸಾಮಾನ್ಯರ ಜೇಬಿಗೆ ದೊಡ್ಡ ಮಟ್ಟದ ಹೊರೆಯಾಗುತ್ತಿದೆ.
ಸಾಮಾನ್ಯವಾಗಿ ಪ್ರತಿ ವರ್ಷ ಸೆಪ್ಟೆಂಬರ್ ಮತ್ತು ಅಕ್ಟೋಬರ್ ತಿಂಗಳಲ್ಲಿ ಹೊಸ ಬೆಳೆ ಮಾರುಕಟ್ಟೆಗೆ ಲಗ್ಗೆ ಇಡುತ್ತಿದ್ದರಿಂದ ತರಕಾರಿ ದರ ಕಡಿಮೆಯಾಗಿ ಜನರಿಗೆ ಕೈಗೆಟುಕುವ ದರದಲ್ಲಿ ಸಿಗುತ್ತಿತ್ತು. ಆದರೆ ಈ ಬಾರಿ ಪರಿಸ್ಥಿತಿ ತದ್ವಿರುದ್ಧವಾಗಿದ್ದು, ಸೆಪ್ಟೆಂಬರ್‌ನಲ್ಲೇ ದರಗಳು ಗಗನಕ್ಕೇರುತ್ತಿವೆ. ಸದ್ಯ ಪ್ರತಿ ಕೆ.ಜಿ.ಗೆ ಬೆಳ್ಳುಳ್ಳಿ ದರ ಬರೋಬ್ಬರಿ 300 ರೂ. ದಾಟಿದ್ದರೆ, ಈರುಳ್ಳಿ 78 ರೂ., ನುಗ್ಗೆಕಾಯಿ ಹಾಗೂ ನಾಟಿ ಕ್ಯಾರೆಟ್ 70 ರೂ.ವರೆಗೆ ಮಾರಾಟವಾಗುತ್ತಿವೆ. ಇನ್ನು ಸೌತೆಕಾಯಿ (48-60 ರೂ.), ಮಂಗಳೂರು ಸೌತೆಕಾಯಿ (64 ರೂ.), ಬೀಟ್‌ರೂಟ್ (50 ರೂ.) ಹಾಗೂ ಆಲೂಗೆಡ್ಡೆ (46-50 ರೂ.) ದರವೂ ಹೆಚ್ಚಾಗಿದೆ. ಕಳೆದ ಕೆಲವು ದಿನಗಳಿಂದ ರಾಜ್ಯದ ಕೆಲವೆಡೆ ಬೀಳುತ್ತಿರುವ ಮಳೆ ಮುಂದೆಯೂ ಮುಂದುವರಿದರೆ ಮಾತ್ರ ದರ ಇಳಿಕೆಯಾಗಬಹುದು ಎಂಬುದು ವ್ಯಾಪಾರಿಗಳ ಆಶಯವಾಗಿದೆ.
ಮತ್ತೊಂದೆಡೆ ಸಿಹಿ ಪ್ರಿಯರಿಗೆ ಸಕ್ಕರೆ ದರ ಕೊಂಚ ಸಮಾಧಾನ ತಂದಿದ್ದರೂ, ಬೆಲ್ಲದ ದರ ಮಾತ್ರ ಗ್ರಾಹಕರಿಗೆ ಕಹಿಯಾಗಿ ಪರಿಣಮಿಸಿದೆ. ಕಬ್ಬಿನ ಇಳುವರಿ ಕುಸಿದಿರುವುದು ಮತ್ತು ಮಾರುಕಟ್ಟೆಗೆ ಬೆಲ್ಲದ ಪೂರೈಕೆ ಕಡಿಮೆಯಾಗಿರುವುದರಿಂದ ಬೆಲ್ಲದ ಬೆಲೆ ಏರಿಕೆಯ ಹಂತದಲ್ಲೇ ಮುಂದುವರಿದಿದ್ದು, ಪ್ರಸ್ತುತ ಮಾರುಕಟ್ಟೆಯಲ್ಲಿ ಕೆ.ಜಿ. ಬೆಲ್ಲದ ದರ 75 ರೂಪಾಯಿ ಗಡಿ ದಾಟಿದೆ. ಬೆಲೆ ಏರಿಕೆಯ ಈ ಸರಣಿ ಇನ್ನೂ ಕೆಲವು ದಿನಗಳ ಕಾಲ ಮುಂದುವರಿಯುವ ಸಾಧ್ಯತೆಯಿದ್ದು, ಜನರು ಸದ್ಯದ ಪರಿಸ್ಥಿತಿಯಲ್ಲಿ ಮನೆ ಖರ್ಚಿನ ಬಜೆಟ್ ಸರಿದೂಗಿಸಲು ಹೆಣಗಾಡುವಂತಾಗಿದೆ.
