ನವದೆಹಲಿ: ನಾವು ನಿತ್ಯ ಬಳಸುವ ಸಾಬೂನು, ಶ್ಯಾಂಪೂ, ಟೂತ್‌ಪೇಸ್ಟ್ ಹಾಗೂ ಮುಖಕ್ಕೆ ಹಚ್ಚುವ ಕ್ರೀಮ್‌ಗಳಲ್ಲಿ ಸಸ್ಯಾಹಾರಿ ಪದಾರ್ಥಗಳನ್ನು ಬಳಸಲಾಗಿದೆಯೇ ಅಥವಾ ಪ್ರಾಣಿಜನ್ಯ ಕೊಬ್ಬಿನಂತಹ ಮಾಂಸಾಹಾರಿ ಅಂಶಗಳು ಇವೆಯೇ ಎಂಬುದನ್ನು ಗುರುತಿಸುವುದು ಇನ್ಮುಂದೆ ಗ್ರಾಹಕರಿಗೆ ಮತ್ತಷ್ಟು ಸುಲಭವಾಗಲಿದೆ. ನಿತ್ಯ ಬಳಕೆಯ ಸೌಂದರ್ಯವರ್ಧಕಗಳು ಮತ್ತು ಶೌಚಾಲಯ ಸಾಮಗ್ರಿಗಳ (Cosmetics and Toiletries) ಮೇಲೆ ಸಸ್ಯಾಹಾರಿ ಹಾಗೂ ಮಾಂಸಾಹಾರಿ ಗುರುತುಗಳನ್ನು ಮುದ್ರಿಸುವುದನ್ನು ಕೇಂದ್ರ ಸರ್ಕಾರ ಕಡ್ಡಾಯಗೊಳಿಸಿದೆ.
ಈ ಸಂಬಂಧ ಕೇಂದ್ರ ಸರ್ಕಾರವು “ಲೀಗಲ್ ಮೆಟ್ರಾಲಜಿ 4ನೇ ತಿದ್ದುಪಡಿ ನಿಯಮಗಳು-2026” ಅನ್ನು ಅಧಿಸೂಚಿಸಿದ್ದು, ಈ ಹೊಸ ನಿಯಮಗಳು ತಕ್ಷಣದಿಂದಲೇ ಜಾರಿಗೆ ಬಂದಿವೆ.
ಇಲ್ಲಿಯವರೆಗೆ ಕೇವಲ ಆಹಾರ ಪದಾರ್ಥಗಳ ಪ್ಯಾಕೆಟ್‌ಗಳ ಮೇಲೆ ಮಾತ್ರ ಹಸಿರು ಮತ್ತು ಕೆಂಪು ಚುಕ್ಕೆಗಳನ್ನು ಕಾಣಲಾಗುತ್ತಿತ್ತು. ಇನ್ಮುಂದೆ ಆಹಾರೇತರ ದಿನಬಳಕೆಯ ವಸ್ತುಗಳ ಮೇಲೂ ಈ ಗುರುತುಗಳು ಇರಲಿವೆ.
ಹಸಿರು ಚುಕ್ಕೆ: ಸಂಪೂರ್ಣ ಸಸ್ಯಾಹಾರಿ ಪದಾರ್ಥಗಳಿಂದ ತಯಾರಾದ ಉತ್ಪನ್ನಗಳ ಮೇಲೆ ಮುದ್ರಿಸಲಾಗುತ್ತದೆ.
ಕೆಂಪು ಅಥವಾ ಕಂದು ಚುಕ್ಕೆ: ಪ್ರಾಣಿಜನ್ಯ ಕೊಬ್ಬು ಅಥವಾ ಮಾಂಸಾಹಾರಿ ಅಂಶಗಳನ್ನು ಬಳಸಿ ತಯಾರಿಸಿದ ಉತ್ಪನ್ನಗಳ ಮೇಲೆ ಕಡ್ಡಾಯವಾಗಿ ನಮೂದಿಸಬೇಕು.
ಗ್ರಾಹಕರಿಗೆ ಸುಲಭವಾಗಿ ಕಾಣುವಂತೆ ಪ್ಯಾಕೆಟ್‌ನ ಮುಂಭಾಗದ ಪ್ರಮುಖ ಭಾಗದಲ್ಲಿಯೇ (Principal Display Panel) ಈ ಗುರುತುಗಳನ್ನು ಮುದ್ರಿಸಬೇಕು ಎಂದು ಸರ್ಕಾರ ಸ್ಪಷ್ಟಪಡಿಸಿದೆ.
ಸಾಮಾನ್ಯವಾಗಿ ಹಲವು ಸಾಬೂನುಗಳು ಮತ್ತು ಸೌಂದರ್ಯವರ್ಧಕಗಳಲ್ಲಿ ಪ್ರಾಣಿಗಳ ಕೊಬ್ಬನ್ನು ಬಳಸಲಾಗುತ್ತದೆ. ಇದರಿಂದಾಗಿ ಕಟ್ಟುನಿಟ್ಟಿನ ಸಸ್ಯಾಹಾರಿಗಳು ಹಾಗೂ ನಿರ್ದಿಷ್ಟ ಧಾರ್ಮಿಕ ಮತ್ತು ನೈತಿಕ ನಂಬಿಕೆಗಳನ್ನು ಪಾಲಿಸುವ ಜನರು ಅರಿವಿಲ್ಲದೆಯೇ ಅವುಗಳನ್ನು ಬಳಸಿ ಮುಜುಗರಕ್ಕೊಳಗಾಗುತ್ತಿದ್ದರು. ಗ್ರಾಹಕರು ಖರೀದಿಸುವ ಉತ್ಪನ್ನಗಳ ಬಗ್ಗೆ ಸಂಪೂರ್ಣ ಪಾರದರ್ಶಕತೆ ಮತ್ತು ಸ್ಪಷ್ಟತೆ ಒದಗಿಸುವುದೇ ಕೇಂದ್ರದ ಈ ಹೊಸ ನಿಯಮದ ಮುಖ್ಯ ಉದ್ದೇಶವಾಗಿದೆ.
