ಕರ್ನಾಟಕ ಬೊಕ್ಕಸಕ್ಕೆ ಆರ್ಥಿಕ ಸಂಕಷ್ಟದ ಬಿಸಿ: ಸರ್ಕಾರಕ್ಕೆ ಹಣಕಾಸು ಇಲಾಖೆಯಿಂದ ಗಂಭೀರ ಎಚ್ಚರಿಕೆ

ಬೆಂಗಳೂರು: ರಾಜ್ಯದಲ್ಲಿ ಹೊಸ ಯೋಜನೆಗಳ ಆಡಂಬರದ ಘೋಷಣೆಗಳಿಗೆ ಬ್ರೇಕ್ ಹಾಕುವಂತೆ ಹಣಕಾಸು ಇಲಾಖೆಯು ಸರ್ಕಾರಕ್ಕೆ ಹಾಗೂ ಮುಖ್ಯಮಂತ್ರಿ ಡಿಕೆ ಶಿವಕುಮಾರ್ ಅವರಿಗೆ ಗಂಭೀರ ಸಲಹೆ ನೀಡಿದೆ. ನೂತನ ಯೋಜನೆಗಳನ್ನು ಪ್ರಕಟಿಸುವ ಮುನ್ನ ರಾಜ್ಯದ ಆರ್ಥಿಕ ವಾಸ್ತವಿಕತೆ ಮತ್ತು ಹಣಕಾಸಿನ ಲಭ್ಯತೆಯನ್ನು ಕಡ್ಡಾಯವಾಗಿ ಗಮನದಲ್ಲಿಟ್ಟುಕೊಳ್ಳಬೇಕು ಎಂದು ಇಲಾಖೆ ಸ್ಪಷ್ಟವಾಗಿ ಸೂಚಿಸಿದೆ. ಹೆಚ್ಚುವರಿ ಆದಾಯದ ಮೂಲಗಳನ್ನು ಕ್ರೂಢೀಕರಿಸದೆ ಹೊಸ ಯೋಜನೆಗಳನ್ನು ಅನುಷ್ಠಾನಗೊಳಿಸುವುದರಿಂದ ರಾಜ್ಯದ ಬೊಕ್ಕಸದ ಮೇಲೆ ತೀವ್ರ ಒತ್ತಡ ಬಿದ್ದಿದ್ದು, ದಿನನಿತ್ಯದ ವೇತನ ಹಾಗೂ ಸಬ್ಸಿಡಿ ಪಾವತಿಗೂ ನಗದು ಕೊರತೆ ಎದುರಾಗುತ್ತಿದೆ ಎಂದು ಆತಂಕ ವ್ಯಕ್ತಪಡಿಸಿದೆ.

FRBM ಕಾಯ್ದೆಯ ಮಿತಿಯಂಚಿನಲ್ಲಿ ಕರ್ನಾಟಕ: ವ್ಯಕ್ತವಾಯಿತು ಕಳವಳ

ಇದೇ ಪರಿಸ್ಥಿತಿ ಮುಂದುವರಿದರೆ 2026-27ರ ವೇಳೆಗೆ ರಾಜ್ಯದ ವಿತ್ತೀಯ ಕೊರತೆಯು ಶೇಕಡಾ 2.95ಕ್ಕೆ ತಲುಪಲಿದೆ ಎಂದು ಅಂದಾಜಿಸಲಾಗಿದೆ. ಕರ್ನಾಟಕ ಹಣಕಾಸು ಜವಾಬ್ದಾರಿ ಕಾಯ್ದೆ (FRBM) ಪ್ರಕಾರ ವಿತ್ತೀಯ ಕೊರತೆಯು ಶೇಕಡಾ 3ರ ಒಳಗಿರಬೇಕು. ಪ್ರಸ್ತುತ ರಾಜ್ಯವು ಈ ಗರಿಷ್ಠ ಮಿತಿಯ ತೀರಾ ಸಮೀಪಕ್ಕೆ ಬಂದು ತಲುಪಿದೆ. ಇನ್ನು ಮಾನದಂಡಗಳ ಪ್ರಕಾರ ರಾಜಸ್ವ (ಆದಾಯ) ಕೊರತೆಯು ಶೂನ್ಯವಾಗಿರಬೇಕಿತ್ತು. ಆದರೆ, ಪ್ರಸ್ತುತ ರಾಜ್ಯದಲ್ಲಿ ಬರೋಬ್ಬರಿ ₹22,957 ಕೋಟಿ ಆದಾಯದ ಕೊರತೆ ಕಂಡುಬಂದಿದ್ದು, ಇಲಾಖೆಗಳ ನೈಜ ಲೆಕ್ಕಾಚಾರವಿಲ್ಲದೆ ಯೋಜನೆಗಳನ್ನು ಪ್ರಕಟಿಸುವುದು ಅಪಾಯಕಾರಿ ಎಂದು ಆರ್ಥಿಕ ಇಲಾಖೆ ಎಚ್ಚರಿಸಿದೆ.

ತುದಿಯಲ್ಲಿ ನಿಂತಿದೆ ಸಾಲದ ಮಿತಿ: ಕೈಚೆಲ್ಲಿದ ಅಭಿವೃದ್ಧಿ ಸಾಮರ್ಥ್ಯ

ರಾಜ್ಯದ ಒಟ್ಟು ಸಾಲದ ಹೊಣೆಗಾರಿಕೆಯು ಜಿಎಸ್‌ಡಿಪಿಯ (GSDP) ಶೇಕಡಾ 24.94ಕ್ಕೆ ಏರಿಕೆಯಾಗಿದೆ. ಎಫ್‌ಆರ್‌ಬಿಎಮ್ ನಿಯಮಾವಳಿಗಳ ಪ್ರಕಾರ ಸಾಲದ ಗರಿಷ್ಠ ಮಿತಿ ಶೇಕಡಾ 25 ಆಗಿದೆ. ಕರ್ನಾಟಕವು ಈಗ ತನ್ನ ಸಾಲ ಪಡೆಯುವ ಸಾಮರ್ಥ್ಯವನ್ನು ಬಹುತೇಕ ಪೂರ್ಣ ಪ್ರಮಾಣದಲ್ಲಿ ಬಳಸಿಕೊಂಡಿದ್ದು, ಸಾಲದ ಗಡಿಯಂಚಿನಲ್ಲಿದೆ. ಇದರಿಂದಾಗಿ ಬೃಹತ್ ಪ್ರಮಾಣದ ಹೊಸ ಅಭಿವೃದ್ಧಿ ಯೋಜನೆಗಳಿಗೆ ಹಣಕಾಸಿನ ಅವಕಾಶ ತೀರಾ ಸೀಮಿತಗೊಂಡಿದ್ದು, ಸಾಲ ತಂದಾದರೂ ಯೋಜನೆ ನಡೆಸುತ್ತೇವೆ ಎನ್ನುವ ಸರ್ಕಾರದ ಹಾದಿ ಬಂದ್ ಆದಂತಾಗಿದೆ.

₹2 ಲಕ್ಷ ಕೋಟಿಗೂ ಅಧಿಕ ಹಳೆಯ ಕಾಮಗಾರಿಗಳ ಬಾಕಿ ಹೊರೆ

ರಾಜ್ಯದಲ್ಲಿ ಈಗಾಗಲೇ ಅನುಮೋದನೆಗೊಂಡು ಚಾಲನೆಯಲ್ಲಿರುವ ಹಾಗೂ ಬಾಕಿ ಇರುವ ವಿವಿಧ ಕಾಮಗಾರಿಗಳ ವೆಚ್ಚವೇ ಬರೋಬ್ಬರಿ ₹2 ಲಕ್ಷ ಕೋಟಿಗೂ ಅಧಿಕವಾಗಿದೆ. ಹಳೆಯ ಯೋಜನೆಗಳನ್ನು ಪೂರ್ಣಗೊಳಿಸಲೇ ಬೃಹತ್ ಪ್ರಮಾಣದ ಹಣದ ಅಗತ್ಯವಿರುವಾಗ, ಹೊಸ ಯೋಜನೆಗಳನ್ನು ಸೇರ್ಪಡೆಗೊಳಿಸಿ ಬಾಕಿ ಕಾಮಗಾರಿಗಳ ಹೊರೆಯನ್ನು ಮತ್ತಷ್ಟು ಹೆಚ್ಚಿಸಬೇಡಿ ಎಂದು ಸರ್ಕಾರಕ್ಕೆ ಹಣಕಾಸು ಇಲಾಖೆ ಖಡಕ್ ಸೂಚನೆ ನೀಡಿದೆ. ಹಳೆಯ ಹೊಣೆಗಾರಿಕೆಗಳನ್ನು ತೀರಿಸುವುದು ಈಗ ಸರ್ಕಾರಕ್ಕೆ ಬಹುದೊಡ್ಡ ಸವಾಲಾಗಿದೆ.

ಪ್ರಮುಖ 4 ಇಲಾಖೆಗಳಲ್ಲೇ ₹36,136 ಕೋಟಿ ಬಿಲ್ ಬಾಕಿ!

ಲೋಕೋಪಯೋಗಿ (PWD), ಜಲಸಂಪನ್ಮೂಲ, ಸಣ್ಣ ನೀರಾವರಿ ಹಾಗೂ ಗ್ರಾಮೀಣಾಭಿವೃದ್ಧಿ ಮತ್ತು ಪಂಚಾಯತ್ ರಾಜ್ (RDPR) ನಂತಹ ನಾಲ್ಕು ಪ್ರಮುಖ ಇಲಾಖೆಗಳಲ್ಲೇ ಹಳೆಯ ಕಾಮಗಾರಿಗಳ ಬಾಕಿ ಬಿಲ್ ಮೊತ್ತ ₹36,136 ಕೋಟಿ ದಾಟಿದೆ. ಸಾವಿರಾರು ಕೋಟಿ ರೂಪಾಯಿ ಪಾವತಿ ಬಾಕಿ ಉಳಿಸಿಕೊಂಡಿರುವಾಗ, 2026-27ರ ಮೊದಲ ಆರು ತಿಂಗಳಲ್ಲೇ ₹5,000 ಕೋಟಿಗೂ ಹೆಚ್ಚಿನ ಮೌಲ್ಯದ ಹೊಸ ಯೋಜನೆಗಳಿಗೆ ಅನುಮೋದನೆ ನೀಡಲಾಗಿದೆ. ಈ ಬಾಕಿಗಳ ನಡುವೆ ಹೊಸ ಯೋಜನೆಗಳಿಗೆ ಹಣ ಹೊಂದಿಸುವುದು ಅಸಾಧ್ಯದ ಮಾತಾಗಿದ್ದು, ಮುಂದಿನ ದಿನಗಳಲ್ಲಿ ರಾಜ್ಯದ ಆರ್ಥಿಕ ಸ್ಥಿತಿ ಮತ್ತಷ್ಟು ಹದಗೆಡದಂತೆ ಕಟ್ಟುನಿಟ್ಟಿನ ಆರ್ಥಿಕ ಶಿಸ್ತು ಪಾಲಿಸುವಂತೆ ಇಲಾಖೆ ಕಳವಳ ವ್ಯಕ್ತಪಡಿಸಿದೆ.