ಸಾಗರದ 'ಶರಾವತಿ ಅಭಯಾರಣ್ಯ'ದಲ್ಲಿ ಪ್ರವಾಸಿಗರ ಮೋಜು-ಮಸ್ತಿ, ಅಡುಗೆ: 'ಕಾರ್ಗಲ್ ಅರಣ್ಯಾಧಿಕಾರಿ'ಗಳಿಂದ ತನಿಖೆ ಚುರುಕು!

ಶಿವಮೊಗ್ಗ: ಜಿಲ್ಲೆಯ ಸಾಗರ ತಾಲೂಕಿನ ಪರಿಸರ ಸೂಕ್ಷ್ಮ ಪ್ರದೇಶವಾದ ಶರಾವತಿ ಕಣಿವೆ ಸಿಂಗಳೀಕ ಅಭಯಾರಣ್ಯ ವ್ಯಾಪ್ತಿಯಲ್ಲಿ ಪ್ರವಾಸಿಗರು ಅಕ್ರಮವಾಗಿ ಅಡುಗೆ ಮಾಡಿ, ಮೋಜು-ಮಸ್ತಿ ನಡೆಸಿದ ಗಂಭೀರ ಪ್ರಕರಣ ಬೆಳಕಿಗೆ ಬಂದಿದ್ದು, ತಪ್ಪಿತಸ್ಥರ ವಿರುದ್ಧ ಕಠಿಣ ಕಾನೂನು ಕ್ರಮ ಕೈಗೊಳ್ಳುವುದಾಗಿ ಕಾರ್ಗಲ್ ವನ್ಯಜೀವಿ ವಲಯ ಅರಣ್ಯಾಧಿಕಾರಿ ನವೀನ್ ಕುಮಾರ್.ಆರ್ ಎಚ್ಚರಿಕೆ ನೀಡಿದ್ದಾರೆ.

​ಸಾಮಾಜಿಕ ಜಾಲತಾಣಗಳಲ್ಲಿ ಫೋಟೋ ವೈರಲ್: ಘಟನೆಯ ವಿವರ

ಈ ಕುರಿತು ಪತ್ರಿಕಾ ಪ್ರಕಟಣೆಯಲ್ಲಿ ಮಾಹಿತಿ ಹಂಚಿಕೊಂಡಿರುವ RFO, ದಿನಾಂಕ 19-09-2026ರಂದು ಮಧ್ಯಾಹ್ನ ಸುಮಾರು 1:30ರ ವೇಳೆಗೆ ಪ್ರವಾಸಿಗರ ಗುಂಪೊಂದು ಸ್ಟವ್ ಮತ್ತು ಪಾತ್ರೆಗಳನ್ನು ಬಳಸಿಕೊಂಡು ಅಡುಗೆ ಮಾಡುತ್ತಿರುವ ಹಾಗೂ ಕೆಲವರು ಸುತ್ತಲೂ ಕುಳಿತುಕೊಂಡು ಬಾಟಲಿಗಳಲ್ಲಿ ಯಾವುದೋ ಪಾನೀಯ/ಮದ್ಯ ಸೇವಿಸುತ್ತಿರುವ ಫೋಟೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕವಾಗಿ ಹರಿದಾಡಿದ್ದವು. ಈ ವಿಚಾರ ಗಮನಕ್ಕೆ ಬರುತ್ತಿದ್ದಂತೆ ಅರಣ್ಯ ಇಲಾಖೆ ತಕ್ಷಣವೇ ಪರಿಶೀಲನೆ ಕೈಗೊಂಡಿದೆ ಎಂದಿದ್ದಾರೆ.

​ಲಾಂಚ್‌ಗೆ ಕಾಯುವ ವೇಳೆ ಹಿನ್ನೀರಿನ ಅಂಚಿನಲ್ಲಿ ಕೃತ್ಯ

ಪ್ರಾಥಮಿಕ ತನಿಖೆಯ ಪ್ರಕಾರ, ಟಿಟಿ (ಟೆಂಪೋ ಟ್ರಾವೆಲರ್) ವಾಹನದಲ್ಲಿ ಆಗಮಿಸಿದ್ದ ಪ್ರವಾಸಿಗರು ಹಲ್ಕಿ ಲಾಂಚ್ ಸ್ಟ್ಯಾಂಡ್‌ಗೆ ಬರುವ ರಸ್ತೆಯ ಸಮೀಪದ ಅರಣ್ಯ ಹಾಗೂ ಹಿನ್ನೀರಿನ ದಂಡೆಯ ಮೇಲೆ ಈ ಕೃತ್ಯವೆಸಗಿದ್ದಾರೆ. ಲಾಂಚ್ ಬರುವವರೆಗೆ ಕಾಯುತ್ತಿದ್ದ ಸಮಯದಲ್ಲಿ, ವಾಹನದಲ್ಲಿದ್ದ ಸ್ಟವ್ ಹಾಗೂ ಪಾತ್ರೆಗಳನ್ನು ಹೊರತೆಗೆದು ಅಡುಗೆ ಮಾಡಿದ್ದಾರೆ. ಅಲ್ಲದೆ ಅಲ್ಲಿಯೇ ಕುಳಿತು ನೀರು ಮತ್ತು ಯಾವುದೋ ಪಾನೀಯ ಅಥವಾ ಮದ್ಯದ ಬಾಟಲಿಗಳನ್ನು ಹಿಡಿದು ಕಾಲ ಕಳೆದಿದ್ದಾರೆ. ಬಳಿಕ ಲಾಂಚ್ ಆಗಮಿಸುತ್ತಿದ್ದಂತೆ, ಅಡುಗೆ ಸಾಮಗ್ರಿಗಳ ಸಮೇತ ಟಿಟಿ ವಾಹನವನ್ನು ಹತ್ತಿಸಿಕೊಂಡು ಹಲ್ಕಿ ಲಾಂಚ್ ಸ್ಟ್ಯಾಂಡ್‌ನಿಂದ ಮುಪ್ಪಾಣೆ ಕಡೆಗೆ ತೆರಳಿರುವುದು ಪತ್ತೆಯಾಗಿದೆ. ಪ್ರಸ್ತುತ ಆ ವಾಹನ ಹಾಗೂ ಅದರಲ್ಲಿ ಪ್ರಯಾಣಿಸಿದ ವ್ಯಕ್ತಿಗಳ ವಿವರಗಳನ್ನು ಅರಣ್ಯ ಇಲಾಖೆ ಪತ್ತೆಹಚ್ಚುತ್ತಿದ್ದು, ಶೋಧ ಕಾರ್ಯ ಮುಂದುವರಿದಿದೆ ಎಂದು ತಿಳಿಸಿದ್ದಾರೆ.

​ವನ್ಯಜೀವಿ ಕಾಯ್ದೆಯಡಿ ಕಠಿಣ ಕ್ರಮದ ಎಚ್ಚರಿಕೆ

ಶರಾವತಿ ಕಣಿವೆ ಸಿಂಗಳೀಕ ಅಭಯಾರಣ್ಯ ವ್ಯಾಪ್ತಿಯಲ್ಲಿ ಲಾಂಚ್ ಮೂಲಕ ವಾಹನಗಳು ಹಾಗೂ ಸಾರ್ವಜನಿಕರ ಸಂಚಾರಕ್ಕೆ ಮಾತ್ರವೇ ಅನುಮತಿ ನೀಡಲಾಗಿದೆ. ಅದನ್ನು ಬಿಟ್ಟು ಸಂರಕ್ಷಿತ ಅರಣ್ಯ ಪ್ರದೇಶದಲ್ಲಿ ಬೆಂಕಿ ಹಚ್ಚಿ ಅಡುಗೆ ಮಾಡುವುದು, ಮದ್ಯಪಾನ ಹಾಗೂ ಮೋಜು-ಮಸ್ತಿ ನಡೆಸುವುದು ವನ್ಯಜೀವಿ ಸಂರಕ್ಷಣಾ ಕಾಯ್ದೆ 1972ರ ಪ್ರಕಾರ ಶಿಕ್ಷಾರ್ಹ ಅಪರಾಧವಾಗಿದೆ ಎಂಬುದಾಗಿ ಎಚ್ಚರಿಸಿದ್ದಾರೆ.

​ಅಭಯಾರಣ್ಯದೊಳಗೆ ಇಂತಹ ಅಕ್ರಮ ಚಟುವಟಿಕೆಗಳಲ್ಲಿ ತೊಡಗುವ ಪ್ರವಾಸಿಗರು ಮತ್ತು ಸಾರ್ವಜನಿಕರ ವಿರುದ್ಧ ನಿರ್ದಾಕ್ಷಿಣ್ಯವಾಗಿ ಕಾನೂನು ಕ್ರಮ ಜರುಗಿಸಲಾಗುವುದು. ಜೊತೆಗೆ, ಅರಣ್ಯ ಸಂರಕ್ಷಣೆ ಹಾಗೂ ನಿಯಮಗಳ ಪಾಲನೆ ಕುರಿತು ಪ್ರವಾಸಿಗರಲ್ಲಿ ಇಲಾಖೆಯ ವತಿಯಿಂದ ವ್ಯಾಪಕ ಅರಿವು ಮೂಡಿಸುವ ಕಾರ್ಯವನ್ನೂ ಕೈಗೊಳ್ಳಲಾಗುವುದು ಎಂದು ಕಾರ್ಗಲ್ ವೈಲ್ಡ್ ಲೈಫ್ ವಲಯ ಅರಣ್ಯಾಧಿಕಾರಿ (ಆರ್‌ಎಫ್‌ಒ) ನವೀನ್ ಕುಮಾರ್.ಆರ್ ಪತ್ರಿಕಾ ಪ್ರಕಟಣೆಯಲ್ಲಿ ಸ್ಪಷ್ಟಪಡಿಸಿದ್ದಾರೆ.

ವರದಿ: ವಸಂತ ಬಿ ಈಶ್ವರಗೆರೆ, ಸಂಪಾದಕರು..