ಭಾರತೀಯ ಕ್ರಿಕೆಟ್ ತಂಡಕ್ಕಾಗಿ ಅಫ್ಘಾನಿಸ್ತಾನ್ ಕ್ರಿಕೆಟ್ ಮಂಡಳಿ (ಎಸಿಬಿ) ಆಯೋಜಿಸಿದ್ದ ವಿಶೇಷ ಗೌರವ ಭೋಜನ ಕೂಟದಲ್ಲಿ ಯುವ ವಿಕೆಟ್ ಕೀಪರ್ ಬ್ಯಾಟರ್ ಇಶಾನ್ ಕಿಶನ್ ಭಾಗವಹಿಸಿ ತಮ್ಮ ಮನದಾಳದ ಮಾತುಗಳನ್ನು ಹಂಚಿಕೊಂಡಿದ್ದಾರೆ. ಈ ವಿಶೇಷ ಸಮಾರಂಭದಲ್ಲಿ ಭಾಷಣ ಪ್ರಾರಂಭಿಸುವಾಗ ಇಶಾನ್ ಕಿಶನ್ “ಬಿಸ್ಮಿಲ್ಲಾಹಿರ್ ರಹಮಾನಿರ್ ರಹೀಮ್” ಎಂದು ಹೇಳುವ ಮೂಲಕ ಕಾರ್ಯಕ್ರಮದಲ್ಲಿದ್ದ ಎಲ್ಲರ ಗಮನ ಸೆಳೆದರು.
ವೇದಿಕೆಯಲ್ಲಿ ಮಾತನಾಡಿದ ಇಶಾನ್, ಅಫ್ಘಾನಿಸ್ತಾನ್ ಕ್ರಿಕೆಟ್ ತಂಡದ ಆಟಗಾರರ ಕ್ರೀಡಾಸ್ಪೂರ್ತಿ ಹಾಗೂ ಭಾರತೀಯ ಕ್ರಿಕೆಟಿಗರೊಂದಿಗೆ ಅವರು ಹೊಂದಿರುವ ಆತ್ಮೀಯ ಬಾಂಧವ್ಯವನ್ನು ಮುಕ್ತಕಂಠದಿಂದ ಶ್ಲಾಘಿಸಿದರು. “ಅಫ್ಘಾನಿಸ್ತಾನ್ ವಿರುದ್ಧ ಆಡುವುದು ಯಾವಾಗಲೂ ನಮಗೆ ಸಂತಸ ನೀಡುತ್ತದೆ. ಐಪಿಎಲ್ ಹರಾಜು ಮತ್ತು ಟೂರ್ನಿಯಿಂದಾಗಿ ನಾವೆಲ್ಲರೂ ಒಂದಾಗಿ ಆಡಿದ್ದೇವೆ. ಮೈದಾನದ ಹೊರಗೆ ಹಾಗೂ ಒಳಗೆ ಅವರು ಎಷ್ಟೊಂದು ಉತ್ತಮ ವ್ಯಕ್ತಿಗಳು ಎಂಬುದು ನಮಗೆ ನಿಕಟವಾಗಿ ಗೊತ್ತಿದೆ” ಎಂದು ಹೇಳಿದರು.
ಇದೇ ವೇಳೆ ಮುಂಬೈ ಇಂಡಿಯನ್ಸ್ ತಂಡದಲ್ಲಿದ್ದಾಗ ಅಫ್ಘಾನಿಸ್ತಾನ್‌ನ ಹಿರಿಯ ಆಲ್ ರೌಂಡರ್ ಮೊಹಮ್ಮದ್ ನಬಿ ಅವರೊಂದಿಗಿನ ಒಡನಾಟವನ್ನು ಇಶಾನ್ ನೆನಪಿಸಿಕೊಂಡರು. “ನಬಿ ಭಾಯ್ ಅವರೊಂದಿಗೆ ಮುಂಬೈ ಇಂಡಿಯನ್ಸ್‌ನಲ್ಲಿ ಆಡುವಾಗ ಬ್ಯಾಟಿಂಗ್ ಅಭ್ಯಾಸದ ಸಮಯದಲ್ಲಿ ಅವರು ನನಗೆ ಸಾಕಷ್ಟು ನೆರವು ನೀಡಿದ್ದರು. ವಿಭಿನ್ನ ಮಾದರಿಯ ಬೌಲರ್‌ಗಳನ್ನು ಹೇಗೆ ಎದುರಿಸಬೇಕು ಹಾಗೂ ಪಂದ್ಯದ ಪರಿಸ್ಥಿತಿಗೆ ತಕ್ಕಂತೆ ತಂತ್ರ ರೂಪಿಸುವುದು ಹೇಗೆ ಎಂಬುದನ್ನು ಅವರು ಹೇಳಿಕೊಡುತ್ತಿದ್ದರು” ಎಂದು ಕೃತಜ್ಞತೆ ಸಲ್ಲಿಸಿದರು.
ಅಫ್ಘಾನಿಸ್ತಾನ್ ಆಟಗಾರರಲ್ಲಿರುವ ಗೆಲ್ಲುವ ಹಸಿವು ಮತ್ತು ಕಠಿಣ ಶ್ರಮವನ್ನು ಕೊಂಡಾಡಿದ ಇಶಾನ್, ಮೈದಾನದಲ್ಲಿ ಅವರು ಪ್ರದರ್ಶಿಸುವ ಶ್ರದ್ಧೆ ಅತ್ಯಂತ ಪ್ರಭಾವಶಾಲಿಯಾಗಿದೆ ಎಂದರು. ನಾವು ಅವರ ವಿರುದ್ಧ ಆಡುವಾಗ ವಿಕೆಟ್ ಪಡೆಯಲು ಮತ್ತು ಅಂತರರಾಷ್ಟ್ರೀಯ ಮಟ್ಟದಲ್ಲಿ ಪೈಪೋಟಿ ನೀಡಲು ಅವರು ತೋರಿಸುವ ಉತ್ಸಾಹ ಮೆಚ್ಚುವಂಥದ್ದು ಎಂದು ಬಣ್ಣಿಸಿದರು. ಈ ಕಾರ್ಯಕ್ರಮವು ಎರಡೂ ದೇಶಗಳ ಕ್ರಿಕೆಟಿಗರ ನಡುವಿನ ಪರಸ್ಪರ ಗೌರವ ಹಾಗೂ ಐಪಿಎಲ್ ಮೂಲಕ ಬೆಳೆದುಬಂದ ಸೌಹಾರ್ದತೆಗೆ ಸಾಕ್ಷಿಯಾಯಿತು.
