‘ನಮ್ಮ ಕುಟುಂಬದ ಒಬ್ಬರನ್ನು ಕಳೆದುಕೊಂಡಿದ್ದೇವೆ’.. ಪುಟ್ಟ ಬಾಲಕಿಯ ನಿಧನಕ್ಕೆ ನಟಿ ಪೂರ್ಣ ಭಾವುಕ ಪೋಸ್ಟ್!

ಹೈದರಾಬಾದ್: ನಟಿ ಪೂರ್ಣ (ಶಾಮ್ನಾ ಕಾಸಿಮ್) ಅವರ ಡ್ಯಾನ್ಸ್ ಸ್ಟುಡಿಯೋದಲ್ಲಿ ನೃತ್ಯ ಕಲಿಯುತ್ತಿದ್ದ ಪುಟ್ಟ ಬಾಲಕಿಯೊಬ್ಬಳು ಅಕಾಲಿಕವಾಗಿ ನಿಧನರಾಗಿದ್ದು, ಈ ದುಃಖದ ಘಟನೆ ನಟಿಯನ್ನು ತೀವ್ರವಾಗಿ ಕಂಗೆಡಿಸಿದೆ. ‘ನಮ್ಮ ಕುಟುಂಬದ ಒಬ್ಬರನ್ನು ಕಳೆದುಕೊಂಡಿದ್ದೇವೆ’ ಎಂದು ಭಾವುಕವಾಗಿ ಬರೆದಿರುವ ಪೂರ್ಣ, ಬಾಲಕಿಯ ನೆನಪುಗಳು ಸದಾ ತಮ್ಮ ಹೃದಯದಲ್ಲಿ ಉಳಿಯಲಿವೆ ಎಂದು ಕಣ್ಣೀರಿನ ನಮನ ಸಲ್ಲಿಸಿದ್ದಾರೆ.

ನಟಿ ಪೂರ್ಣ ಅವರು ಸಾಮಾಜಿಕ ಜಾಲತಾಣದಲ್ಲಿ ಭಾವುಕ ಸಂದೇಶವೊಂದನ್ನು ಹಂಚಿಕೊಂಡಿದ್ದಾರೆ. ತಮ್ಮ *ಶಾಮ್ನಾ ಕಾಸಿಮ್ ಡ್ಯಾನ್ಸ್ ಸ್ಟುಡಿಯೋ’ದಲ್ಲಿ ನೃತ್ಯ ಕಲಿಯುತ್ತಿದ್ದ ಪುಟ್ಟ ಬಾಲಕಿಯೊಬ್ಬಳು ಅಕಾಲಿಕವಾಗಿ ನಿಧನರಾಗಿರುವ ಹಿನ್ನೆಲೆಯಲ್ಲಿ ಅವರು ತೀವ್ರ ಸಂತಾಪ ವ್ಯಕ್ತಪಡಿಸಿದ್ದಾರೆ.

ಆ ಬಾಲಕಿ ತಮ್ಮ ಕುಟುಂಬದ ಸದಸ್ಯೆಯಂತಾಗಿದ್ದಳು, ಆಕೆ ಬಿಟ್ಟುಹೋದ ಶೂನ್ಯವನ್ನು ಯಾರಿಂದಲೂ ತುಂಬಲು ಸಾಧ್ಯವಿಲ್ಲ ಎಂದು ಪೂರ್ಣ ಭಾವುಕವಾಗಿ ತಿಳಿಸಿದ್ದಾರೆ. ಆದರೆ ಬಾಲಕಿಯ ಸಾವಿಗೆ ಕಾರಣವೇನು ಎಂಬುದನ್ನು ಅವರು ಬಹಿರಂಗಪಡಿಸಿಲ್ಲ. ಪೂರ್ಣ ಅವರು ತಮ್ಮ ಇನ್‌ಸ್ಟಾಗ್ರಾಂನಲ್ಲಿ ಬಾಲಕಿಯ ಫೋಟೋವನ್ನು ಹಂಚಿಕೊಂಡು ಭಾವುಕ ನುಡಿಗಳನ್ನು ಬರೆದಿದ್ದಾರೆ.

“ಕೆಲವು ವಿದಾಯಗಳು ಮಾತುಗಳಿಗೆ ನಿಲುಕುವುದಿಲ್ಲ. ಕಣ್ಣೀರು ಕೂಡ ವ್ಯಕ್ತಪಡಿಸಲಾಗದಷ್ಟು ನೋವು ಮಾತ್ರ ಉಳಿಯುತ್ತದೆ. ಈ ಪುಟ್ಟ ಏಂಜಲ್ ನಮ್ಮ ಶಾಮ್ನಾ ಕಾಸಿಮ್ ಡ್ಯಾನ್ಸ್ ಸ್ಟುಡಿಯೋದ ವಿದ್ಯಾರ್ಥಿನಿಯಾಗಿದ್ದಳು. ನೃತ್ಯ ಕಲಿಯಲು ಸ್ಟುಡಿಯೋಗೆ ಬರುತ್ತಿದ್ದ ನಿನ್ನ ಪುಟ್ಟ ಪುಟ್ಟ ಹೆಜ್ಜೆಗಳು, ನಿನ್ನ ಮುಗ್ಧ ನಗು, ಪ್ರೀತಿಯಿಂದ ಕೂಡಿದ ನಿನ್ನ ಮುಖ… ನಮ್ಮ ಸ್ಟುಡಿಯೋದ ಪ್ರತಿಯೊಂದು ಮೂಲೆಯಲ್ಲೂ ಸದಾ ಉಳಿಯುತ್ತವೆ.

ನೀನು ನಮಗೆ ಕೇವಲ ವಿದ್ಯಾರ್ಥಿನಿಯಾಗಿರಲಿಲ್ಲ. ನಮ್ಮ ಕುಟುಂಬದ ಒಬ್ಬ ಸದಸ್ಯೆಯಾಗಿದ್ದೆ. ನೀನು ಬಿಟ್ಟುಹೋದ ಖಾಲಿ ಜಾಗವನ್ನು ಎಂದಿಗೂ ಯಾರಿಂದಲೂ ತುಂಬಲು ಸಾಧ್ಯವಿಲ್ಲ.

ಶಾಮ್ನಾ ಕಾಸಿಮ್ ಮತ್ತು ಶಾಮ್ನಾ ಕಾಸಿಮ್ ಡ್ಯಾನ್ಸ್ ಸ್ಟುಡಿಯೋ ಇರುವವರೆಗೂ ನಮ್ಮ ಹೃದಯಗಳಲ್ಲಿ ಮತ್ತು ನೆನಪುಗಳಲ್ಲಿ ನೀನು ಸದಾ ಜೀವಂತವಾಗಿರುತ್ತೀಯ. ನಿನ್ನ ನೆನಪುಗಳು ಎಂದಿಗೂ ಮಾಸುವುದಿಲ್ಲ. ನಿನ್ನ ಸುಂದರ ನಗು ಎಂದಿಗೂ ಮರೆಯಾಗುವುದಿಲ್ಲ.

ನೋವಿನೊಂದಿಗೆ ನಿನಗೆ ವಿದಾಯ ಹೇಳುತ್ತಿದ್ದೇವೆ. ನಿನ್ನ ಆತ್ಮಕ್ಕೆ ಶಾಂತಿ ಸಿಗಲಿ ಎಂದು ಪ್ರಾರ್ಥಿಸುತ್ತಾ, ಕಣ್ಣೀರಿನ ನಮನ ಸಲ್ಲಿಸುತ್ತಿದ್ದೇವೆ. ನೀನು ನಮ್ಮ ಹೃದಯಗಳಲ್ಲಿ ಶಾಶ್ವತವಾಗಿ ಉಳಿಯುತ್ತೀಯ” ಎಂದು ಪೂರ್ಣ ತಮ್ಮ ಪೋಸ್ಟ್‌ನಲ್ಲಿ ಬರೆದಿದ್ದಾರೆ.

ಪುಟ್ಟ ಬಾಲಕಿಯ ನಿಧನಕ್ಕೆ ಸಂತಾಪ ಸೂಚಿಸಿರುವ ನಟಿ ಪೂರ್ಣ, ಆಕೆಯ ಸಾವಿಗೆ ಕಾರಣವೇನು ಅಥವಾ ಹೇಗೆ ಮೃತಪಟ್ಟಳು ಎಂಬುದನ್ನು ತಿಳಿಸಿಲ್ಲ. ಸದ್ಯ ನಟಿಯ ಈ ಭಾವುಕ ಪೋಸ್ಟ್ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗುತ್ತಿದೆ.

ಪೂರ್ಣಾ ಎಂಬ ರಂಗನಾಮದಿಂದ ಜನಪ್ರಿಯರಾಗಿರುವ ಶಾಮ್ನಾ ಕಾಸಿಮ್ ಅವರು ಭಾರತೀಯ ನಟಿ, ನರ್ತಕಿ ಹಾಗೂ ರೂಪದರ್ಶಿಯಾಗಿದ್ದು, ತೆಲುಗು, ತಮಿಳು, ಮಲಯಾಳಂ ಮತ್ತು ಕನ್ನಡ ಚಿತ್ರರಂಗಗಳಲ್ಲಿ ಗುರುತಿಸಿಕೊಂಡಿದ್ದಾರೆ. ನೃತ್ಯದಲ್ಲಿ ಆಸಕ್ತಿ ಹೊಂದಿದ್ದ ಅವರು ಬಳಿಕ ಚಿತ್ರರಂಗಕ್ಕೆ ಕಾಲಿಟ್ಟು ದಕ್ಷಿಣ ಭಾರತದ ಹಲವು ಸಿನಿಮಾಗಳಲ್ಲಿ ಅಭಿನಯಿಸಿದ್ದಾರೆ.

ಕೇರಳದ ಕಣ್ಣೂರಿನಲ್ಲಿ ಕಾಸಿಮ್ ಮತ್ತು ರಮ್ಲಾ ದಂಪತಿಯ ಪುತ್ರಿಯಾಗಿ ಶಾಮ್ನಾ ಕಾಸಿಮ್ ಜನಿಸಿದರು. ಕಣ್ಣೂರಿನ ಸೇಂಟ್ ತೆರೇಸಾಸ್ ಆಂಗ್ಲೋ-ಇಂಡಿಯನ್ ಹೈಯರ್ ಸೆಕೆಂಡರಿ ಶಾಲೆಯಲ್ಲಿ ವಿದ್ಯಾಭ್ಯಾಸ ಮಾಡಿದರು. ನೃತ್ಯದ ಮೇಲಿನ ಆಸಕ್ತಿಯಿಂದ ತಮ್ಮ ನೃತ್ಯ ಕೌಶಲ್ಯಕ್ಕೆ ಹೆಚ್ಚಿನ ಗಮನ ನೀಡಲು ಶಾಲೆಯನ್ನು ಬದಲಿಸಿಕೊಂಡಿದ್ದರು. ಪ್ರಸ್ತುತ ಅವರು ಕೇರಳದ ಕೊಚ್ಚಿಯಲ್ಲಿ ವಾಸಿಸುತ್ತಿದ್ದಾರೆ.

2004ರಲ್ಲಿ ಚಿತ್ರರಂಗಕ್ಕೆ ಎಂಟ್ರಿ

ಶಾಮ್ನಾ ಕಾಸಿಮ್ ಅವರು 2004ರಲ್ಲಿ ಬಿಡುಗಡೆಯಾದ ಮಲಯಾಳಂ ಸಿನಿಮಾ ‘ಮಂಜು ಪೋಲೋರು ಪೆನ್ಕುಟ್ಟಿ’ ಮೂಲಕ ಚಿತ್ರರಂಗಕ್ಕೆ ಕಾಲಿಟ್ಟರು. ಬಳಿಕ 2007ರಲ್ಲಿ ತೆಲುಗಿನ ‘ಶ್ರೀ ಮಹಾಲಕ್ಷ್ಮಿ’ ಸಿನಿಮಾದಲ್ಲಿ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡರು.2008ರಲ್ಲಿ ಬಿಡುಗಡೆಯಾದ ‘ಮುನಿಯಾಂಡಿ ವಿಲಂಗಿಯಲ್ ಮೂನ್ಮಂಡು’ ಚಿತ್ರದ ಮೂಲಕ ತಮಿಳು ಚಿತ್ರರಂಗಕ್ಕೂ ಪ್ರವೇಶಿಸಿದರು. ಈ ಸಿನಿಮಾದಲ್ಲಿ ಅವರು ನಾಯಕಿಯಾಗಿ ನಟಿಸಿದ್ದರು.

ಕನ್ನಡದಲ್ಲೂ ಅಭಿನಯ

ಕನ್ನಡ ಚಿತ್ರರಂಗದಲ್ಲೂ ಶಾಮ್ನಾ ಕಾಸಿಮ್ ತಮ್ಮದೇ ಛಾಪು ಮೂಡಿಸಿದ್ದಾರೆ. 2009ರಲ್ಲಿ ಬಿಡುಗಡೆಯಾದ ‘ಜೋಶ್’ ಸಿನಿಮಾ ಅವರ ಗಮನಾರ್ಹ ಕನ್ನಡ ಚಿತ್ರಗಳಲ್ಲೊಂದು. ಈ ಸಿನಿಮಾ ಚಿತ್ರಮಂದಿರಗಳಲ್ಲಿ 100 ದಿನಗಳನ್ನು ಪೂರೈಸಿತ್ತು.ಇದರೊಂದಿಗೆ ‘ಕೊಡೈಕೆನಾಲ್’ (2008), ‘ಕಂಧಕೋಟೈ’ (2009), ‘ದ್ರೋಹಿ’ (2010), ‘ಆಡು ಪುಲಿ’ (2011), ‘ವೆಲ್ಲೂರು ಮಾವಟ್ಟಂ’ (2011) ಮತ್ತು ‘ವಿಥಗನ್’ (2011) ಸೇರಿದಂತೆ ಹಲವು ತಮಿಳು ಸಿನಿಮಾಗಳಲ್ಲಿಯೂ ಅವರು ಅಭಿನಯಿಸಿದ್ದಾರೆ.

ನಟನೆ ಮಾತ್ರವಲ್ಲದೆ ನೃತ್ಯದಲ್ಲೂ ವಿಶೇಷ ಆಸಕ್ತಿ ಹೊಂದಿರುವ ಪೂರ್ಣಾ, ತಮ್ಮ ನೃತ್ಯ ಪ್ರತಿಭೆಯ ಮೂಲಕವೂ ಗುರುತಿಸಿಕೊಂಡಿದ್ದಾರೆ. ಮುಂದೆ ದಕ್ಷಿಣ ಭಾರತದ ವಿವಿಧ ಭಾಷೆಗಳ ಸಿನಿಮಾಗಳಲ್ಲಿ ಅಭಿನಯಿಸುವ ಮೂಲಕ ತಮ್ಮದೇ ಅಭಿಮಾನಿ ಬಳಗವನ್ನು ಸಂಪಾದಿಸಿಕೊಂಡಿದ್ದಾರೆ.