ಶಿವಮೊಗ್ಗ: ಹಳೆಯ ಆರ್ಥಿಕ ವ್ಯವಹಾರದ ದ್ವೇಷದ ಹಿನ್ನೆಲೆಯಲ್ಲಿ ಏಕಾಏಕಿ ಚಲಿಸುತ್ತಿದ್ದ ಬಸ್ ಅನ್ನು ಅಡ್ಡಗಟ್ಟಿ, ಮ್ಯಾನೇಜರ್ ಮೇಲೆ ಕುಡುಗೋಲಿನಿಂದ ಮಾರಣಾಂತಿಕವಾಗಿ ಹಲ್ಲೆ ನಡೆಸಿರುವ ಘಟನೆ ಶಿವಮೊಗ್ಗ ಜಿಲ್ಲೆಯ ಸೊರಬ ಪಟ್ಟಣದಲ್ಲಿ ನಡೆದಿದೆ. ಈ ಸಂಬಂಧ ಆರೋಪಿಯನ್ನು ಪೊಲೀಸರು ವಶಕ್ಕೆ ಪಡೆದಿದ್ದು, ಸೊರಬ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
ಘಟನೆಯ ವಿವರ
ಸಾಗರ ಟೌನ್‌ನ ನೆಹರೂ ನಗರದ ನಿವಾಸಿ ಹಾಗೂ ಎಮಿರೇಟ್ಸ್ ಬಸ್ ಮ್ಯಾನೇಜರ್ ಆಗಿರುವ ಮಹಮದ್ ಶಹದ್ ಬಿನ್ ಎಸ್.ಎಚ್ ಅಬ್ಬಾಸ್ (30) ಹಲ್ಲೆಗೊಳಗಾದವರು. ಇವರಿಗೂ ಹಾಗೂ ಆರೋಪಿ ಚಿನ್ನಪ್ಪ (ತಂದೆ ಗಣಪತಿ) ಎಂಬಾತನಿಗೂ ಈ ಹಿಂದೆ ಬಸ್ ವ್ಯವಹಾರಕ್ಕೆ ಸಂಬಂಧಿಸಿದಂತೆ ಹಣಕಾಸಿನ ವೈಷಮ್ಯವಿತ್ತು.
ನಿನ್ನೆ ರಾತ್ರಿ 8:15ರ ಸುಮಾರಿಗೆ ಆನವಟ್ಟಿಯಿಂದ ಸೊರಬ, ಸಾಗರ ಮಾರ್ಗವಾಗಿ ಬೆಂಗಳೂರಿಗೆ ಎಮಿರೇಟ್ಸ್ ಬಸ್ ಹೊರಟಿತ್ತು. ರಾತ್ರಿ ಸುಮಾರು 9:00 ಗಂಟೆ ವೇಳೆಗೆ ಸೊರಬದ ಖಾಸಗಿ ಬಸ್ ನಿಲ್ದಾಣದ ಅಂಚೆ ಕಚೇರಿ ಬಳಿ ಆರೋಪಿ ಚಿನ್ನಪ್ಪ ಏಕಾಏಕಿ ಬಂದು ಬಸ್ ಅಡ್ಡಗಟ್ಟಿದ್ದಾನೆ. ಬಸ್‌ನಲ್ಲಿದ್ದ ಮ್ಯಾನೇಜರ್ ಮಹಮದ್ ಶಹದ್ ಅವರನ್ನು ಬಲವಂತವಾಗಿ ಹೊರಗೆಳೆದು, ಪಕ್ಕದಲ್ಲಿ ನಿಲ್ಲಿಸಿದ್ದ ಬೈಕ್‌ನ ಬ್ಯಾಗ್‌ನಲ್ಲಿದ್ದ ಕುಡುಗೋಲನ್ನು ತೆಗೆದು 'ನಿನ್ನನ್ನು ಮುಗಿಸಿಯೇ ತೀರುತ್ತೇನೆ' ಎಂದು ಕೊಲೆ ಬೆದರಿಕೆ ಹಾಕಿದ್ದಾನೆ.
ಈ ವೇಳೆ ಗಾಬರಿಗೊಂಡು ತಪ್ಪಿಸಿಕೊಳ್ಳಲು ಯತ್ನಿಸಿದ ಶಹದ್ ಅವರ ಮೇಲೆ ಆರೋಪಿಯು ಕುಡುಗೋಲು ಬಿಸಾಡಿದ್ದಾನೆ. ರಕ್ಷಿಸಿಕೊಳ್ಳಲು ಹೋದ ಶಹದ್ ಅವರ ಎಡಗೈ ಹಸ್ತಕ್ಕೆ ಬಲವಾದ ಪೆಟ್ಟು ಬಿದ್ದು ತೀವ್ರ ಗಾಯವಾಗಿದೆ. ಬಳಿಕ ಕುಡುಗೋಲನ್ನು ಅಲ್ಲೇ ಬಿಸಾಡಿದ ಆರೋಪಿ, ಗಾಯಾಳುವನ್ನು ಎಳೆದಾಡುತ್ತಾ "ನನ್ನ ಬಸ್ಸಿನ ಹಣವನ್ನು ಈಗ ಕೊಡು, ಇಷ್ಟು ದಿನ ನನಗೆ ಮೋಸ ಮಾಡಲು ಅಡಗಿಕೊಂಡಿದ್ದೆಯಾ" ಎಂದು ಅವಾಚ್ಯ ಶಬ್ದಗಳಿಂದ ನಿಂದಿಸಿ ಗಲಾಟೆ ಮಾಡಿದ್ದಾನೆ.
ಆರೋಪಿ ಪೊಲೀಸರ ವಶಕ್ಕೆ
ಗಲಾಟೆ ತಾರಕಕ್ಕೇರುತ್ತಿದ್ದಂತೆ ಸ್ಥಳದಲ್ಲಿದ್ದವರು ಕೂಡಲೇ ಸೊರಬ ಪೊಲೀಸ್ ಠಾಣೆಗೆ ಕರೆ ಮಾಡಿ ಮಾಹಿತಿ ನೀಡಿದ್ದಾರೆ. ತಕ್ಷಣವೇ ಸ್ಥಳಕ್ಕೆ ದೌಡಾಯಿಸಿದ ಪೊಲೀಸರು ಆರೋಪಿ ಚಿನ್ನಪ್ಪನನ್ನು ವಶಕ್ಕೆ ಪಡೆದುಕೊಂಡಿದ್ದಾರೆ. ಗಾಯಾಳು ಮಹಮದ್ ಶಹದ್ ಅವರನ್ನು ಆಟೋ ಮೂಲಕ ಸೊರಬದ ಸರ್ಕಾರಿ ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ಕೊಡಿಸಿದ್ದಾರೆ.
ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆದ ಬಳಿಕ ಗಾಯಾಳು ಪೊಲೀಸ್ ಠಾಣೆಗೆ ತೆರಳಿ ದೂರು ನೀಡಿದ್ದಾರೆ. ಈ ದೂರು ಆಧರಿಸಿ ಆರೋಪಿ ಚಿನ್ನಪ್ಪ ವಿರುದ್ಧ ಸೊರಬ ಪೊಲೀಸ್ ಠಾಣೆಯಲ್ಲಿ ಕೊಲೆ ಯತ್ನ ಹಾಗೂ ಹಲ್ಲೆ ಆರೋಪದಡಿ ಪ್ರಕರಣ ದಾಖಲಾಗಿದೆ. ಇಂದು ಸ್ಥಳ ಮಹಜರು ನಡೆಸಿದಂತ ಸೊರಬ ಠಾಣೆಯ ಪಿಎಸ್ಐ ಪ್ರವೀಣ್ ಮತ್ತು ತಂಡ ಮುಂದಿನ ಕಾನೂನು ಕ್ರಮ ವಹಿಸಿದ್ದಾರೆ.
ವರದಿ: ವಸಂತ ಬಿ ಈಶ್ವರಗೆರೆ, ಸಂಪಾದಕರು..
