ಭಾರತೀಯ ಹಬ್ಬ ಹರಿದಿನಗಳಲ್ಲಿ ಮತ್ತು ಪವಿತ್ರ ಉಪವಾಸದ ದಿನಗಳಲ್ಲಿ ರಸಮಲೈ ನೆಚ್ಚಿನ ಸಿಹಿ ತಿಂಡಿಯಾಗಿದೆ. ಸಾಮಾನ್ಯವಾಗಿ ಹಾಲಿನ ಗಿಣ್ಣಿನಿಂದ ಮಾಡುವ ರಸಮಲೈಗೆ ಈ ಬಾರಿ ಸಾಬೂದಾನ ಬಳಸುವ ಮೂಲಕ ವಿಭಿನ್ನ ಹಾಗೂ ಆಕರ್ಷಕ ರೂಪ ನೀಡಲಾಗಿದೆ. ಸಾಮಾಜಿಕ ಜಾಲತಾಣ ಇನ್‌ಸ್ಟಾಗ್ರಾಮ್ ಬಳಕೆದಾರ ಹಾಗೂ ಆಹಾರ ಪ್ರಿಯ ರಿಂಚನ್ ವಾಂಗ್ಡಿ ಭುಟಿಯಾ ಈ ಹೊಸ ಬಗೆಯ ಪಾಕವಿಧಾನವನ್ನು ಹಂಚಿಕೊಂಡಿದ್ದು, ಆಸಕ್ತರ ಗಮನ ಸೆಳೆದಿದೆ.
ಬೇಕಾಗುವ ಸಾಮಗ್ರಿಗಳು
ಸಾಬೂದಾನ ಉಂಡೆಗಳನ್ನು ತಯಾರಿಸಲು ಒಂದು ಕಪ್ ಸಾಬೂದಾನ, ಎರಡು ಚಮಚ ಸಕ್ಕರೆ ಪುಡಿ, ಎರಡು ಚಮಚ ಹಾಲಿನ ಪುಡಿ, ಒಂದು ಚಮಚ ಕಸ್ಟಾರ್ಡ್ ಪುಡಿ, ಅಗತ್ಯವಿದ್ದರೆ ಒಳಗೆ ತುಂಬಲು ಸ್ವಲ್ಪ ಖೋವಾ ಹಾಗೂ ನೆನೆಸಲು ನೀರು ಬೇಕಾಗುತ್ತದೆ.
ಕೇಸರಿ ಹಾಲು ತಯಾರಿಸಲು ಒಂದು ಲೀಟರ್ ಗಟ್ಟಿ ಹಾಲು, ನಾಲ್ಕರಿಂದ ಐದು ಚಮಚ ಸಕ್ಕರೆ, ಅರ್ಧ ಚಮಚ ಏಲಕ್ಕಿ ಪುಡಿ ಮತ್ತು ಕೆಲವು ಕುಂಕುಮ ಕೇಸರಿ ದಳಗಳು ಅಗತ್ಯ. ಅಲಂಕಾರಕ್ಕಾಗಿ ಹೆಚ್ಚಿದ ಒಣ ಹಣ್ಣುಗಳು ಮತ್ತು ಗುಲಾಬಿ ದಳಗಳನ್ನು ಬಳಸಬಹುದು.
ತಯಾರಿಸುವ ವಿಧಾನ
ಮೊದಲು ಸಾಬೂದಾನವನ್ನು ಚೆನ್ನಾಗಿ ತೊಳೆದು ಸಾಫ್ಟ್ ಆಗುವವರೆಗೆ ನೀರಿನಲ್ಲಿ ನೆನೆಸಬೇಕು. ಸಾಬೂದಾನ ಸಂಪೂರ್ಣವಾಗಿ ನೆನೆದ ನಂತರ ಹೆಚ್ಚುವರಿ ನೀರನ್ನು ಬಸಿಯಬೇಕು. ಬಳಿಕ ಅದನ್ನು ಒಂದು ಪಾತ್ರೆಗೆ ಹಾಕಿ ಚೆನ್ನಾಗಿ ಹಸುರಾಗಿ ಹಿಚುಕಿಕೊಳ್ಳಬೇಕು.
ಹಿಚುಕಿದ ಸಾಬೂದಾನಕ್ಕೆ ಸಕ್ಕರೆ ಪುಡಿ, ಹಾಲಿನ ಪುಡಿ ಮತ್ತು ಕಸ್ಟಾರ್ಡ್ ಪುಡಿ ಸೇರಿಸಿ ಗಟ್ಟಿಯಾದ ಹಿಟ್ಟಿನ ಹದಕ್ಕೆ ನಾದಿಕೊಳ್ಳಬೇಕು. ಈ ಮಿಶ್ರಣವು ನೀರಾಗದಂತೆ ಹದವಾಗಿರಬೇಕು.
ಈ ಹಿಟ್ಟಿನಿಂದ ಸಣ್ಣ ಭಾಗವನ್ನು ತೆಗೆದುಕೊಂಡು ಸ್ವಲ್ಪ ಚಪ್ಪಟೆ ಮಾಡಬೇಕು. ಇಷ್ಟವಿದ್ದರೆ ಇದರ ಮಧ್ಯದಲ್ಲಿ ಸ್ವಲ್ಪ ಖೋವಾ ಇಟ್ಟು ಅಂಚುಗಳನ್ನು ಮುಚ್ಚಿ ಸಣ್ಣ ಉಂಡೆಯಾಗಿ ಮಾಡಿಕೊಳ್ಳಬಹುದು.
ಮತ್ತೊಂದೆಡೆ ಪಾತ್ರೆಯಲ್ಲಿ ಗಟ್ಟಿ ಹಾಲನ್ನು ಕಾಯಿಸಲು ಇಡಬೇಕು. ಹಾಲು ಕುದಿ ಬಂದಾಗ ಸಕ್ಕರೆ, ಕುಂಕುಮ ಕೇಸರಿ ಮತ್ತು ಏಲಕ್ಕಿ ಪುಡಿ ಸೇರಿಸಿ. ಹಾಲು ಸ್ವಲ್ಪ ಗಟ್ಟಿಯಾಗಿ ಹದಕ್ಕೆ ಬರುವವರೆಗೆ ಸಣ್ಣ ಉರಿಯಲ್ಲಿ ಕುದಿಸಬೇಕು.
ಕುದಿಯುತ್ತಿರುವ ಹಾಲಿಗೆ ತಯಾರಿಸಿಟ್ಟುಕೊಂಡ ಸಾಬೂದಾನ ಉಂಡೆಗಳನ್ನು ಮೆಲ್ಲಗೆ ಹಾಕಬೇಕು. ಉಂಡೆಗಳು ಮೃದುವಾಗಿ ಹಾಲಿನ ಮೇಲ್ಭಾಗದಲ್ಲಿ ತೇಲುವವರೆಗೆ ಸಣ್ಣ ಉರಿಯಲ್ಲಿ ಬೇಯಿಸಬೇಕು. ಈ ಸಮಯದಲ್ಲಿ ಉಂಡೆಗಳ ಆಕಾರ ಹಾಳಾಗದಂತೆ ಎಚ್ಚರ ವಹಿಸುವುದು ಮುಖ್ಯ.
ಉಂಡೆಗಳು ಚೆನ್ನಾಗಿ ಬೆಂದ ನಂತರ ಒಲೆಯಿಂದ ಇಳಿಸಿ, ಹಾಲಿನಲ್ಲಿಯೇ ಸ್ವಲ್ಪ ಸಮಯ ನೆನೆಯಲು ಬಿಡಬೇಕು. ಕೊನೆಯಲ್ಲಿ ಮೇಲಿಂದ ಒಣ ಹಣ್ಣುಗಳು ಮತ್ತು ಗುಲಾಬಿ ದಳಗಳಿಂದ ಅಲಂಕರಿಸಿ ತಂಪಾಗಿಸಿದರೆ ರುಚಿಕರವಾದ ಸಾಬೂದಾನ ರಸಮಲೈ ಸವಿಯಲು ಸಿದ್ಧವಾಗುತ್ತದೆ.
