ರಾತ್ರಿ ವೇಳೆ ರೈಲಿನಲ್ಲಿ ಪ್ರಯಾಣಿಸುವಾಗ ನಿದ್ದೆಗೆ ಜಾರಿ ಇಳಿಯಬೇಕಾದ ನಿಲ್ದಾಣವನ್ನು ಮಿಸ್ ಮಾಡಿಕೊಳ್ಳುವುದು ಕೆಲವೊಮ್ಮೆ ಸಂಭವಿಸುತ್ತದೆ. ಇಂತಹ ಸಂದರ್ಭದಲ್ಲಿ ಗಾಬರಿಯಾಗುವ ಅಗತ್ಯವಿಲ್ಲ. ಆದರೆ ಸ್ಟೇಷನ್ ದಾಟಿದ ಬಳಿಕ ಏನು ಮಾಡಬೇಕು ಎಂಬುದನ್ನು ಸರಿಯಾಗಿ ತಿಳಿದುಕೊಳ್ಳುವುದು ಮುಖ್ಯ.
ನೀವು ಬುಕ್ ಮಾಡಿರುವ ರೈಲು ಟಿಕೆಟ್ ಸಾಮಾನ್ಯವಾಗಿ ನಿರ್ದಿಷ್ಟ ಪ್ರಯಾಣ, ದಿಕ್ಕು ಹಾಗೂ ಗಮ್ಯಸ್ಥಾನಕ್ಕೆ ಸಂಬಂಧಿಸಿರುತ್ತದೆ. ಹೀಗಾಗಿ ಗಮ್ಯಸ್ಥಾನ ದಾಟಿದ ನಂತರ ಅದೇ ಟಿಕೆಟ್ ಬಳಸಿ ವಿರುದ್ಧ ದಿಕ್ಕಿನಲ್ಲಿ ಉಚಿತವಾಗಿ ಪ್ರಯಾಣಿಸಬಹುದು ಎಂದು ಭಾವಿಸುವುದು ಸರಿಯಲ್ಲ.
ತಕ್ಷಣ ಏನು ಮಾಡಬೇಕು?
ಗಾಬರಿಯಾಗಬೇಡಿ: ಮೊದಲು ಪ್ರಸ್ತುತ ರೈಲು ಎಲ್ಲಿದೆ ಮತ್ತು ಮುಂದಿನ ನಿಲ್ದಾಣ ಯಾವುದು ಎಂಬುದನ್ನು ತಿಳಿದುಕೊಳ್ಳಿ.
ಟಿಟಿಇ (TTE) ಸಂಪರ್ಕಿಸಿ: ತಕ್ಷಣವೇ ರೈಲ್ವೆ ಸಿಬ್ಬಂದಿ ಅಥವಾ ಟಿಟಿಇ ಬಳಿ ಹೋಗಿ ನಿಮ್ಮ ಸಮಸ್ಯೆಯನ್ನು ವಿವರಿಸಿ. ರೈಲ್ವೆ ನಿಯಮಗಳ ಪ್ರಕಾರ ಮುಂದಿನ ನಿಲ್ದಾಣದಲ್ಲಿ ಇಳಿಯಲು ಮತ್ತು ಅಲ್ಲಿಂದ ಹಿಂತಿರುಗಲು ಅವರು ಸರಿಯಾದ ಮಾರ್ಗದರ್ಶನ ನೀಡುತ್ತಾರೆ.
ಹಳೆಯ ಟಿಕೆಟ್‌ನಲ್ಲೇ ವಾಪಸ್ ಪ್ರಯಾಣಿಸಬಹುದೇ?
ನಿಮ್ಮ ಟಿಕೆಟ್ ನಿರ್ದಿಷ್ಟ ದಿಕ್ಕು ಮತ್ತು ಗಮ್ಯಸ್ಥಾನಕ್ಕೆ ಮಾತ್ರ ಮಾನ್ಯವಾಗಿರುತ್ತದೆ. ಆದ್ದರಿಂದ ಇಳಿಯಬೇಕಾದ ನಿಲ್ದಾಣ ದಾಟಿದ ಮೇಲೆ, ಅದೇ ಟಿಕೆಟ್‌ನಲ್ಲಿ ವಿರುದ್ಧ ದಿಕ್ಕಿನಲ್ಲಿ (ಹಿಂತಿರುಗಿ) ಪ್ರಯಾಣಿಸಲು ಬರುವುದಿಲ್ಲ. ಹಿಂತಿರುಗಲು ಅಧಿಕೃತವಾಗಿ ಹೊಸ ಟಿಕೆಟ್ ಪಡೆಯುವುದು ಕಡ್ಡಾಯ. ಇಲ್ಲದಿದ್ದರೆ ದಂಡ ತೆರಬೇಕಾಗುತ್ತದೆ.
ತುರ್ತು ಚೈನ್ (Chain) ಎಳೆಯಬೇಡಿ
ಕೇವಲ ನಿದ್ದೆಯ ಮಂಪರಿನಲ್ಲಿ ಸ್ಟೇಷನ್ ಮಿಸ್ ಆಯಿತು ಎಂಬ ಕಾರಣಕ್ಕೆ ರೈಲಿನ ತುರ್ತು ಚೈನ್ ಎಳೆಯುವುದು ಕಾನೂನುಬಾಹಿರ. ಚೈನ್ ವ್ಯವಸ್ಥೆಯು ವೈದ್ಯಕೀಯ ತುರ್ತು ಅಥವಾ ಬೆಂಕಿ ಅನಾಹುತದಂತಹ ಗಂಭೀರ ಸಂದರ್ಭಗಳಿಗೆ ಮಾತ್ರ ಸೀಮಿತ. ನಿಯಮ ಮೀರಿದರೆ ಜೈಲು ಅಥವಾ ಭಾರೀ ದಂಡ ಎದುರಿಸಬೇಕಾಗುತ್ತದೆ.
ಮುನ್ನೆಚ್ಚರಿಕಾ ಕ್ರಮಗಳು
ರಾತ್ರಿ ವೇಳೆ ಪ್ರಯಾಣಿಸುವಾಗ ನಿಲ್ದಾಣ ತಲುಪುವ ೨೦ ನಿಮಿಷ ಮುಂಚಿತವಾಗಿ ಮೊಬೈಲ್‌ನಲ್ಲಿ ಅಲಾರಾಂ ಇಟ್ಟುಕೊಳ್ಳಿ.
ರೈಲು ತಡವಾಗಿ ಚಲಿಸುವ ಸಾಧ್ಯತೆ ಇರುವುದರಿಂದ ನಡುನಡುವೆ ಲೈವ್ ಲೊಕೇಶನ್ (Live Status) ಪರಿಶೀಲಿಸಿ.
ಪಕ್ಕದ ಸಹಪ್ರಯಾಣಿಕರಿಗೂ ನಿಮ್ಮ ನಿಲ್ದಾಣದ ಬಗ್ಗೆ ತಿಳಿಸಿ, ಆ ಸ್ಟೇಷನ್ ಬಂದಾಗ ಎಬ್ಬಿಸಲು ಮನವಿ ಮಾಡಿ.
