ಮೊದಲ ದಿನವೇ ಬಾಕ್ಸ್ ಆಫೀಸ್‌ನಲ್ಲಿ ಧೂಳೆಬ್ಬಿಸಿದ ಯಶ್‌ ‘ಟಾಕ್ಸಿಕ್’; ಗಳಿಸಿದ್ದೆಷ್ಟು ಗೊತ್ತಾ?

ಬೆಂಗಳೂರು : ನಟ ಯಶ್ ಅಭಿನಯದ ಬಹುನಿರೀಕ್ಷಿತ ‘ಟಾಕ್ಸಿಕ್: ಎ ಫೇರಿಟೇಲ್ ಫಾರ್ ಗ್ರೋನ್-ಅಪ್ಸ್’ ಸಿನಿಮಾ ಬಿಡುಗಡೆಯಾದ ಮೊದಲ ದಿನವೇ ಬಾಕ್ಸ್ ಆಫೀಸ್‌ನಲ್ಲಿ ಭರ್ಜರಿ ದಾಖಲೆ ಬರೆದಿದೆ. ಆಗಸ್ಟ್ 26ರಂದು ವಿಶ್ವಾದ್ಯಂತ ತೆರೆಕಂಡ ಈ ಚಿತ್ರ ಮೊದಲ ದಿನವೇ ಸುಮಾರು ₹140 ಕೋಟಿ ಗಳಿಸಿದೆ ಎಂದು ವರದಿಯಾಗಿದೆ.

ಚಿತ್ರದ ಭಾರತದಲ್ಲಿನ ಮೊದಲ ದಿನದ ನೆಟ್ ಕಲೆಕ್ಷನ್ ಸುಮಾರು ₹101.10 ಕೋಟಿ ಎಂದು ವರದಿಯಾಗಿದ್ದು, ಒಟ್ಟು ಇಂಡಿಯಾ ಗ್ರಾಸ್ ₹120.75 ಕೋಟಿ ಹಾಗೂ ವಿದೇಶಿ ಮಾರುಕಟ್ಟೆಯಿಂದ ಸುಮಾರು ₹20 ಕೋಟಿ ಗಳಿಸಿದೆ. ಇದರೊಂದಿಗೆ ವಿಶ್ವದಾದ್ಯಂತ ಒಟ್ಟು ಕಲೆಕ್ಷನ್ ಸುಮಾರು ₹140.75 ಕೋಟಿ ತಲುಪಿದೆ.

ಹಿಂದಿ ವರ್ಷನ್‌ದ್ದೇ ಹವಾ!

‘ಟಾಕ್ಸಿಕ್’ ಚಿತ್ರದ ಕಲೆಕ್ಷನ್‌ನಲ್ಲಿ ಗಮನ ಸೆಳೆದಿರುವುದು ಇದರ ಹಿಂದಿ ವರ್ಷನ್. ಮೊದಲ ದಿನ ಹಿಂದಿ ಆವೃತ್ತಿ ಕನ್ನಡ ವರ್ಷನ್‌ಗಿಂತಲೂ ಹೆಚ್ಚು ಗಳಿಕೆ ಮಾಡಿದೆ ಎಂದು ವರದಿಯಾಗಿದೆ. ಆರಂಭಿಕ ವರದಿಗಳ ಪ್ರಕಾರ ಹಿಂದಿ ವರ್ಷನ್ ಸುಮಾರು ₹33.58 ಕೋಟಿ ಗಳಿಸಿದ್ದರೆ, ಕನ್ನಡ ವರ್ಷನ್ ಸೇರಿದಂತೆ ತೆಲುಗು, ತಮಿಳು ಹಾಗೂ ಮಲಯಾಳಂ ಆವೃತ್ತಿಗಳು ಒಟ್ಟಾಗಿ ಸುಮಾರು ₹26.68 ಕೋಟಿ ಗಳಿಸಿವೆ.

ಯಶ್ ಅವರ ಹಿಂದಿನ ಬ್ಲಾಕ್‌ಬಸ್ಟರ್ ‘ಕೆಜಿಎಫ್: ಚಾಪ್ಟರ್ 2’ ಬಳಿಕ ‘ಟಾಕ್ಸಿಕ್’ ಸಿನಿಮಾ ಮೂಲಕ ಅವರು ಮತ್ತೆ ದೊಡ್ಡ ಪರದೆಯಲ್ಲಿ ಕಾಣಿಸಿಕೊಂಡಿದ್ದಾರೆ. ಗೀತೂ ಮೋಹನ್‌ದಾಸ್ ನಿರ್ದೇಶನದ ಈ ಚಿತ್ರದಲ್ಲಿ ಕಿಯಾರಾ ಅಡ್ವಾಣಿ, ನಯನತಾರಾ, ಹುಮಾ ಖುರೇಷಿ, ತಾರಾ ಸುತಾರಿಯಾ ಮತ್ತು ರುಕ್ಮಿಣಿ ವಸಂತ್ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ.

ಮಿಶ್ರ ಪ್ರತಿಕ್ರಿಯೆಗಳ ನಡುವೆಯೂ ‘ಟಾಕ್ಸಿಕ್’ಗೆ ಬಾಕ್ಸ್ ಆಫೀಸ್‌ನಲ್ಲಿ ಸಿಕ್ಕಿರುವ ಆರಂಭ ಯಶ್ ಅಭಿಮಾನಿಗಳ ಸಂಭ್ರಮವನ್ನು ಮತ್ತಷ್ಟು ಹೆಚ್ಚಿಸಿದೆ. ಮುಂದಿನ ದಿನಗಳಲ್ಲಿ ಸಿನಿಮಾ ₹200 ಕೋಟಿ ಕ್ಲಬ್ ಸೇರುತ್ತದೆಯೇ ಎಂಬ ಕುತೂಹಲ ಇದೀಗ ಹೆಚ್ಚಾಗಿದೆ.

s ಯಶ್‌ ಅಭಿನಯದ ಆಕ್ಷನ್–ಕ್ರೈಂ–ಥ್ರಿಲ್ಲರ್ ಸಿನಿಮಾ. ಗೀತು ಮೋಹನ್‌ದಾಸ್ ನಿರ್ದೇಶನದ ಈ ಚಿತ್ರಕ್ಕೆ ಯಶ್‌ ಮತ್ತು ಗೀತು ಮೋಹನ್‌ದಾಸ್ ಕಥೆ ಬರೆದಿದ್ದಾರೆ. ಚಿತ್ರವು ಆಗಸ್ಟ್ 26, 2026ರಂದು ಬಿಡುಗಡೆಯಾಗಿದ್ದು, ಅವಧಿ ಸುಮಾರು 3 ಗಂಟೆ 14 ನಿಮಿಷ.

ಟಾಕ್ಸಿಕ್’ ಕಥೆ ಏನು?

‘ಟಾಕ್ಸಿಕ್’ ಒಂದು ಪೀರಿಯಡ್ ಗ್ಯಾಂಗ್‌ಸ್ಟರ್ ಕಥೆ. ಸಿನಿಮಾ ಗೋವಾದಲ್ಲಿ, 1940ರಿಂದ 1970ರ ದಶಕದ ನಡುವಿನ ಕಾಲಘಟ್ಟದಲ್ಲಿ ನಡೆಯುತ್ತದೆ. ಆ ಸಂದರ್ಭದಲ್ಲಿ ಅಪರಾಧ ಜಗತ್ತಿನಲ್ಲಿ ತನ್ನದೇ ಸಾಮ್ರಾಜ್ಯ ಕಟ್ಟಿಕೊಳ್ಳುವ ರಾಯಾ ಎಂಬ ಗ್ಯಾಂಗ್‌ಸ್ಟರ್‌ನ ಸುತ್ತ ಕಥೆ ಸಾಗುತ್ತದೆ.

ರಾಯಾ ತನ್ನ ಸಾಮ್ರಾಜ್ಯವನ್ನು ಭಯ, ರಕ್ತಪಾತ, ದ್ರೋಹ ಮತ್ತು ಅಧಿಕಾರದ ಆಟದ ಮೂಲಕ ಕಟ್ಟಿಕೊಳ್ಳುತ್ತಾನೆ. ಗೋವಾದ ಸ್ಮಗ್ಲಿಂಗ್ ಜಗತ್ತಿನಲ್ಲಿ ಪ್ರಾಬಲ್ಯ ಸಾಧಿಸಲು ನಡೆಯುವ ಸಂಘರ್ಷದ ನಡುವೆ, ಆತನ ಸುತ್ತಲಿನ ಸಂಬಂಧಗಳು ಮತ್ತು ನಂಬಿಕೆಗಳು ಕೂಡ ಬದಲಾಗುತ್ತವೆ. ಅಧಿಕಾರ ಹೆಚ್ಚಾದಂತೆ ಶತ್ರುಗಳು ಮಾತ್ರವಲ್ಲದೆ, ಆತ ನಂಬಿರುವವರ ಮೇಲೆಯೂ ಅನುಮಾನ ಮೂಡುತ್ತದೆ.

ಚಿತ್ರದ ಪ್ರಮುಖ ಅಂಶ ಅಧಿಕಾರಕ್ಕೆ ಕೊಡುವ ಬೆಲೆ. ರಾಯಾ ತನ್ನ ನಿರ್ಧಾರಗಳು ಮತ್ತು ಹಿಂಸಾತ್ಮಕ ಜೀವನದ ಪರಿಣಾಮಗಳನ್ನು ಎದುರಿಸುತ್ತಾ, ತನ್ನೊಳಗಿನ ಸಂಘರ್ಷ ಹಾಗೂ ಮುಕ್ತಿಯ ಹುಡುಕಾಟದತ್ತ ಸಾಗುತ್ತಾನೆ. ಹೀಗಾಗಿ ಇದು ಕೇವಲ ಗ್ಯಾಂಗ್‌ಸ್ಟರ್‌ಗಳ ನಡುವಿನ ಹೋರಾಟವಲ್ಲದೆ, ನಿಷ್ಠೆ, ದ್ರೋಹ, ಅಧಿಕಾರ, ಅಪರಾಧ ಮತ್ತು ವಿಮೋಚನೆಯ ಕಥೆಯೂ ಆಗಿದೆ