ಇತ್ತೀಚಿನ ದಿನಗಳಲ್ಲಿ ಆನ್‌ಲೈನ್ ಆಧಾರಿತ ಗಿಗ್ ಕೆಲಸಗಳು (Gig Work) ಹೇಗೆ ನಡೆಯುತ್ತವೆ ಮತ್ತು ಅವುಗಳ ಅಲ್ಗಾರಿದಮ್ ಹೇಗೆ ಕೆಲಸ ಮಾಡುತ್ತದೆ ಎಂಬುದನ್ನು ಪ್ರಾಯೋಗಿಕವಾಗಿ ತಿಳಿದುಕೊಳ್ಳಲು ಬೆಂಗಳೂರಿನ ಕಾಲೇಜು ವಿದ್ಯಾರ್ಥಿಯೊಬ್ಬ ವಿಶಿಷ್ಟ ಪ್ರಯತ್ನ ನಡೆಸಿದ್ದಾನೆ. ತನ್ನ ರಜಾ ದಿನಗಳಲ್ಲಿ ಬರೋಬ್ಬರಿ ಮೂರು ತಿಂಗಳು ರ‍್ಯಾಪಿಡೋ (Rapido) ಕ್ಯಾಪ್ಟನ್ ಆಗಿ ಬೈಕ್ ರೈಡ್ ಹಾಗೂ ಫುಡ್ ಡೆಲಿವರಿ ಮಾಡಿದ ಬಿಬಿಎ ದ್ವಿತೀಯ ವರ್ಷದ ವಿದ್ಯಾರ್ಥಿ, ತನ್ನ ಗಳಿಕೆ ಮತ್ತು ವಾಸ್ತವ ಅನುಭವಗಳನ್ನು ಸೋಷಿಯಲ್ ಮೀಡಿಯಾದಲ್ಲಿ ಹಂಚಿಕೊಂಡಿದ್ದು, ವ್ಯಾಪಕ ಪ್ರಶಂಸೆಗೆ ಪಾತ್ರವಾಗಿದೆ.
ಕಾಲೇಜು ರಜೆಯ ಸದುಪಯೋಗ ಮಾಡಿಕೊಳ್ಳಲು ಮತ್ತು ಗಿಗ್ ಎಕಾನಮಿಯ ಒಳಸುಳಿಗಳನ್ನು ಅರ್ಥಮಾಡಿಕೊಳ್ಳಲು ಈ ಸೈಡ್ ಹಸ್ಲಿಂಗ್ (Side Hustle) ಆರಂಭಿಸಿದ ಆತನಿಗೆ ಆರಂಭದಲ್ಲಿ ಪ್ಲಾಟ್‌ಫಾರ್ಮ್ ಹೇಗೆ ಕಾರ್ಯನಿರ್ವಹಿಸುತ್ತದೆ ಎಂಬುದು ಸ್ಪಷ್ಟವಿರಲಿಲ್ಲ. ಆದರೆ ದಿನಗಳು ಕಳೆದಂತೆ ಮೆಜೆಸ್ಟಿಕ್, ರೈಲ್ವೆ ನಿಲ್ದಾಣಗಳು ಮತ್ತು ಜನನಿಬಿಡ ಪ್ರದೇಶಗಳಲ್ಲಿ ಹೆಚ್ಚಿನ ಬೇಡಿಕೆ ಇರುವುದನ್ನು ಗುರುತಿಸಿ ಕೆಲಸ ಮಾಡಲಾರಂಭಿಸಿದನು. ಬೆಳಗ್ಗೆ 8 ಗಂಟೆಯಿಂದ ಸಂಜೆ 4:30 ರವರೆಗೆ ನಿರಂತರವಾಗಿ ದುಡಿಯುತ್ತಿದ್ದ ಈತ, ಇಂಧನ ವೆಚ್ಚವನ್ನು ಹೊರತುಪಡಿಸಿ ದಿನಕ್ಕೆ ಸರಾಸರಿ 1,200 ರೂ.ವರೆಗೆ ಆದಾಯ ಗಳಿಸುತ್ತಿದ್ದ. ಮಧ್ಯಾಹ್ನದ ವೇಳೆ ರೈಡ್‌ಗಳು ಕಡಿಮೆಯಾದಾಗ ಫುಡ್ ಡೆಲಿವರಿ ಮೂಲಕ ಪರ್ಯಾಯ ಆದಾಯ ಕಂಡುಕೊಂಡಿದ್ದ.
ತನ್ನ ಗಳಿಕೆಯ ಅಧಿಕೃತ ಡ್ಯಾಶ್‌ಬೋರ್ಡ್ ಸ್ಕ್ರೀನ್‌ಶಾಟ್‌ಗಳನ್ನು ಹಂಚಿಕೊಂಡಿರುವ ವಿದ್ಯಾರ್ಥಿ, ಮೇ ತಿಂಗಳಲ್ಲಿ 96 ಆರ್ಡರ್‌ಗಳಿಂದ 5,650 ರೂ., ಜೂನ್‌ನಲ್ಲಿ 16,660 ರೂ. ಹಾಗೂ ಜುಲೈ ತಿಂಗಳಲ್ಲಿ 233 ಆರ್ಡರ್‌ಗಳನ್ನು ಪೂರ್ಣಗೊಳಿಸಿ 14,222 ರೂ. ಗಳಿಸಿದ್ದಾಗಿ ವಿವರಿಸಿದ್ದಾನೆ. ಈ ಮೂರು ತಿಂಗಳ ಅವಧಿಯಲ್ಲಿ ಆಟೋ ಚಾಲಕರಿಂದ ತನಗೆ ಯಾವುದೇ ರೀತಿಯ ಬೆದರಿಕೆ ಅಥವಾ ಅಡ್ಡಿಗಳು ಎದುರಾಗಲಿಲ್ಲ ಎಂದೂ ಆತ ಸ್ಪಷ್ಟಪಡಿಸಿದ್ದಾನೆ.
“ಇದು ಕೇವಲ ದಿನಕ್ಕೆ 1,200 ರೂ. ದುಡಿಯುವ ವಿಚಾರವಾಗಿರಲಿಲ್ಲ. ನಿರಂತರ ಕಾಯುವಿಕೆ, ಪೆಟ್ರೋಲ್ ವೆಚ್ಚ, ಅನಿಶ್ಚಿತತೆ, ಆ್ಯಪ್ ನಿಯಮಗಳು, ಗ್ರಾಹಕರ ಮತ್ತು ರೆಸ್ಟೋರೆಂಟ್‌ಗಳ ಸಮಸ್ಯೆಗಳು ಹಾಗೂ ನಿರಂತರ ಚಲಿಸುತ್ತಲೇ ಇರಬೇಕಾದ ಒತ್ತಡದ ನಡುವೆ ಗಿಗ್ ಕಾರ್ಮಿಕರ ನೈಜ ಬದುಕು ಎಷ್ಟೊಂದು ಸವಾಲಿನಿಂದ ಕೂಡಿದೆ ಎಂಬುದನ್ನು ನಾನು ಹತ್ತಿರದಿಂದ ಕಂಡುಕೊಂಡೆ” ಎಂದು ವಿದ್ಯಾರ್ಥಿ ಬರೆದುಕೊಂಡಿದ್ದಾನೆ. ಈ ಪೋಸ್ಟ್‌ಗೆ ನೆಟ್ಟಿಗರಿಂದ ಭಾರಿ ಮೆಚ್ಚುಗೆ ವ್ಯಕ್ತವಾಗಿದ್ದು, ಬರೀ ಪುಸ್ತಕದ ಜ್ಞಾನಕ್ಕೆ ಸೀಮಿತವಾಗದೆ ವಾಸ್ತವ ಸವಾಲುಗಳನ್ನು ಅರಿತುಕೊಂಡ ಯುವಕನ ಪ್ರಬುದ್ಧತೆಗೆ ಶ್ಲಾಘನೆಗಳು ಹರಿದುಬರುತ್ತಿವೆ.
