ಈಗಾಗಲೇ ವಿಶ್ವದ ಹಲವು ದೇಶಗಳು ಪಾಲಿಮರ್‌ (ಪ್ಲಾಸ್ಟಿಕ್‌) ನೋಟುಗಳನ್ನು ಮುದ್ರಿಸಿ ಚಲಾವಣೆಗೆ ತಂದಿವೆ. ಈ ನೋಟುಗಳು ನೀರಿನಲ್ಲಿ ನೆನೆದು ಹಾಳಾಗುವುದಿಲ್ಲ, ಹರಿದು ಹೋಗುವುದಿಲ್ಲ. ಹೀಗಾಗಿ ಹಲವು ದೇಶಗಳು ಹಂತ ಹಂತವಾಗಿ ಪಾಲಿಮರ್‌ ನೋಟುಗಳ ಮುದ್ರಣದತ್ತ ಹೆಜ್ಜೆ ಇಡುತ್ತಿವೆ.
ಹಳೆಯ ಕಾಗದದ ನೋಟುಗಳಿಗೆ ವಿದಾಯ ಹೇಳುವ ಸಮಯ ಸಮೀಪಿಸುತ್ತಿದೆಯೇ? ನೋಟುಗಳ ಬಾಳಿಕೆ ಹೆಚ್ಚಿಸುವ ಉದ್ದೇಶದಿಂದ ವಿಶ್ವದ ಹಲವು ರಾಷ್ಟ್ರಗಳು ಈಗಾಗಲೇ ಪಾಲಿಮರ್‌ (ಪ್ಲಾಸ್ಟಿಕ್‌) ಕರೆನ್ಸಿಯನ್ನು ಬಳಸುತ್ತಿವೆ. ಇದೇ ಮಾದರಿಯಲ್ಲಿ ಭಾರತದಲ್ಲೂ ಹೊಸ ರೀತಿಯ ಪಾಲಿಮರ್‌ ನೋಟುಗಳ ಪರಿಚಯಕ್ಕೆ ಕೇಂದ್ರ ಸರ್ಕಾರ ಚಿಂತನೆ ನಡೆಸಿದ್ದು, ಮೊದಲ ಹಂತದಲ್ಲಿ ₹10 ಮತ್ತು ₹20 ಮೌಲ್ಯದ ನೋಟುಗಳನ್ನು ಚಲಾವಣೆಗೆ ತರುವ ಸಾಧ್ಯತೆ ಇದೆ.
ಭಾರತವೂ ಶೀಘ್ರದಲ್ಲೇ ಪಾಲಿಮರ್‌ ಕರೆನ್ಸಿ ನೋಟುಗಳನ್ನು ಚಲಾವಣೆಗೆ ತರುವ ಬಗ್ಗೆ ಚಿಂತನೆ ನಡೆಸುತ್ತಿದೆ. ಈ ವರ್ಷದ ಅಂತ್ಯದ ವೇಳೆಗೆ ಮೊದಲ ಹಂತವಾಗಿ ₹10 ಮತ್ತು ₹20 ಮೌಲ್ಯದ ಪ್ಲಾಸ್ಟಿಕ್‌ ನೋಟುಗಳನ್ನು ಮುದ್ರಿಸಿ ಚಲಾವಣೆಗೆ ತರಲು ಕೇಂದ್ರ ಸರ್ಕಾರ ಯೋಜಿಸಿದೆ ಎಂದು ವರದಿಯಾಗಿದೆ.
ಈ ನಡುವೆ, ಆಂಧ್ರಪ್ರದೇಶದ ಅಮಲಾಪುರಂ ಮೂಲದ ಕರೆನ್ಸಿ ನೋಟು ಸಂಗ್ರಹಕಾರ ಪುತ್ಸಾ ಕೃಷ್ಣ ಕಾಮೇಶ್ವರ್‌ ಅವರು ವಿಶ್ವದ ವಿವಿಧ ದೇಶಗಳು ಮುದ್ರಿಸಿರುವ ಪಾಲಿಮರ್‌ ನೋಟುಗಳನ್ನು ಸಂಗ್ರಹಿಸಿದ್ದಾರೆ. ಅವರು ಈಗಾಗಲೇ 68 ದೇಶಗಳಿಗೆ ಸೇರಿದ 144 ಪಾಲಿಮರ್‌ ಕರೆನ್ಸಿ ನೋಟುಗಳನ್ನು ಸಂಗ್ರಹಿಸಿದ್ದಾರೆ.
ಭಾರತದ ಹವಾಮಾನ ಪರಿಸ್ಥಿತಿಯನ್ನು ಗಮನದಲ್ಲಿಟ್ಟುಕೊಂಡು ಸುಮಾರು ಹನ್ನೆರಡು ವರ್ಷಗಳ ಹಿಂದೆಯೇ ಪಾಲಿಮರ್‌ ನೋಟುಗಳನ್ನು ಪರಿಚಯಿಸುವ ಬಗ್ಗೆ ಭಾರತೀಯ ರಿಸರ್ವ್‌ ಬ್ಯಾಂಕ್‌ (RBI) ಚಿಂತನೆ ನಡೆಸಿತ್ತು. ಆದರೆ, ಭಾರತದ ಪರಿಸ್ಥಿತಿಗೆ ಇದು ಸೂಕ್ತವಾಗುವುದಿಲ್ಲ ಎಂದು ಭಾವಿಸಿ ಆ ಯೋಜನೆಯನ್ನು ಕೈಬಿಡಲಾಗಿತ್ತು ಎಂದು ಕೃಷ್ಣ ಕಾಮೇಶ್ವರ್‌ ತಿಳಿಸಿದ್ದಾರೆ.ಅವರು ತಮ್ಮ ಸಂಗ್ರಹದಲ್ಲಿರುವ ವಿವಿಧ ದೇಶಗಳ ಪಾಲಿಮರ್‌ ಕರೆನ್ಸಿ ನೋಟುಗಳನ್ನು ಮಾಧ್ಯಮಗಳಿಗೆ ಪ್ರದರ್ಶಿಸಿದ್ದಾರೆ.
