ಮನೆಯಲ್ಲಿ ಸಣ್ಣಪುಟ್ಟ ಪಾರ್ಟಿ ಇರಲಿ ಅಥವಾ ಮಧ್ಯ ವಾರದಲ್ಲಿ ಸಂಜೆ ಹೊತ್ತು ಏನಾದರೂ ಬಿಸಿಬಿಸಿಯಾಗಿ ಮತ್ತು ರುಚಿಕರವಾಗಿ ತಿನ್ನಬೇಕು ಎನಿಸಿದರೆ ಚೀಸಿ ಪನೀರ್ ಸಿಗಾರ್ ರೋಲ್ ಅತ್ಯುತ್ತಮ ಆಯ್ಕೆಯಾಗಿದೆ. ಪನೀರ್ ಮತ್ತು ಚೀಸ್‌ನ ಅದ್ಭುತ ಸಂಯೋಜನೆಯನ್ನು ಹೊಂದಿರುವ ಈ ತಿಂಡಿ ಮಕ್ಕಳಿಂದ ಹಿಡಿದು ದೊಡ್ಡವರವರೆಗೆ ಎಲ್ಲರಿಗೂ ಇಷ್ಟವಾಗುತ್ತದೆ. ಹೋಟೆಲ್ ಶೈಲಿಯಲ್ಲೇ ಮನೆಯಲ್ಲಿ ಗರಿಗರಿಯಾದ ಚೀಸಿ ಪನೀರ್ ಸಿಗಾರ್ ರೋಲ್ ತಯಾರಿಸುವ ಸುಲಭ ವಿಧಾನ ಇಲ್ಲಿದೆ.
ಬೇಕಾಗುವ ಪದಾರ್ಥಗಳು:
- ಮೈದಾ ಹಿಟ್ಟು – ಅಗತ್ಯಕ್ಕೆ ತಕ್ಕಷ್ಟು
- ತುರಿದ ಪನೀರ್ – 1 ಕಪ್
- ತುರಿದ ಚೀಸ್ – ಅರ್ಧ ಕಪ್
- ಸಣ್ಣದಾಗಿ ಹೆಚ್ಚಿದ ದಪ್ಪಮೆಣಸಿನಕಾಯಿ (ಕ್ಯಾಪ್ಸಿಕಂ) – ಅರ್ಧ ಕಪ್
- ಸಣ್ಣದಾಗಿ ಹೆಚ್ಚಿದ ಹಸಿರು ಈರುಳ್ಳಿ (ಸ್ಪ್ರಿಂಗ್ ಆನಿಯನ್) – ಅರ್ಧ ಕಪ್
- ಕೊತ್ತಂಬರಿ ಸೊಪ್ಪು – 2 ಚಮಚ
- ಜಜ್ಜಿದ ಬೆಳ್ಳುಳ್ಳಿ – 1 ಚಮಚ
- ಕಾಳುಮೆಣಸಿನ ಪುಡಿ (ಪೆಪ್ಪರ್ ಪೌಡರ್) – 1 ಚಮಚ
- ರುಚಿಗೆ ತಕ್ಕಷ್ಟು ಉಪ್ಪು
- ಕರಿಯಲು ಎಣ್ಣೆ
ತಯಾರಿಸುವ ವಿಧಾನ:
ಮೊದಲಿಗೆ ಒಂದು ಪಾತ್ರೆಯಲ್ಲಿ ಮೈದಾ ಹಿಟ್ಟನ್ನು ತೆಗೆದುಕೊಂಡು, ನೀರು ಸೇರಿಸಿ ಮೃದುವಾಗಿ ಕಲಸಿ ಅರ್ಧ ಗಂಟೆಗಳ ಕಾಲ ನೆನೆಯಲು ಪಕ್ಕಕ್ಕೆ ಇಡಿ. ಈ ನಡುವೆ ಒಳಗಿನ ಹೂರಣವನ್ನು ಸಿದ್ಧಪಡಿಸಿಕೊಳ್ಳಿ. ಒಂದು ಬೌಲ್‌ನಲ್ಲಿ ತುರಿದ ಪನೀರ್, ಚೀಸ್, ಹೆಚ್ಚಿದ ಕ್ಯಾಪ್ಸಿಕಂ, ಹಸಿರು ಈರುಳ್ಳಿ, ಜಜ್ಜಿದ ಬೆಳ್ಳುಳ್ಳಿ, ಕೊತ್ತಂಬರಿ ಸೊಪ್ಪು, ಕಾಳುಮೆಣಸಿನ ಪುಡಿ ಮತ್ತು ಉಪ್ಪನ್ನು ಹಾಕಿ ಚೆನ್ನಾಗಿ ಮಿಶ್ರಣ ಮಾಡಿ ಹೂರಣ ತಯಾರಿಸಿಕೊಳ್ಳಿ.
ಈಗ ಕಲಸಿದ ಹಿಟ್ಟನ್ನು ಮತ್ತೊಮ್ಮೆ ನಾದಿಕೊಂಡು ಸಣ್ಣ ಸಣ್ಣ ಉಂಡೆಗಳನ್ನು ಮಾಡಿ, ಅತ್ಯಂತ ತೆಳುವಾದ ಚಪಾತಿಗಳಂತೆ ಲಟ್ಟಿಸಿಕೊಳ್ಳಿ. ಹೆಚ್ಚು ಗರಿಗರಿಯಾಗಿ ಬರಲು, ಒಂದು ತೆಳು ಚಪಾತಿಯ ಮೇಲೆ ಸ್ವಲ್ಪ ಎಣ್ಣೆ ಸವರಿ, ಒಣ ಹಿಟ್ಟು ಉದುರಿಸಿ ಅದರ ಮೇಲೆ ಮತ್ತೊಂದು ಚಪಾತಿ ಇಟ್ಟು ಎರಡನ್ನೂ ಒಟ್ಟಿಗೆ ಸೇರಿಸಿ ಮತ್ತೊಮ್ಮೆ ತೆಳುವಾಗಿ ಲಟ್ಟಿಸಬಹುದು. ನಂತರ ತವಾವನ್ನು ಬಿಸಿ ಮಾಡಿ ಈ ಚಪಾತಿಗಳನ್ನು ಎರಡೂ ಬದಿಯಲ್ಲಿ ಹಗುರವಾಗಿ (ಹೆಚ್ಚು ಬೇಯಿಸದೆ) ಲಘುವಾಗಿ ಸುಟ್ಟುಕೊಳ್ಳಿ. ಸುಟ್ಟ ನಂತರ ಇವುಗಳು ಸುಲಭವಾಗಿ ಪರಸ್ಪರ ಬೇರೆಯಾಗುತ್ತವೆ. ಇವುಗಳನ್ನು ಒಣಗದಂತೆ ಬಟ್ಟೆಯಲ್ಲಿ ಮುಚ್ಚಿಡಿ.
ನಂತರ ರೋಲ್‌ಗಳನ್ನು ಅಂಟಿಸಲು ಒಂದು ಸಣ್ಣ ಬೌಲ್‌ನಲ್ಲಿ ಸ್ವಲ್ಪ ಮೈದಾ ಹಿಟ್ಟು ಮತ್ತು ನೀರು ಸೇರಿಸಿ ದಪ್ಪನೆಯ ಪೇಸ್ಟ್ (ಸ್ಲರಿ) ತಯಾರಿಸಿ ಇಟ್ಟುಕೊಳ್ಳಿ. ಈಗ ಸಿದ್ಧಪಡಿಸಿದ ಒಂದು ತೆಳು ಚಪಾತಿಯನ್ನು ತೆಗೆದುಕೊಂಡು ಅದರ ಅಂಚುಗಳಿಗೆ ಮೈದಾ ಪೇಸ್ಟ್ ಸವರಬೇಕು. ಚಪಾತಿಯ ಮಧ್ಯದಲ್ಲಿ ಪನೀರ್ ಮಿಶ್ರಣದ ಹೂರಣವನ್ನು ಉದ್ದವಾಗಿ ಇಟ್ಟು, ಎರಡು ಬದಿಗಳ ಅಂಚನ್ನು ಒಳಗಡೆಗೆ ಮಡಚಿ, ಸಿಗಾರ್ ಮಾದರಿಯಲ್ಲಿ ರೋಲ್ ಮಾಡಿ ಕೊನೆಯ ಭಾಗವನ್ನು ಭದ್ರವಾಗಿ ಅಂಟಿಸಿ. ಇದೇ ರೀತಿ ಎಲ್ಲಾ ರೋಲ್‌ಗಳನ್ನು ಸಿದ್ಧಪಡಿಸಿಕೊಳ್ಳಿ. ಕೊನೆಯದಾಗಿ ಬಾಣಲೆಯಲ್ಲಿ ಎಣ್ಣೆ ಬಿಸಿ ಮಾಡಿ, ಸಿದ್ಧಪಡಿಸಿದ ರೋಲ್‌ಗಳನ್ನು ಕಡಿಮೆ ಹಾಗೂ ಮಧ್ಯಮ ಉರಿಯಲ್ಲಿ ಗೋಲ್ಡನ್ ಬ್ರೌನ್ ಬಣ್ಣ ಬರುವವರೆಗೆ ಗರಿಗರಿಯಾಗಿ ಕರಿಯಿರಿ. ಈಗ ಬಿಸಿಬಿಸಿಯಾದ ಚೀಸಿ ಪನೀರ್ ಸಿಗಾರ್ ರೋಲ್ ಸವಿಯಲು ಸಿದ್ಧವಾಗಿದ್ದು, ಇದನ್ನು ಚಿಲ್ಲಿ ಗಾರ್ಲಿಕ್ ಡಿಪ್ ಅಥವಾ ಟೊಮೆಟೊ ಸಾಸ್ ಜೊತೆ ಸವಿಯಬಹುದು.
