ಬೆಳಗಿನ ಉಪಹಾರಕ್ಕೆ ಸಾಂಪ್ರದಾಯಿಕ ಆಹಾರವಾದ ಇಡ್ಲಿಯನ್ನು ಇಷ್ಟಪಡದವರಿಲ್ಲ. ದಕ್ಷಿಣ ಭಾರತದ ಮನೆ ಮನೆಗಳಲ್ಲೂ ಪ್ರತಿದಿನ ತಯಾರಾಗುವ ಈ ತಿಂಡಿ ಕೇವಲ ರುಚಿಕರವಷ್ಟೇ ಅಲ್ಲ, ಜೀರ್ಣಕ್ರಿಯೆಗೂ ಅತ್ಯುತ್ತಮ ಎನ್ನಲಾಗುತ್ತದೆ. ತೂಕ ಇಳಿಸಿಕೊಳ್ಳಲು ಬಯಸುವವರು ಹಾಗೂ ಫಿಟ್ನೆಸ್ ಪ್ರಿಯರು ಹೆಚ್ಚಾಗಿ ಇಡ್ಲಿಯನ್ನೇ ಆಯ್ಕೆ ಮಾಡಿಕೊಳ್ಳುತ್ತಾರೆ. ಆದರೆ, ತೂಕ ನಿಯಂತ್ರಣದಲ್ಲಿಡಲು ಬಯಸುವವರ ಮನಸ್ಸಿನಲ್ಲಿ ಮೂಡುವ ಮೊದಲ ಪ್ರಶ್ನೆ ಎಂದರೆ ಇಡ್ಲಿಯಲ್ಲಿ ಎಷ್ಟು ಕ್ಯಾಲೋರಿ ಇರುತ್ತದೆ ಎಂಬುದು.
ಸಾಮಾನ್ಯವಾಗಿ ಹಬೆಯಲ್ಲಿ ಬೇಯಿಸುವ ಇಡ್ಲಿಯಲ್ಲಿ ಬೇರೆ ತಿಂಡಿಗಳಿಗೆ ಹೋಲಿಸಿದರೆ ಅತ್ಯಂತ ಕಡಿಮೆ ಪ್ರಮಾಣದ ಕ್ಯಾಲೋರಿ ಇರುತ್ತದೆ. ಅಕ್ಕಿ ಮತ್ತು ಉದ್ದಿನಬೇಳೆಯನ್ನು ಬಳಸಿ ಇದನ್ನು ತಯಾರಿಸುವುದರಿಂದ, ಒಂದು ಸಾಧಾರಣ ಗಾತ್ರದ ಇಡ್ಲಿಯಲ್ಲಿ ಅಂದಾಜು 40 ರಿಂದ 60 ಕ್ಯಾಲೋರಿಗಳು ಇರುತ್ತವೆ. ಇದರಲ್ಲಿ ಎಣ್ಣೆಯ ಅಂಶ ಇಲ್ಲದಿರುವುದರಿಂದ ಹೃದಯದ ಆರೋಗ್ಯಕ್ಕೂ ಇದು ಒಳ್ಳೆಯದು. ಪ್ರೊಟೀನ್ ಮತ್ತು ಕಾರ್ಬೋಹೈಡ್ರೇಟ್ ಸಮತೋಲನದಲ್ಲಿ ಇರುವುದರಿಂದ ದೇಹಕ್ಕೆ ಅಗತ್ಯವಾದ ಶಕ್ತಿಯನ್ನು ಇದು ನೀಡುತ್ತದೆ.
ಆದರೆ ಇಡ್ಲಿ ಸೇವಿಸುವಾಗ ನಾವು ಅದರ ಜೊತೆ ಬಳಸುವ ಪದಾರ್ಥಗಳ ಕಡೆಗೂ ಗಮನ ಹರಿಸುವುದು ಮುಖ್ಯವಾಗುತ್ತದೆ. ಇಡ್ಲಿಯಲ್ಲಿ ಕ್ಯಾಲೋರಿ ಪ್ರಮಾಣ ಕಡಿಮೆ ಇದ್ದರೂ, ಅದರ ಜೊತೆಗೆ ನಂಜಿಕೊಳ್ಳಲು ಬಳಸುವ ಕಾಯಿ ಚಟ್ನಿಯಲ್ಲಿ ಕೊಬ್ಬಿನಂಶ ಮತ್ತು ಕ್ಯಾಲೋರಿ ಹೆಚ್ಚಿರುತ್ತದೆ. ಹಾಗಾಗಿ, ತೂಕ ಇಳಿಸುವ ಜರ್ನಿಯಲ್ಲಿ ಇರುವವರು ಕಾಯಿ ಚಟ್ನಿಯ ಬದಲಾಗಿ ತರಕಾರಿ ಸಾಂಬಾರ್ ಅಥವಾ ಪುದೀನಾ ಚಟ್ನಿಯನ್ನು ಬಳಸುವುದರಿಂದ ದೇಹಕ್ಕೆ ಹೆಚ್ಚಿನ ಪೋಷಕಾಂಶಗಳು ಸಿಗುತ್ತವೆ.
ಸದ್ಯದ ದಿನಗಳಲ್ಲಿ ಆರೋಗ್ಯದ ದೃಷ್ಟಿಯಿಂದ ರವೆ ಇಡ್ಲಿ, ರಾಗಿ ಇಡ್ಲಿ ಹಾಗೂ ಓಟ್ಸ್ ಇಡ್ಲಿಗಳ ಬಳಕೆಯೂ ಹೆಚ್ಚಾಗುತ್ತಿದೆ. ಅಕ್ಕಿ ಇಡ್ಲಿಗೆ ಹೋಲಿಸಿದರೆ ಇವುಗಳಲ್ಲಿ ನಾರಿನಂಶ ಹೆಚ್ಚಿರುತ್ತದೆ. ಒಟ್ಟಾರೆಯಾಗಿ ಹೇಳುವುದಾದರೆ, ಇಡ್ಲಿಯು ಆರೋಗ್ಯಕರ ಉಪಹಾರ ಹೌದಾದರೂ, ನಮಗೆ ಬೇಕಾದ ಕ್ಯಾಲೋರಿ ಪ್ರಮಾಣಕ್ಕೆ ತಕ್ಕಂತೆ ಮಿತವಾಗಿ ಸೇವಿಸುವುದು ಉತ್ತಮ ಎನ್ನುತ್ತಾರೆ ಆಹಾರ ತಜ್ಞರು.
