ಬಿಗ್‌ಬಾಸ್ ಮನೆಗೆ ಕಳ್ಸಿ, ನನ್ನ ಟ್ಯಾಲೆಂಟ್ ತೋರಿಸ್ತೀನಿ :ವೀಡಿಯೋ ಮೂಲಕ ಪೊಲೀಸ್ ಎಸ್‌ಐ ಮನವಿ ವೈರಲ್

ಬೆಂಗಳೂರು: ಅತ್ತ ಕನ್ನಡದಲ್ಲಿ ಬಿಗ್‌ಬಾಸ್ ಸೀಸನ್ 13ಕ್ಕೆ ಭರ್ಜರಿ ಕೌಂಟ್‌ಡೌನ್ ಶುರುವಾಗಿದ್ದರೆ, ಇತ್ತ ನೆರೆಯ ಆಂಧ್ರದಲ್ಲಿ ತೆಲುಗು ಬಿಗ್‌ಬಾಸ್ ಸೀಸನ್ 10ರ ಹವಾ ಜೋರಾಗಿದೆ. ಜಿಯೋ ಹಾಟ್‌ಸ್ಟಾರ್‌ನಲ್ಲಿ ಕಾಮನ್ ಮ್ಯಾನ್ ಆಡಿಷನ್‌ಗೆ ಜನ ಮುಗಿಬೀಳುತ್ತಿದ್ದಾರೆ. ಆದರೆ ಈ ನಡುವೆ ಆಂಧ್ರಪ್ರದೇಶದ ಪೊಲೀಸ್ ಸಬ್‌ ಇನ್ಸ್‌ಪೆಕ್ಟರ್ (SI) ಒಬ್ಬರು ಮಾಡಿರುವ ವಿಡಿಯೋ ಇಡೀ ಸೋಶಿಯಲ್ ಮೀಡಿಯಾದಲ್ಲಿ ಸಂಚಲನ ಸೃಷ್ಟಿಸಿದೆ

ಸಾಮಾನ್ಯವಾಗಿ ಬಿಗ್‌ಬಾಸ್ ಮತ್ತು ಪೊಲೀಸರಿಗೆ ಹಳೆ ನಂಟು. ಈ ಹಿಂದೆ ಕನ್ನಡ ಬಿಗ್‌ಬಾಸ್ ಮನೆಯೊಳಗೆ ನುಗ್ಗಿ ವರ್ತೂರು ಸಂತೋಷ್ ಅವರನ್ನೇ ಪೊಲೀಸರು ಅರೆಸ್ಟ್ ಮಾಡಿದ್ದ ಉದಾಹರಣೆ ಕಣ್ಣಮುಂದಿದೆ. ಆದರೆ ಇದೀಗ ಇತಿಹಾಸದಲ್ಲೇ ಮೊದಲ ಬಾರಿಗೆ, ಹಾಲಿ ಕರ್ತವ್ಯದಲ್ಲಿರುವ ಪೊಲೀಸ್ ಅಧಿಕಾರಿಯೊಬ್ಬರು “ನನ್ನನ್ನು ಬಿಗ್‌ಬಾಸ್ ಮನೆಗೆ ಕಳಿಸಿ” ಎಂದು ಆಯೋಜಕರಲ್ಲಿ ಬಹಿರಂಗವಾಗಿ ಬೇಡಿಕೆ ಇಟ್ಟಿದ್ದಾರೆ

ನನ್ನ ಧೈರ್ಯ ತೋರಿಸ್ತೀನಿ ಅವಕಾಶ ಕೊಡಿ’: ವಿಡಿಯೋದಲ್ಲಿ ಏನಿದೆ?

ಆಂಧ್ರಪ್ರದೇಶದ ನಂದ್ಯಾಲ ಜಿಲ್ಲೆಯ ಗಡಿವೇಮುಲ ಪೊಲೀಸ್ ಠಾಣೆಯ ಎಸ್‌ಐ ಆಗಿರುವ ನಾಗಾರ್ಜುನ ರೆಡ್ಡಿ ಎಂಬುವವರೇ ಈ ವಿಡಿಯೋ ಧಮಾಕಾ ಮಾಡಿದವರು. ಖಡಕ್ ಪೊಲೀಸ್ ಸಮವಸ್ತ್ರ (Uniform) ಧರಿಸಿಕೊಂಡೇ ವಿಡಿಯೋ ಮಾಡಿರುವ ಅವರು:

“ನಾನು ಬಹಳ ಆತ್ಮವಿಶ್ವಾಸ ಮತ್ತು ಧೈರ್ಯವಿರುವ ವ್ಯಕ್ತಿ. ಬಿಗ್‌ಬಾಸ್ ಮನೆಯಲ್ಲಿ ಎಷ್ಟೋ ಸವಾಲುಗಳಿರುತ್ತವೆ ಎಂದು ನನಗೆ ಗೊತ್ತು. ಗ್ರಾಮೀಣ ಭಾಗದ ನನಗೆ ದೊಡ್ಮನೆ ಒಳಗೆ ಹೋಗುವ ಅವಕಾಶ ಸಿಕ್ಕರೆ ನನ್ನ ನಿಜವಾದ ವ್ಯಕ್ತಿತ್ವ, ಪ್ರತಿಭೆಯನ್ನು ಪ್ರದರ್ಶಿಸಿ ಎಲ್ಲರ ಮನಗೆದ್ದು ವಿನ್ನರ್ ಆಗ್ತೀನಿ. ಆದಷ್ಟು ಬೇಗ ಬಿಗ್‌ಬಾಸ್ ಮನೆಯಲ್ಲಿ ಸಿಗೋಣ” ಎಂದು ಬಿಗ್‌ಬಾಸ್ ಆಯೋಜಕರು ಹಾಗೂ ನಟ ನಾಗಾರ್ಜುನ್ ಅವರಿಗೆ ಮನವಿ ಮಾಡಿದ್ದಾರೆ.

ಹುಬ್ಬೇರಿಸಿದ ಹಿರಿಯ ಅಧಿಕಾರಿಗಳು: ನೆಟ್ಟಿಗರ ಪ್ರಶ್ನೆಗಳೇನು?

ಎಸ್‌ಐ ನಾಗಾರ್ಜುನ ರೆಡ್ಡಿ ಅವರ ವಿಡಿಯೋ ವೈರಲ್ ಆಗುತ್ತಿದ್ದಂತೆ ಸೋಶಿಯಲ್ ಮೀಡಿಯಾದಲ್ಲಿ ಭಾರಿ ಚರ್ಚೆ ಶುರುವಾಗಿದೆ.

ಯೂನಿಫಾರ್ಮ್ ರೂಲ್ಸ್ ಬ್ರೇಕ್ ಆಯ್ತಾ?: ಪೊಲೀಸ್ ಸಮವಸ್ತ್ರ ಧರಿಸಿ, ಇಲಾಖೆಯ ಕರ್ತವ್ಯದ ಅವಧಿಯಲ್ಲಿ ವೈಯಕ್ತಿಕ ರಿಯಾಲಿಟಿ ಶೋಗಳ ಪ್ರಚಾರಕ್ಕಾಗಿ ಈ ರೀತಿ ವಿಡಿಯೋ ಮಾಡುವುದು ಕಾನೂನುಬದ್ಧವೇ? ಎಂದು ಹಲವರು ಪ್ರಶ್ನಿಸುತ್ತಿದ್ದಾರೆ.

ಸರ್ಕಾರಿ ನೌಕರರಿಗೆ ಅವಕಾಶವಿದೆಯೇ?: ಸರ್ಕಾರಿ ಕೆಲಸದಲ್ಲಿರುವವರು ಇಲಾಖೆಯ ಪೂರ್ವಾನುಮತಿ ಇಲ್ಲದೆ ಇಂತಹ ಖಾಸಗಿ ಶೋಗಳಲ್ಲಿ ಭಾಗವಹಿಸಲು ರೂಲ್ಸ್ ಒಪ್ಪುತ್ತಾ? ಒಂದು ವೇಳೆ ಹಿರಿಯ ಅಧಿಕಾರಿಗಳ ಕಣ್ಣಿಗೆ ಬಿದ್ದರೆ ಈ ಎಸ್‌ಐಗೆ ಸಂಕಷ್ಟ ಕಾಯಂ ಎಂಬ ಮಾತುಗಳು ಕೇಳಿಬರುತ್ತಿವೆ.

ಕಳೆದ ಸೀಸನ್ 9ರ ‘ಅಗ್ನಿಪರೀಕ್ಷೆ’ಯಲ್ಲಿ ಭಾರತೀಯ ಸೇನೆಯಲ್ಲಿದ್ದ ಕಲ್ಯಾಣ್ ಎಂಬ ಸಾಮಾನ್ಯ ವ್ಯಕ್ತಿ ಹೋಗಿದ್ದರು. ಹಾಗಾಗಿ ಈ ಬಾರಿ ಎಸ್‌ಐ ನಾಗಾರ್ಜುನ ರೆಡ್ಡಿ ಹೋದರೆ ತಪ್ಪೇನು ಎಂದು ಅವರ ಪರ ಬ್ಯಾಟ್ ಬೀಸುವವರೂ ಇದ್ದಾರೆ.

ಅತ್ತ ಕನ್ನಡದಲ್ಲೂ ಕಾಮನ್ ಮ್ಯಾನ್ ಕ್ರೇಜ್

ಕನ್ನಡ ಬಿಗ್‌ಬಾಸ್ ಸೀಸನ್ 13ರಲ್ಲೂ ಈ ಬಾರಿ ಸಾಮಾನ್ಯ ಜನರಿಗೆ ಭರ್ಜರಿ ಆಫರ್ ನೀಡಲಾಗಿದೆ. ಬಿಗ್‌ಬಾಸ್ ಆಯ್ಕೆ ಸಮಿತಿಯ ಗಮನ ಸೆಳೆಯಲು ಸಾವಿರಾರು ಕನ್ನಡಿಗರು ವಿಶಿಷ್ಟ ತಂತ್ರಗಳನ್ನು ಬಳಸಿ ವಿಡಿಯೋ ಮಾಡಿ ಜಿಯೋ ಹಾಟ್‌ಸ್ಟಾರ್‌ನಲ್ಲಿ ಅಪ್‌ಲೋಡ್ ಮಾಡುತ್ತಿದ್ದಾರೆ. ಚಿತ್ರನಟಿ ಸಂಜನಾ ಗರ್ಲಾನಿ ಸೇರಿದಂತೆ ಹಲವರು ಈ ಹಿಂದೆ ತೆಲುಗಿನಲ್ಲಿ ಮಿಂಚಿದ್ದರು, ಈ ಬಾರಿ ಕರ್ನಾಟಕದ ಯಾರೆಲ್ಲಾ ಲಕ್ ಪರೀಕ್ಷಿಸಿಕೊಳ್ಳಲಿದ್ದಾರೆ ಎಂಬ ಕುತೂಹಲ ಹೆಚ್ಚಾಗಿದೆ.