ಬ್ಯಾಂಕ್ ಆಫ್ ಇಂಡಿಯಾ ವಸೂಲಾತಿ ಪ್ರಕರಣದಲ್ಲಿ ಪರಾರಿಯಾಗಿರುವ ನೀರವ್ ಮೋದಿ ವಿರುದ್ಧ ಮಹತ್ವದ ತೀರ್ಪು ನೀಡಿದ ಲಂಡನ್ ಕೋರ್ಟ್

ಲಂಡನ್: ಲಂಡನ್ ನ್ಯಾಯಾಲಯವು ಬ್ಯಾಂಕ್ ಆಫ್ ಇಂಡಿಯಾದ ವಸೂಲಾತಿ ಪ್ರಕರಣದಲ್ಲಿ ಪರಾರಿಯಾಗಿರುವ ವಜ್ರದ ವ್ಯಾಪಾರಿ ನೀರವ್ ಮೋದಿಯ ವಿರುದ್ಧ ಮಹತ್ವದ ತೀರ್ಪು ನೀಡಿದೆ.ಈ ತೀರ್ಪು, ಬ್ಯಾಂಕ್ ಆಫ್ ಇಂಡಿಯಾದ ದೀರ್ಘಕಾಲದ ವಸೂಲಾತಿ ಪ್ರಯತ್ನಗಳಿಗೆ ಸಿಕ್ಕ ದೊಡ್ಡ ಗೆಲುವಾಗಿದೆ.

ಇಲ್ಲಿನ ಸಕ್ರ್ಯೂಟ್ ಕಮರ್ಷಿಯಲ್ ಕೋರ್ಟ್, ಬ್ಯಾಂಕ್ ಆಫ್ ಇಂಡಿಯಾ ಪರವಾಗಿ ತೀರ್ಪು ನೀಡಿದ್ದು, ನೀರವ್ ಮೋದಿ ಅವರು ಬ್ಯಾಂಕಿಗೆ 10.7 ಮಿಲಿಯನ್ ಡಾಲರ್‍ಗೂ ಹೆಚ್ಚು (ಸುಮಾರು 100 ಕೋಟಿ) ಹಣವನ್ನು ಪಾವತಿಸಬೇಕೆಂದು ಆದೇಶಿಸಿದೆ.

2012ರಲ್ಲಿ ದುಬೈ ಮೂಲದ ‘ಫೈರ್‍ಸ್ಟಾರ್ ಡೈಮಂಡ್ ಎಫ್‍ಝಡ್‍ಇ’ ಕಂಪನಿಗೆ ಬ್ಯಾಂಕ್ ಆಫ್ ಇಂಡಿಯಾ ನೀಡಿದ್ದ ಸಾಲಕ್ಕೆ ನೀರವ್ ಮೋದಿ ಅವರು ವೈಯಕ್ತಿಕ ಗ್ಯಾರಂಟಿ ನೀಡಿದ್ದರು. ಸಾಲವನ್ನು ಮರುಪಾವತಿಸುವಲ್ಲಿ ಕಂಪನಿ ವಿಫಲವಾದ ಕಾರಣ, ಈ ಒಪ್ಪಂದದಡಿ ನೀರವ್ ಮೋದಿ ವೈಯಕ್ತಿಕವಾಗಿ ಜವಾಬ್ದಾರರಾಗಿದ್ದಾರೆ ಎಂದು ನ್ಯಾಯಾಲಯ ಸ್ಪಷ್ಟಪಡಿಸಿದೆ. ಈ ಒಟ್ಟು ಮೊತ್ತದಲ್ಲಿ ಸುಮಾರು 4.1 ಮಿಲಿಯನ್ ಡಾಲರ್ (ಸುಮಾರು 38.9 ಕೋಟಿ) ಮೂಲ ಅಸಲು ಮತ್ತು ಅದಕ್ಕೆ ಸೇರಬೇಕಾದ ಬಡ್ಡಿಯನ್ನು ಒಳಗೊಂಡಿದೆ ಎಂದು ನ್ಯಾಯಾಲಯ ತಿಳಿಸಿದೆ.

ನೀರವ್ ಮೋದಿ ಅವರು ಗ್ಯಾರಂಟಿ ಅನ್ವಯಿಸುವುದಿಲ್ಲ ಅಥವಾ ತಮಗೆ ನೋಟಿಸ್ ಸಿಕ್ಕಿಲ್ಲ ಎಂಬಿತ್ಯಾದಿ ವಾದಗಳನ್ನು ಮಂಡಿಸಿದ್ದರು. ಆದರೆ, ನ್ಯಾಯಾಲಯ ಈ ವಾದಗಳನ್ನು ತಿರಸ್ಕರಿಸಿದ್ದು, ನೋಟಿಸ್‍ಗಳನ್ನು ಸರಿಯಾಗಿ ತಲುಪಿಸಲಾಗಿದೆ ಮತ್ತು ಅವರು ಸಾಲ ಮರುಪಾವತಿಗೆ ಹೊಣೆಗಾರರಾಗಿದ್ದಾರೆ ಎಂದು ತೀರ್ಪು ನೀಡಿದೆ.

ನೀರವ್ ಮೋದಿ ಅವರು ಪಂಜಾಬ್ ನ್ಯಾಷನಲ್ ಬ್ಯಾಂಕ್ ಹಗರಣದ ಮುಖ್ಯ ಆರೋಪಿಯಾಗಿದ್ದು, 2019ರಿಂದ ಲಂಡನ್ ಜೈಲಿನಲ್ಲಿ ನ್ಯಾಯಾಂಗ ಬಂಧನದಲ್ಲಿದ್ದಾರೆ. ಅವರು ಭಾರತಕ್ಕೆ ಹಸ್ತಾಂತರಗೊಳ್ಳುವುದನ್ನು ತಡೆಯಲು ವಿವಿಧ ಕಾನೂನು ಹೋರಾಟಗಳನ್ನು ನಡೆಸುತ್ತಿದ್ದಾರೆ. ಇತ್ತೀಚೆಗೆ ಮಾರ್ಚ್ 2026ರಲ್ಲಿ, ಯುಕೆ ಹೈಕೋರ್ಟ್ ಅವರ ಹಸ್ತಾಂತರದ ವಿರುದ್ಧದ ಮೇಲ್ಮನವಿಯನ್ನು ವಜಾಗೊಳಿಸಿದ್ದು, ಅವರು ಭಾರತಕ್ಕೆ ಮರಳುವುದು ಬಹುತೇಕ ಖಚಿತವಾಗಿದೆ.

ಪ್ರಕರಣದ ಹಿನ್ನೆಲೆ:

ಈ ಪ್ರಕರಣವು 2012ರಲ್ಲಿ ಬ್ಯಾಂಕ್ ಆಫ್ ಇಂಡಿಯಾವು ದುಬೈ ಮೂಲದ ಫೈರ್‍ಸ್ಟಾರ್ ಡೈಮಂಡ್ ಎಫ್‍ಜೆಡ್‍ಇ ಕಂಪನಿಗೆ ನೀಡಿದ್ದ ಸಾಲಕ್ಕೆ ಸಂಬಂಧಿಸಿದ್ದಾಗಿದೆ. ಈ ಕಂಪನಿಯು ನೀರವ್ ಮೋದಿಯವರ ಒಡೆತನಕ್ಕೆ ಸೇರಿದ್ದಾಗಿತ್ತು.2012ರಲ್ಲಿ ಈ ಸಾಲದ ಸೌಲಭ್ಯವನ್ನು ಪಡೆಯುವಾಗ, ನೀರವ್ ಮೋದಿ ಅವರು ‘ವೈಯಕ್ತಿಕ ಖಾತರಿ’ ನೀಡಿದ್ದರು. ಸಾಲ ಪಡೆದ ಕಂಪನಿಯು ಸಾಲ ಮರುಪಾವತಿಸಲು ವಿಫಲವಾದರೆ, ತಾನೇ ಸ್ವತಃ ಮರುಪಾವತಿಸುವುದಾಗಿ ಒಪ್ಪಂದ ಮಾಡಿಕೊಂಡಿದ್ದರು.

ಪಂಜಾಬ್ ನ್ಯಾಷನಲ್ ಬ್ಯಾಂಕ್ ಹಗರಣದ ತನಿಖೆ ಪ್ರಾರಂಭವಾದ ಬಳಿಕ, ಫೈರ್‍ಸ್ಟಾರ್ ಗ್ರೂಪ್‍ನ ಆರ್ಥಿಕ ಸ್ಥಿತಿ ಹದಗೆಟ್ಟಿತು. ಇದರಿಂದಾಗಿ ಬ್ಯಾಂಕ್ ಆಫ್ ಇಂಡಿಯಾದ ಸಾಲದ ಕಂತುಗಳನ್ನು ಪಾವತಿಸಲು ಕಂಪನಿ ವಿಫಲವಾಯಿತು.

ಇದು ಪಿಎನ್‍ಬಿ ಹಗರಣಕ್ಕಿಂತ ಭಿನ್ನವಾದ, ಪ್ರತ್ಯೇಕವಾದ ‘ಸಿವಿಲ್ ರಿಕವರಿ’ (ಸಾಲ ವಸೂಲಾತಿ) ಪ್ರಕರಣವಾಗಿದೆ. ಈ ತೀರ್ಪು ಭಾರತದ ಬ್ಯಾಂಕ್‍ಗಳಿಗೆ ವಿದೇಶದಲ್ಲಿರುವ ಆಸ್ತಿ ಅಥವಾ ವೈಯಕ್ತಿಕ ಖಾತರಿಗಳನ್ನು ಕಾನೂನುಬದ್ಧವಾಗಿ ವಸೂಲಿ ಮಾಡಲು ಒಂದು ದೊಡ್ಡ ಜಯವೆಂದು ಪರಿಗಣಿಸಲಾಗಿದೆ.