ಮನೆ ಮಾಲೀಕರ ಗಮನಕ್ಕೆ: ಹೊಸ ಐಟಿಆರ್‌ ಫಾರ್ಮ್‌ಗಳಲ್ಲಿ ಭಾರೀ ಬದಲಾವಣೆ ಗಡುವು ವಿಸ್ತರಣೆ: ಇಲ್ಲಿದೆ ಮಾಹಿತಿ

ಬೆಂಗಳೂರು: ದೇಶಾದ್ಯಂತ 2025-26 ರ ಹಣಕಾಸು ವರ್ಷದ (ಮೌಲ್ಯಮಾಪನ ವರ್ಷ 2026-27) ಆದಾಯ ತೆರಿಗೆ ರಿಟರ್ನ್ಸ್ (ITR) ಸಲ್ಲಿಸಲು ಕ್ಷಣಗಣನೆ ಪ್ರಾರಂಭವಾಗಿದೆ. ಸಾಮಾನ್ಯವಾಗಿ ಪ್ರತಿ ವರ್ಷ ಜುಲೈ 31 ಐಟಿಆರ್ ಸಲ್ಲಿಸಲು ಕೊನೆಯ ದಿನವಾಗಿರುತ್ತದೆ. ಆದರೆ ಈ ಬಾರಿ ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಅವರು ಬಜೆಟ್‌ನಲ್ಲಿ ಘೋಷಿಸಿದಂತೆ, ತೆರಿಗೆದಾರರಿಗೆ ಮತ್ತು ಚಾರ್ಟರ್ಡ್ ಅಕೌಂಟೆಂಟ್‌ಗಳಿಗೆ (CA) ಕೊನೆಯ ಕ್ಷಣದ ಗೊಂದಲ ತಪ್ಪಿಸಲು ಬಿಗ್ ರಿಲೀಫ್ ಒಂದನ್ನು ನೀಡಿದ್ದಾರೆ.

ಐಟಿಆರ್-3 ಮತ್ತು ಐಟಿಆರ್-4 ಸಲ್ಲಿಕೆ ದಿನಾಂಕ ಬದಲು

ಆಡಿಟ್ ಅನ್ವಯಿಸದ ವೈಯಕ್ತಿಕ ಉದ್ಯಮಿಗಳು ಮತ್ತು ವೃತ್ತಿಪರರು ಸಲ್ಲಿಸುವ ITR-3 ಮತ್ತು ITR-4 ಫಾರ್ಮ್‌ಗಳ ಸಲ್ಲಿಕೆಯ ಕೊನೆಯ ಗಡುವನ್ನು ಜುಲೈ 31ರ ಬದಲು ಆಗಸ್ಟ್ 31, 2026ಕ್ಕೆ ವಿಸ್ತರಿಸಲಾಗಿದೆ.

ತಜ್ಞರ ಕಿವಿಮಾತು: ಡೆಲಾಯ್ಟ್ ಇಂಡಿಯಾದ ಪಾಲುದಾರ ಸುಧಾಕರ್ ಸೇತುರಾಮನ್ ಅವರ ಪ್ರಕಾರ, “ದಿನಾಂಕ ವಿಸ್ತರಣೆಯಾಗಿದೆ ಎಂದು ಫೈಲಿಂಗ್ ಪ್ರಕ್ರಿಯೆಯನ್ನು ಮುಂದೂಡಬಾರದು. ಈ ಬಾರಿ ಹೊಸ ನಿಯಮಗಳಿರುವುದರಿಂದ ವಿವರವಾದ ಪರಿಶೀಲನೆ ಅಗತ್ಯವಿದೆ. ಹೀಗಾಗಿ ತೆರಿಗೆದಾರರು ಮೊದಲೇ ಸಿದ್ಧತೆ ಮಾಡಿಕೊಳ್ಳುವುದು ಒಳಿತು.”

ಎಫ್&ಒ (F&O) ಮತ್ತು ಇಂಟ್ರಾ-ಡೇ ಟ್ರೇಡರ್ಸ್‌ಗೆ ಹೊಸ ನಿಯಮ

ನೀವು ಕಳೆದ ಹಣಕಾಸು ವರ್ಷದಲ್ಲಿ ಸಂಬಳ ಪಡೆಯುವ ಉದ್ಯೋಗಿಯಾಗಿದ್ದು, ಅದರ ಜೊತೆಗೆ ಶೇರು ಮಾರುಕಟ್ಟೆಯ ಫ್ಯೂಚರ್ಸ್ ಆಂಡ್ ಆಪ್ಷನ್ಸ್ (F&O) ಅಥವಾ ಇಂಟ್ರಾ-ಡೇ ಟ್ರೇಡಿಂಗ್‌ನಲ್ಲಿ ತೊಡಗಿಸಿಕೊಂಡಿದ್ದರೆ, ನೀವು ಇನ್ಮುಂದೆ ಸರಳವಾದ ಐಟಿಆರ್-1 ಅಥವಾ ಐಟಿಆರ್-2 ಫಾರ್ಮ್ ಬಳಸುವಂತಿಲ್ಲ!

ಯಾವ ಫಾರ್ಮ್ ಬಳಸಬೇಕು?: ಇಂತಹ ವ್ಯಕ್ತಿಗಳು ಕಡ್ಡಾಯವಾಗಿ ITR-3 ಫಾರ್ಮ್ ಬಳಸಬೇಕು.

ಒಂದು ವೇಳೆ ನೀವು ಸೆಕ್ಷನ್ 44AD ಅಡಿಯಲ್ಲಿ ಊಹಿಸಬಹುದಾದ ಲಾಭದ ಯೋಜನೆಯನ್ನು (Presumptive Taxation Scheme) ಆಯ್ಕೆ ಮಾಡಿಕೊಂಡರೆ ಮಾತ್ರ ITR-4 ಬಳಸಬಹುದು ಎಂದು ಸಿಎ ತಜ್ಞ ಹಿಮಾಂಕ್ ಸಿಂಗ್ಲಾ ಸ್ಪಷ್ಟಪಡಿಸಿದ್ದಾರೆ.

ಐಟಿಆರ್ ಫಾರ್ಮ್‌ಗಳಲ್ಲಿನ ಪ್ರಮುಖ ಬದಲಾವಣೆಗಳು:

ಎರಡು ಮನೆ ಇದ್ದವರಿಗೆ ಗುಡ್ ನ್ಯೂಸ್: ಎರಡು ವಸತಿ ಆಸ್ತಿಗಳನ್ನು (House Properties) ಹೊಂದಿರುವ ವ್ಯಕ್ತಿಗಳು ಇನ್ಮುಂದೆ ಸರಳವಾದ ಐಟಿಆರ್-1 ಅಥವಾ ಐಟಿಆರ್-4 ಫಾರ್ಮ್‌ಗಳ ಮೂಲಕವೇ ರಿಟರ್ನ್ಸ್ ಸಲ್ಲಿಸಬಹುದು. ಇದರಲ್ಲಿ ವಸೂಲಾಗದ ಬಾಡಿಗೆಯನ್ನು (Unrealized Rent) ವರದಿ ಮಾಡಲು ಹೊಸ ಕಾಲಂ ನೀಡಲಾಗಿದೆ.

ವಿದೇಶಿ ನಿವೃತ್ತಿ ಖಾತೆದಾರರಿಗೆ ನಿರ್ಬಂಧ: ವಿದೇಶಿ ನಿವೃತ್ತಿ ಖಾತೆಗಳನ್ನು ಹೊಂದಿರುವ ಭಾರತದ ನಿವಾಸಿ ತೆರಿಗೆದಾರರು ಇನ್ಮುಂದೆ ಐಟಿಆರ್-1 ಅಥವಾ 4 ಸಲ್ಲಿಸುವಾಗ ಸೆಕ್ಷನ್ 89ಎ ಅಡಿಯಲ್ಲಿ ರಿಯಾಯಿತಿ ಪಡೆಯಲು ಸಾಧ್ಯವಿಲ್ಲ ಎಂದು ಕ್ಲಿಯರ್‌ಟ್ಯಾಕ್ಸ್ ಸಿಇಒ ಅರ್ಚಿತ್ ಗುಪ್ತಾ ತಿಳಿಸಿದ್ದಾರೆ.

ಬಂಡವಾಳ ಲಾಭ ತೆರಿಗೆ (Capital Gains Tax) ದರ ಪರಿಷ್ಕರಣೆ: ಪರಿಷ್ಕೃತ ಬಂಡವಾಳ ಲಾಭ ತೆರಿಗೆಯನ್ನು ಫಾರ್ಮ್‌ಗಳಲ್ಲಿ ನವೀಕರಿಸಲಾಗಿದೆ. ಸೆಕ್ಷನ್ 111A (ಅಲ್ಪಾವಧಿ ಬಂಡವಾಳ ಲಾಭ) ಅಡಿಯಲ್ಲಿ ತೆರಿಗೆ ದರವನ್ನು ಶೇ. 15 ರಿಂದ ಶೇ. 20 ಕ್ಕೆ ಮತ್ತು ಸೆಕ್ಷನ್ 112A (ದೀರ್ಘಾವಧಿ ಬಂಡವಾಳ ಲಾಭ) ಅಡಿಯಲ್ಲಿನ ದರವನ್ನು ಶೇ. 10 ರಿಂದ ಶೇ. 12.5 ಕ್ಕೆ ಹೆಚ್ಚಿಸಲಾಗಿದೆ.

ಪಾನ್ ಕಡ್ಡಾಯ: ಸೆಕ್ಷನ್ 80GGC ಅಡಿಯಲ್ಲಿ ರಾಜಕೀಯ ಪಕ್ಷಗಳಿಗೆ ದೇಣಿಗೆ ನೀಡಿ ತೆರಿಗೆ ಕಡಿತ ವಿನಾಯಿತಿ ಪಡೆಯಲು ಇಚ್ಛಿಸುವವರು, ಇನ್ಮುಂದೆ ಆ ರಾಜಕೀಯ ಪಕ್ಷದ ಹೆಸರು ಮತ್ತು ಅದರ ಪಾನ್ (PAN) ಸಂಖ್ಯೆಯನ್ನು ಕಡ್ಡಾಯವಾಗಿ ಒದಗಿಸಬೇಕಾಗುತ್ತದೆ.