ನಿತ್ಯದ ಜಂಜಾಟದಲ್ಲಿ ಅಡುಗೆಮನೆಯಲ್ಲಿ ಹೆಚ್ಚು ಸಮಯ ಕಳೆಯಲು ಇಷ್ಟಪಡದವರಿಗೆ ಅಥವಾ ತರಕಾರಿಗಳು ಮನೆಯಲ್ಲಿ ಇಲ್ಲದ ಸಮಯದಲ್ಲಿ ರುಚಿಕರವಾದ ಅಡುಗೆ ಮಾಡಬೇಕೆನಿಸಿದರೆ ರಾಜಸ್ಥಾನಿ ಶೈಲಿಯ ಹಪ್ಪಳದ ಸಾರು (ಪಾಪಡ್ ಕಿ ಸಬ್ಜಿ) ಅತ್ಯುತ್ತಮ ಆಯ್ಕೆಯಾಗಿದೆ. ರಾಜಸ್ಥಾನದ ಸಾಂಪ್ರದಾಯಿಕ ಶೈಲಿಯ ಈ ಖಾದ್ಯವು ಅದರ ಸರಳತೆ, ವಿಶಿಷ್ಟ ರುಚಿ ಮತ್ತು ಅತ್ಯಂತ ವೇಗವಾಗಿ ತಯಾರಾಗುವ ಗುಣದಿಂದಾಗಿ ಎಲ್ಲರಿಗೂ ಇಷ್ಟವಾಗುತ್ತದೆ. ಮೊಸರಿನ ಗ್ರೇವಿ ಹಾಗೂ ಮನೆಯಲ್ಲಿ ಸುಲಭವಾಗಿ ಸಿಗುವ ಮಸಾಲೆ ಪದಾರ್ಥಗಳನ್ನು ಬಳಸಿ ಇದನ್ನು ತಯಾರಿಸಲಾಗುತ್ತದೆ.
ಹಿಂದಿನ ಕಾಲದಲ್ಲಿ ರಾಜಸ್ಥಾನದ ಮರುಭೂಮಿ ಪ್ರದೇಶಗಳಲ್ಲಿ ತಾಜಾ ತರಕಾರಿಗಳು ಸುಲಭವಾಗಿ ಸಿಗದ ಕಾರಣ, ಅಲ್ಲಿನ ಜನರು ಈ ಉಪಾಯವನ್ನು ಕಂಡುಕೊಂಡಿದ್ದರು. ಇಂದು ಈ ಸಾರು ದೇಶದ ಹಲವು ಮನೆಗಳಲ್ಲಿ ಅತ್ಯಂತ ಜನಪ್ರಿಯ ಕಂಫರ್ಟ್ ಫುಡ್ ಆಗಿದೆ. ಬಿಸಿ ಬಿಸಿ ರೊಟ್ಟಿ, ಚಪಾತಿ ಅಥವಾ ಅನ್ನದ ಜೊತೆಗೆ ಸವಿಯಲು ಇದು ಸೂಕ್ತವಾಗಿದೆ.
ಏಕಾಗಿ ಇದು ಇಷ್ಟೊಂದು ಜನಪ್ರಿಯ? ಕಡಿಮೆ ಸಮಯದಲ್ಲಿ ಮತ್ತು ಯಾವುದೇ ವಿಶೇಷ ಸಿದ್ಧತೆ ಇಲ್ಲದೆ ಇದನ್ನು ಮಾಡಬಹುದು. ಕೇವಲ ಮೊಸರು, ಹಪ್ಪಳ ಮತ್ತು ಅಡುಗೆಮನೆಯ ಸಾಧಾರಣ ಮಸಾಲೆಗಳಿದ್ದರೆ ಸಾಕು. ಮೊಸರು ಮತ್ತು ಮಸಾಲೆಗಳ ಮಿಶ್ರಣವು ಇದಕ್ಕೆ ಅಪ್ಪಟ ರಾಜಸ್ಥಾನಿ ರುಚಿಯನ್ನು ನೀಡುತ್ತದೆ. ತರಕಾರಿಗಳು ಮುಗಿದುಹೋದಾಗ ಅಥವಾ ಕಚೇರಿ ಕೆಲಸದ ನಡುವೆ ಬಿಡುವಿಲ್ಲದ ದಿನಗಳಲ್ಲಿ ಸುಲಭವಾಗಿ ಹೊಟ್ಟೆ ತುಂಬಿಸುವಂತಹ ಅಡುಗೆ ಇದಾಗಿದೆ.
ಬೇಕಾಗುವ ಪದಾರ್ಥಗಳು:
- ಹಪ್ಪಳ: ೪ ರಿಂದ ೫
- ತಾಜಾ ಮೊಸರು: ೧ ಕಪ್
- ಎಣ್ಣೆ ಅಥವಾ ತುಪ್ಪ: ೧ ಚಮಚ
- ಜೀರಿಗೆ: ೧ ಚಮಚ
- ಇಂಗು: ೧ ಚಿಟಿಕೆ
- ಅಚ್ಚಖಾರದ ಪುಡಿ: ೧ ಚಮಚ
- ಅರಿಶಿನ ಪುಡಿ: ಅರ್ಧ ಚಮಚ
- ಧನಿಯಾ ಪುಡಿ: ೧ ಚಮಚ
- ನೀರು: ೨ ಕಪ್
- ಉಪ್ಪು: ರುಚಿಗೆ ತಕ್ಕಷ್ಟು
- ಕೊತ್ತಂಬರಿ ಸೊಪ್ಪು: ಅಲಂಕಾರಕ್ಕೆ
ತಯಾರಿಸುವ ವಿಧಾನ:
ಹಂತ ೧: ಮೊದಲು ಹಪ್ಪಳಗಳನ್ನು ಒಲೆಯ ಮೇಲೆ ಸುಟ್ಟುಕೊಳ್ಳಿ ಅಥವಾ ಎಣ್ಣೆಯಲ್ಲಿ ಹಗುರವಾಗಿ ಕರ್ದಕೊಳ್ಳಿ. ನಂತರ ಅವುಗಳನ್ನು ಮಧ್ಯಮ ಗಾತ್ರದ ತುಂಡುಗಳಾಗಿ ಮುರಿದು ಪಕ್ಕಕ್ಕೆ ಎತ್ತಿಟ್ಟುಕೊಳ್ಳಿ.
ಹಂತ ೨: ಒಂದು ಪಾತ್ರೆಯಲ್ಲಿ ಮೊಸರನ್ನು ಚೆನ್ನಾಗಿ ಗೊಟಾಯಿಸಿಕೊಳ್ಳಿ (ವಿಸ್ಕ್ ಮಾಡಿ). ಇದಕ್ಕೆ ಅರಿಶಿನ, ಧನಿಯಾ ಪುಡಿ, ಖಾರದ ಪುಡಿ ಮತ್ತು ಸ್ವಲ್ಪ ನೀರು ಸೇರಿಸಿ ಗಂಟಿಲ್ಲದಂತೆ ಮಿಶ್ರಣ ಮಾಡಿ. ಹೀಗೆ ಮಾಡುವುದರಿಂದ ಒಲೆಯ ಮೇಲಿಟ್ಟಾಗ ಮೊಸರು ಒಡೆಯುವುದಿಲ್ಲ.
ಹಂತ ೩: ಈಗ ಬಾಣಲೆಯಲ್ಲಿ ಎಣ್ಣೆ ಅಥವಾ ತುಪ್ಪವನ್ನು ಬಿಸಿ ಮಾಡಿ. ಅದಕ್ಕೆ ಜೀರಿಗೆ ಮತ್ತು ಇಂಗು ಹಾಕಿ ಚಟಪಟಾಯಿಸಲು ಬಿಡಿ.
ಹಂತ ೪: ಈಗ ಸಿದ್ಧಪಡಿಸಿದ ಮೊಸರಿನ ಮಿಶ್ರಣವನ್ನು ಬಾಣಲೆಗೆ ಹಾಕಿ, ಉರಿಯನ್ನು ಕಡಿಮೆ ಮಾಡಿ ಕೈ ಬಿಡದೆ ಕೈಾಡಿಸುತ್ತಿರಿ. ನಂತರ ಉಳಿದ ನೀರನ್ನು ಸೇರಿಸಿ ಗ್ರೇವಿಯನ್ನು ಚೆನ್ನಾಗಿ ಕುದಿಯಲು ಬಿಡಿ.
ಹಂತ ೫: ಗ್ರೇವಿ ಸ್ವಲ್ಪ ದಪ್ಪಗಾಗುತ್ತಿದ್ದಂತೆ, ಮುರಿದು ಇಟ್ಟುಕೊಂಡ ಹಪ್ಪಳದ ತುಂಡುಗಳನ್ನು ಸೇರಿಸಿ. ಹಪ್ಪಳವು ಮಸಾಲೆಯ ರುಚಿಯನ್ನು ಹೀರಿಕೊಳ್ಳುವಂತೆ ಮಾಡಲು ಎರಡು ಮೂರು ನಿಮಿಷಗಳ ಕಾಲ ಕಡಿಮೆ ಉರಿಯಲ್ಲಿ ಬೇಯಿಸಿ.
ಹಂತ ೬: ಕೊನೆಯಲ್ಲಿ ರುಚಿ ನೋಡಿ ಅಗತ್ಯವಿದ್ದರೆ ಸ್ವಲ್ಪ ಉಪ್ಪು ಸೇರಿಸಿ (ಹಪ್ಪಳದಲ್ಲೂ ಉಪ್ಪಿನಂಶ ಇರುವುದರಿಂದ ಜಾಗ್ರತೆ ಇರಲಿ). ಮೇಲೆ ತಾಜಾ ಕೊತ್ತಂಬರಿ ಸೊಪ್ಪನ್ನು ಉದುರಿಸಿದರೆ ಬಿಸಿ ಬಿಸಿ ರಾಜಸ್ಥಾನಿ ಹಪ್ಪಳದ ಸಾರು ಸವಿಯಲು ಸಿದ್ಧ. ಇದನ್ನು ಚಪಾತಿ ಅಥವಾ ಅನ್ನದೊಂದಿಗೆ ಬಿಸಿಯಾಗಿ ಬಡಿಸಿ.
