ದೆಹಲಿ: ಸಿಎಸ್‌ಕೆ ತಂಡದ ಸ್ಟಾರ್ ಬ್ಯಾಟರ್ ಸಂಜು ಸ್ಯಾಮ್ಸನ್ ಐಪಿಎಲ್‌ನಲ್ಲಿ ಹೊಸ ಇತಿಹಾಸ ಬರೆದಿದ್ದಾರೆ. ಮಂಗಳವಾರ ರಾತ್ರಿ ದೆಹಲಿ ಕ್ಯಾಪಿಟಲ್ಸ್ ವಿರುದ್ಧ ಅಜೇಯ 87 ರನ್ ಸಿಡಿಸಿದ ಸ್ಯಾಮ್ಸನ್, ಒಂದೇ ಸೀಸನ್‌ನಲ್ಲಿ ನಿರ್ದಿಷ್ಟ ತಂಡವೊಂದರ ವಿರುದ್ಧ ಲೀಗ್ ಹಂತದಲ್ಲಿ 200 ಅಥವಾ ಅದಕ್ಕಿಂತ ಹೆಚ್ಚು ರನ್ ಗಳಿಸಿದ ಮೂರನೇ ಬ್ಯಾಟರ್ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ.
ಈ ಸೀಸನ್‌ನ ಆರಂಭಿಕ ಮೂರು ಪಂದ್ಯಗಳಲ್ಲಿ ಕೇವಲ 22 ರನ್ ಗಳಿಸಿ ನಿರಾಸೆ ಮೂಡಿಸಿದ್ದ ಸ್ಯಾಮ್ಸನ್, ನಂತರ ಅದ್ಭುತವಾಗಿ ಪುಟಿದೇಳುವ ಮೂಲಕ ಏಳು ಇನ್ನಿಂಗ್ಸ್‌ಗಳಲ್ಲಿ ಎರಡು ಶತಕ ಮತ್ತು ಒಂದು ಅರ್ಧಶತಕ ಸಿಡಿಸಿದ್ದಾರೆ. ವಿಶೇಷವೆಂದರೆ ದೆಹಲಿ ವಿರುದ್ಧದ ಮೊದಲ ಪಂದ್ಯದಲ್ಲಿ ಅಜೇಯ 115 ರನ್ ಗಳಿಸಿದ್ದ ಅವರು, ಎರಡನೇ ಪಂದ್ಯದಲ್ಲಿ ಅಜೇಯ 87 ರನ್ ಚಚ್ಚಿದ್ದಾರೆ. ಆ ಮೂಲಕ ದೆಹಲಿ ವಿರುದ್ಧ ಈ ಸೀಸನ್‌ನಲ್ಲಿ ಒಟ್ಟು 202 ರನ್ ಕಲೆಹಾಕಿದ್ದಾರೆ.
ಈ ಸಾಧನೆ ಮಾಡಿದ ಇತರ ದಿಗ್ಗಜರು:
- ವಿರಾಟ್ ಕೊಹ್ಲಿ: 2016ರ ಸೀಸನ್‌ನಲ್ಲಿ ಗುಜರಾತ್ ಲಯನ್ಸ್ ವಿರುದ್ಧ ಲೀಗ್ ಹಂತದಲ್ಲಿ ಎರಡು ಶತಕಗಳನ್ನು (100* ಮತ್ತು 109) ಸಿಡಿಸುವ ಮೂಲಕ ಒಟ್ಟು 209 ರನ್ ಗಳಿಸಿ ಈ ಸಾಧನೆ ಮಾಡಿದ ಮೊದಲ ಆಟಗಾರ ಎನಿಸಿಕೊಂಡಿದ್ದರು.
- ಕೆಎಲ್ ರಾಹುಲ್: 2022ರಲ್ಲಿ ಲಕ್ನೋ ಸೂಪರ್ ಜೈಂಟ್ಸ್ ಪರ ಆಡುತ್ತಾ ಮುಂಬೈ ಇಂಡಿಯನ್ಸ್ ವಿರುದ್ಧ ಎರಡು ಅಜೇಯ ಶತಕಗಳನ್ನು (103* ಮತ್ತು 103*) ಬಾರಿಸಿ 206 ರನ್ ಕಲೆಹಾಕಿದ್ದರು.
ಸದ್ಯ ಸಿಎಸ್‌ಕೆ ಪ್ಲೇ ಆಫ್ ಹಾದಿಯಲ್ಲಿರುವಾಗ ಸಂಜು ಸ್ಯಾಮ್ಸನ್ ಅವರ ಈ ಭರ್ಜರಿ ಫಾರ್ಮ್ ತಂಡಕ್ಕೆ ಆನೆಬಲ ತಂದಿದೆ. ಕೇವಲ ವೈಯಕ್ತಿಕ ದಾಖಲೆ ಮಾತ್ರವಲ್ಲದೆ ತಂಡದ ಗೆಲುವಿನಲ್ಲೂ ಸ್ಯಾಮ್ಸನ್ ಪ್ರಮುಖ ಪಾತ್ರ ವಹಿಸುತ್ತಿರುವುದು ಅಭಿಮಾನಿಗಳಲ್ಲಿ ಸಂತಸ ಮೂಡಿಸಿದೆ.
