ಬೆಂಗಳೂರು: ಸರ್ಕಾರಿ ಕೆಲಸದ ಕನಸು ಕಾಣುತ್ತಿರುವ ರಾಜ್ಯದ ಯುವಜನತೆಗೆ ಕರ್ನಾಟಕ ಲೋಕಸೇವಾ ಆಯೋಗ (KPSC) ಭರ್ಜರಿ ಸಿಹಿ ಸುದ್ದಿ ನೀಡಿದೆ. ಮುಂಬರುವ ಜುಲೈ ತಿಂಗಳಲ್ಲಿ 400 ಗೆಜೆಟೆಡ್ ಪ್ರೊಬೇಷನರಿ (KAS) ಹಾಗೂ 115 ಸಹಾಯಕ ಕಾರ್ಯನಿರ್ವಾಹಕ ಎಂಜಿನಿಯರ್‌ (AEE) ಹುದ್ದೆಗಳು ಸೇರಿದಂತೆ ಒಟ್ಟು ಒಂದು ಸಾವಿರಕ್ಕೂ ಅಧಿಕ ಹುದ್ದೆಗಳ ನೇಮಕಾತಿಗೆ ಸರಣಿ ಅಧಿಸೂಚನೆ ಹೊರಡಿಸಲು ಆಯೋಗ ಭರ್ಜರಿ ಸಿದ್ಧತೆ ಮಾಡಿಕೊಂಡಿದೆ.
ಯಾವಾಗಲೂ ಕೇಳಿಬರುತ್ತಿದ್ದ ವಿಳಂಬ ನೇಮಕಾತಿ ಅನ್ನೋ ಕಳಂಕವನ್ನು ತೊಡೆದುಹಾಕಲು ಮುಂದಾಗಿರುವ ಆಯೋಗ, ಈ ಬಾರಿ ಇಡೀ ಪ್ರಕ್ರಿಯೆಯನ್ನು ನಿಗದಿತ ವೇಳಾಪಟ್ಟಿಯೊಳಗೆ ಅತ್ಯಂತ ವೇಗವಾಗಿ ಮುಗಿಸಲು ಮಾಸ್ಟರ್ ಪ್ಲಾನ್ ರೂಪಿಸಿದೆ.
ಯಾವ್ಯಾವ ಹುದ್ದೆಗಳಿಗೆ ಅಧಿಸೂಚನೆ ಹೊರಬೀಳಲಿದೆ?
ಆಯೋಗವು ಗ್ರೂಪ್ ಎ ಮತ್ತು ಬಿ ಹುದ್ದೆಗಳ ಜೊತೆಗೆ ವಿವಿಧ ಇಲಾಖೆಗಳಲ್ಲಿ ಖಾಲಿ ಇರುವ ಗ್ರೂಪ್ ಸಿ ಹುದ್ದೆಗಳನ್ನೂ ಭರ್ತಿ ಮಾಡಿಕೊಳ್ಳಲಿದೆ. ಪ್ರಮುಖವಾಗಿ:
400 ಗೆಜೆಟೆಡ್ ಪ್ರೊಬೇಷನರಿ ಗ್ರೂಪ್ ಎ ಮತ್ತು ಬಿ ವೃಂದದ ಹುದ್ದೆಗಳು.
115 ಸಹಾಯಕ ಕಾರ್ಯನಿರ್ವಾಹಕ ಎಂಜಿನಿಯರ್‌ (AEE) ಹುದ್ದೆಗಳು.
ವಿವಿಧ ಇಲಾಖೆಗಳಲ್ಲಿನ ಪ್ರಥಮ ದರ್ಜೆ ಸಹಾಯಕರು (FDA) ಮತ್ತು ದ್ವಿತೀಯ ದರ್ಜೆ ಸಹಾಯಕರು (SDA).
ಪದವಿ ವಿದ್ಯಾರ್ಹತೆಯ ಗ್ರೂಪ್ ಸಿ ಹುದ್ದೆಗಳು.
ಲೆಕ್ಕ ಪರಿಶೋಧನಾ ಇಲಾಖೆಯಲ್ಲಿನ ಸಹಾಯಕ ನಿಯಂತ್ರಕರು ಮತ್ತು ಲೆಕ್ಕ ಪರಿಶೋಧನಾಧಿಕಾರಿ ಹುದ್ದೆಗಳು.
ಪರೀಕ್ಷೆಗಳು ಹೇಗೆ ನಡೆಯಲಿವೆ?
ಖಾಲಿ ಹುದ್ದೆಗಳನ್ನು ತುಂಬಲು ಕೆಪಿಎಸ್‌ಸಿ ಈ ಬಾರಿ 3 ಪ್ರತ್ಯೇಕ ವಿಧಾನಗಳನ್ನು ಬಳಸಲು ತೀರ್ಮಾನಿಸಿದೆ:
ವಿಧಾನ 1 (ಗ್ರೂಪ್ ‘ಎ’ ಮತ್ತು ‘ಬಿ’): ಇವುಗಳಿಗೆ ಎಂದಿನಂತೆ ಪೂರ್ವಭಾವಿ ಪರೀಕ್ಷೆ, ಮುಖ್ಯ ಪರೀಕ್ಷೆ ಹಾಗೂ ಸಂದರ್ಶನ ಇರಲಿದೆ.
ವಿಧಾನ 2 (ಕೆಲವು ‘ಎ’ ವೃಂದದ ಹುದ್ದೆಗಳು): ಯಾವುದೇ ಇಂಟರ್‌ವ್ಯೂ ಇಲ್ಲದೆ, ಕೇವಲ ಪರೀಕ್ಷೆ ನಡೆಸಿ ಜ್ಯೇಷ್ಠತೆ ಆಧಾರದಲ್ಲಿ ಆಯ್ಕೆ ಮಾಡಲಾಗುತ್ತದೆ.
ವಿಧಾನ 3 (ತಾಂತ್ರಿಕ ಹುದ್ದೆಗಳು): ತಾಂತ್ರಿಕ ಪರಿಣತಿ ಬೇಕಿರುವ ಗ್ರೂಪ್ ‘ಬಿ’ ಹುದ್ದೆಗಳಿಗೂ ಕೇವಲ ಪರೀಕ್ಷೆ ನಡೆಸಿ ನೇರ ಆಯ್ಕೆ ಮಾಡಲಾಗುವುದು.
ಗಮನಿಸಿ: ಸರ್ಕಾರದ ಸೂಚನೆಯಂತೆ ಡಿಸ್ಕ್ರಿಪ್ಟೀವ್‌ (ವಿವರಣಾತ್ಮಕ) ಮಾದರಿಯ ಪರೀಕ್ಷೆಗಳನ್ನು ಮಾತ್ರ KPSC ನಡೆಸಲಿದ್ದು, ಒಎಂಆರ್ (OMR) ಆಧಾರಿತ ಪರೀಕ್ಷೆಗಳನ್ನು ಕರ್ನಾಟಕ ಪರೀಕ್ಷಾ ಪ್ರಾಧಿಕಾರ (KEA) ನಡೆಸಲಿದೆ.
ಸದ್ಯಕ್ಕಿಲ್ಲ ಹಳೆಯ ಕೆಎಎಸ್‌ (KAS) ರಿಸಲ್ಟ್
ಇನ್ನೊಂದು ಕಡೆ, 2024ನೇ ಸಾಲಿನ 384 ಗೆಜೆಟೆಡ್ ಪ್ರೊಬೇಷನರ್ ಹುದ್ದೆಗಳ ಇಂಟರ್‌ವ್ಯೂ ಮುಗಿದು ಲಿಸ್ಟ್ ರೆಡಿಯಾಗಿದ್ದರೂ ರಿಸಲ್ಟ್ ಪ್ರಕಟಿಸಲು ಸಾಧ್ಯವಾಗುತ್ತಿಲ್ಲ. ಮೀಸಲಾತಿ ವಿವಾದದ ಕಾರಣ ಹೈಕೋರ್ಟ್ ತಡೆ ನೀಡಿರುವುದರಿಂದ ಹಳೆಯ ಫಲಿತಾಂಶ ಸದ್ಯಕ್ಕೆ ಬರುವುದಿಲ್ಲ. ನ್ಯಾಯಾಲಯದ ಹಸಿರು ನಿಶಾನೆ ಸಿಗುವವರೆಗೂ ಕಾಯಬೇಕಾಗಿರುವುದರಿಂದ, ಆಯೋಗವು ಸಮಯ ವ್ಯರ್ಥ ಮಾಡದೆ ಈ ಹೊಸ ನೇಮಕಾತಿ ಪ್ರಕ್ರಿಯೆಗೆ ಕೈ ಹಾಕಿದೆ.
“ವಿವಿಧ ನೇಮಕಾತಿಗಳಿಗೆ ಸಂಬಂಧಿಸಿದಂತೆ ಅಧಿಸೂಚನೆ ಹೊರಡಿಸಲು ಆಯೋಗ ಎಲ್ಲ ಸಿದ್ಧತೆ ಮಾಡಿಕೊಂಡಿದೆ. ಸರ್ಕಾರದ ಇಲಾಖೆಗಳಿಂದ ಪ್ರಸ್ತಾವನೆಗಳು ಸಿಕ್ಕ ತಕ್ಷಣವೇ ಪರೀಕ್ಷಾ ದಿನಾಂಕ ಸೇರಿದಂತೆ ಇಡೀ ಪ್ರಕ್ರಿಯೆಯ ಕಂಪ್ಲೀಟ್ ಕ್ಯಾಲೆಂಡರ್ ರಿಲೀಸ್ ಮಾಡಲಿದ್ದೇವೆ.”– ಕೆ. ಜ್ಯೋತಿ, ಕಾರ್ಯದರ್ಶಿ, ಕೆಪಿಎಸ್‌ಸಿ
