ಬೆಂಗಳೂರು: ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಕಂದಾಯ ಗುಪ್ತಚರ ನಿರ್ದೇಶನಾಲಯದ (DRI) ಅಧಿಕಾರಿಗಳು ಭರ್ಜರಿ ಕಾರ್ಯಾಚರಣೆ ನಡೆಸಿದ್ದು, ಲಗೇಜ್ ಟ್ರ್ಯಾಲಿಗಳ ಮೂಲಕ ಅಕ್ರಮವಾಗಿ ಸಾಗಿಸಲಾಗುತ್ತಿದ್ದ ಬರೋಬ್ಬರಿ ₹1.80 ಕೋಟಿ ಮೌಲ್ಯದ 1.3 ಕೆಜಿ ಚಿನ್ನದ ಬಿಸ್ಕೆಟ್‌ಗಳನ್ನು ವಶಪಡಿಸಿಕೊಂಡಿದ್ದಾರೆ.
ಅಮಾಯಕ ಪ್ರಯಾಣಿಕರನ್ನೇ ದಾಳವಾಗಿಸಿಕೊಂಡಿದ್ದ ಖದೀಮರು
ಮಲೇಷ್ಯಾದ ಕೌಲಾಲಂಪುರದಿಂದ ಬೆಂಗಳೂರಿಗೆ ಆಗಮಿಸಿದ ಇಬ್ಬರು ಪ್ರಯಾಣಿಕರು ಈ ಖತರ್ನಾಕ್ ಕೃತ್ಯವೆಸಗಿದ್ದರು. ವಿಮಾನ ನಿಲ್ದಾಣದ ಕಸ್ಟಮ್ಸ್ ತಪಾಸಣೆಯಿಂದ ತಪ್ಪಿಸಿಕೊಳ್ಳಲು ಆರೋಪಿಗಳು ವಿನೂತನ ಉಪಾಯ ಹೂಡಿದ್ದರು. ತಾವು ತಂದಿದ್ದ ಚಿನ್ನದ ಬಿಸ್ಕೆಟ್‌ಗಳನ್ನು ವಿಮಾನ ನಿಲ್ದಾಣದಲ್ಲಿದ್ದ ಸಾಮಾನ್ಯ ಲಗೇಜ್ ಟ್ರ್ಯಾಲಿಗಳ ಅಡಿಗೆ ಗುಟ್ಟಾಗಿ ಅಂಟಿಸಿ ಬಿಡುತ್ತಿದ್ದರು.
ಟರ್ಮಿನಲ್‌ನಲ್ಲಿ ತಮ್ಮ ಲಗೇಜ್ ತೆಗೆದುಕೊಂಡು ಹೋಗಲು ಬರುವ ಇತರ ಅಮಾಯಕ ಪ್ರಯಾಣಿಕರು, ಚಿನ್ನ ಅಂಟಿಕೊಂಡಿದ್ದ ಅದೇ ಟ್ರ್ಯಾಲಿಯನ್ನು ಬಳಸಿಕೊಂಡು ಕಸ್ಟಮ್ಸ್ ತಪಾಸಣಾ ವಲಯವನ್ನು ದಾಟುತ್ತಿದ್ದರು. ತಾವು ಬಳಸುತ್ತಿರುವ ಟ್ರ್ಯಾಲಿಯಲ್ಲಿ ಚಿನ್ನವಿದೆ ಎಂಬ ಕನಿಷ್ಠ ಕಲ್ಪನೆಯೂ ಆ ಪ್ರಯಾಣಿಕರಿಗೆ ಇರುತ್ತಿರಲಿಲ್ಲ.
ಹಿಂಬಾಲಿಸಿ ಚಿನ್ನ ಎಗರಿಸುತ್ತಿದ್ದಾಗ ಬಲೆಗೆ ಬಿದ್ದ ಆರೋಪಿಗಳು
ಅಮಾಯಕ ಪ್ರಯಾಣಿಕರು ಆ ಟ್ರ್ಯಾಲಿಗಳನ್ನು ತಳ್ಳಿ ಕಸ್ಟಮ್ಸ್ ಪರಿಶೀಲನೆ ದಾಟಿ ಹೊರಬರುತ್ತಿದ್ದಂತೆಯೇ, ಅವರನ್ನೇ ಹಿಂಬಾಲಿಸಿಕೊಂಡು ಬರುತ್ತಿದ್ದ ಈ ಖದೀಮರು ನಿಲ್ದಾಣದ ಹೊರಭಾಗದಲ್ಲಿ ಯಾರ ಗಮನಕ್ಕೂ ಬಾರದಂತೆ ಟ್ರ್ಯಾಲಿಯಿಂದ ಚಿನ್ನವನ್ನು ಬಿಡಿಸಿಕೊಳ್ಳುತ್ತಿದ್ದರು.
ಆದರೆ ಈ ಖತರ್ನಾಕ್ ಜಾಲದ ಬಗ್ಗೆ ಖಚಿತ ಮಾಹಿತಿ ಪಡೆದ ಡಿಆರ್‌ಐ ಅಧಿಕಾರಿಗಳು ಕಾರ್ಯಪ್ರವೃತ್ತರಾಗಿ ದಾಳಿ ನಡೆಸಿ, ಕೋಟ್ಯಂತರ ರೂಪಾಯಿ ಮೌಲ್ಯದ ಚಿನ್ನದ ಬಿಸ್ಕೆಟ್‌ಗಳನ್ನು ಜಪ್ತಿ ಮಾಡಿದ್ದಾರೆ. ವಿದೇಶದಿಂದ ಈ ರೀತಿ ವಿನೂತನ ಮಾದರಿಯಲ್ಲಿ ಚಿನ್ನ ಕಳ್ಳಸಾಗಣೆ ಮಾಡುತ್ತಿದ್ದ ಇಬ್ಬರು ಆರೋಪಿಗಳನ್ನು ವಶಕ್ಕೆ ಪಡೆದು ಅಧಿಕಾರಿಗಳು ತೀವ್ರ ವಿಚಾರಣೆ ಮುಂದುವರಿಸಿದ್ದಾರೆ.
