ನವದೆಹಲಿ: ದಸರಾ, ದೀಪಾವಳಿ ಹಬ್ಬಕ್ಕೆ ಎಲೆಕ್ಟ್ರಾನಿಕ್ಸ್ ಖರೀದಿಸಲು ಮುಂದಾಗಿರುವವರಿಗೆ ಬೆಲೆ ಏರಿಕೆಯ ಬಿಸಿ ತಟ್ಟುವ ಸಾಧ್ಯತೆ ಇದೆ. AC, LED TV, ಫ್ರಿಜ್ ಮತ್ತು ವಾಷಿಂಗ್ ಮಷಿನ್ ಸೇರಿದಂತೆ ಹಲವು ಉತ್ಪನ್ನಗಳ ದರ ಅಕ್ಟೋಬರ್‌ನಿಂದ ಹೆಚ್ಚಾಗಲಿದೆ ಎಂದು ಉದ್ಯಮ ವಲಯದ ವರದಿಗಳು ತಿಳಿಸಿವೆ.
ತಾಮ್ರ, ಅಲ್ಯೂಮಿನಿಯಂ ಮತ್ತು ಉಕ್ಕಿನ ಬೆಲೆ ಏರಿಕೆ ಜೊತೆಗೆ ಸಾಗಣೆ ವೆಚ್ಚವೂ ಹೆಚ್ಚಾಗಿದೆ. ಡಾಲರ್ ಎದುರು ರೂಪಾಯಿ ಮೌಲ್ಯದಲ್ಲಿನ ಬದಲಾವಣೆಯೂ ಉತ್ಪಾದನಾ ವೆಚ್ಚದ ಮೇಲೆ ಪರಿಣಾಮ ಬೀರಿದೆ. ಹೀಗಾಗಿ ಕೆಲವು ಕಂಪನಿಗಳು ಹಬ್ಬದ ಸೀಸನ್‌ಗೂ ಮುನ್ನವೇ ದರ ಪರಿಷ್ಕರಣೆಗೆ ಮುಂದಾಗಿವೆ.
2026ರಲ್ಲಿ ಎಲೆಕ್ಟ್ರಾನಿಕ್ಸ್ ಮತ್ತು ಅಪ್ಲಯನ್ಸ್ ಉದ್ಯಮದಲ್ಲಿ ನಡೆಯುತ್ತಿರುವ ಮೂರನೇ ಸುತ್ತಿನ ಬೆಲೆ ಏರಿಕೆ ಇದಾಗಿದೆ ಎಂದು ವರದಿಯಾಗಿದೆ.
AC, TV ಬೆಲೆ ಎಷ್ಟು ಹೆಚ್ಚಾಗಬಹುದು?
ACಗಳ ಬೆಲೆ ಶೇ.5ರಿಂದ 8ರವರೆಗೆ ಹೆಚ್ಚಾಗುವ ಸಾಧ್ಯತೆ ಇದೆ. ವಾಷಿಂಗ್ ಮಷಿನ್, ಫ್ರಿಜ್ ಮತ್ತು LED TVಗಳ ದರದಲ್ಲಿ ಶೇ.3ರಿಂದ 4ರವರೆಗೆ ಏರಿಕೆಯಾಗಬಹುದು.
Blue Star, Godrej Appliances, Haier, Daikin ಮತ್ತು Super Plastronics ಸೇರಿದಂತೆ ಹಲವು ಕಂಪನಿಗಳು ಈಗಾಗಲೇ ದರ ಹೆಚ್ಚಳ ಮಾಡಿವೆ ಅಥವಾ ಹೊಸ ದರ ಜಾರಿಗೆ ತರಲು ಸಿದ್ಧವಾಗಿವೆ. ವಿವಿಧ ಉತ್ಪನ್ನಗಳ ಬೆಲೆ ಶೇ.4ರಿಂದ 10ರವರೆಗೆ ಹೆಚ್ಚಾಗಿರುವ ಮಾಹಿತಿ ಇದೆ.Panasonic ಮಾತ್ರ ಸದ್ಯಕ್ಕೆ ಬೆಲೆ ಏರಿಕೆ ಬಗ್ಗೆ ಅಂತಿಮ ನಿರ್ಧಾರ ಕೈಗೊಂಡಿಲ್ಲ ಎಂದು ವರದಿಯಾಗಿದೆ.
https://x.com/Jethava_shubham/status/2104213835498524939
ಕಚ್ಚಾ ವಸ್ತುಗಳ ಬೆಲೆ ಏರಿಕೆ
AC ಮತ್ತು ಡೀಪ್ ಫ್ರೀಜರ್‌ಗಳ ಬೆಲೆ ಈಗಾಗಲೇ ಶೇ.5ರಿಂದ 8ರವರೆಗೆ ಹೆಚ್ಚಾಗಿದೆ ಎಂದು ಬ್ಲೂ ಸ್ಟಾರ್ ವ್ಯವಸ್ಥಾಪಕ ನಿರ್ದೇಶಕ ಬಿ. ತ್ಯಾಗರಾಜನ್ ಹೇಳಿದ್ದಾರೆ.
ಕಳೆದ ವರ್ಷದ ಹಬ್ಬದ ಸೀಸನ್‌ಗೆ ಹೋಲಿಸಿದರೆ ಉತ್ಪಾದನಾ ವೆಚ್ಚ ಸುಮಾರು ಶೇ.15ರಷ್ಟು ಹೆಚ್ಚಾಗಿದೆ. GSTಯಿಂದ ಗ್ರಾಹಕರಿಗೆ ಸಿಗುತ್ತಿರುವ ಪ್ರಯೋಜನವನ್ನು ಪರಿಗಣಿಸಿದರೆ, ಬೆಲೆ ಏರಿಕೆಯ ನೇರ ಪರಿಣಾಮ ಸುಮಾರು ಶೇ.5ರಷ್ಟಿರಬಹುದು ಎಂದು ಅವರು ಹೇಳಿದ್ದಾರೆ.
ಗೋದ್ರೆಜ್ ಎಂಟರ್‌ಪ್ರೈಸಸ್ ಗ್ರೂಪ್‌ನ ಅಪ್ಲಯನ್ಸಸ್ ವಿಭಾಗದ ಮುಖ್ಯಸ್ಥ ಕಮಲ್ ನಂದಿ ಕೂಡ ದರ ಏರಿಕೆ ಅನಿವಾರ್ಯವಾಗಿದೆ ಎಂದಿದ್ದಾರೆ. ಕೆಲವು ಉತ್ಪನ್ನಗಳ ಬೆಲೆ ಶೇ.5ರಿಂದ 7ರವರೆಗೆ ಹೆಚ್ಚಾಗಬಹುದು. ಕಂಪನಿಗಳು ಅಕ್ಟೋಬರ್ ಅಥವಾ ನವೆಂಬರ್‌ನಿಂದ ಹೊಸ ದರ ಜಾರಿಗೆ ತರಬಹುದು ಎಂದು ಅವರು ಹೇಳಿದ್ದಾರೆ.
ಹಳೆಯ ದರದಲ್ಲಿ ಖರೀದಿಸಲು ಅವಕಾಶ ಇದೆಯೇ?
ಹೊಸ ದರ ಜಾರಿಗೆ ಬಂದರೂ ಮಾರುಕಟ್ಟೆಯಲ್ಲಿ ಹಳೆಯ ದರದ ಉತ್ಪನ್ನಗಳು ಕೆಲಕಾಲ ಸಿಗಬಹುದು. ದರ ಏರಿಕೆಯಾಗುವ ಮುನ್ನವೇ ಡೀಲರ್‌ಗಳು ಮತ್ತು ವಿತರಕರು ಕೆಲವು ಉತ್ಪನ್ನಗಳನ್ನು ಹಳೆಯ ಬೆಲೆಗೆ ಖರೀದಿಸಿ ದಾಸ್ತಾನು ಮಾಡಿಕೊಂಡಿದ್ದಾರೆ.
ಈ ಸ್ಟಾಕ್ ಸುಮಾರು ಒಂದು ತಿಂಗಳಿಂದ ಒಂದೂವರೆ ತಿಂಗಳವರೆಗೆ ಸಾಕಾಗಬಹುದು. ಹೀಗಾಗಿ ದೀಪಾವಳಿವರೆಗೂ ಕೆಲವು ಉತ್ಪನ್ನಗಳು ಹಳೆಯ ದರದಲ್ಲೇ ಸಿಗುವ ಸಾಧ್ಯತೆ ಇದೆ. ನಂತರ ಹೊಸ ದರಗಳು ಸಂಪೂರ್ಣವಾಗಿ ಜಾರಿಗೆ ಬರಬಹುದು ಎಂದು ಕಮಲ್ ನಂದಿ ಹೇಳಿದ್ದಾರೆ.
ದೀಪಾವಳಿ ಬಳಿಕವೂ ದರ ಏರಿಕೆಯಾಗುತ್ತಾ?
ಹೈಯರ್ ಇಂಡಿಯಾ ಅಧ್ಯಕ್ಷ ಎನ್.ಎಸ್. ಸತೀಶ್ ಅವರ ಪ್ರಕಾರ, ಅಕ್ಟೋಬರ್ 1ರಿಂದ ACಗಳ ಬೆಲೆಯನ್ನು ಸುಮಾರು ಶೇ.5ರಷ್ಟು ಹೆಚ್ಚಿಸಲು ಕಂಪನಿ ನಿರ್ಧರಿಸಿದೆ. LED TV ಮತ್ತು ವಾಷಿಂಗ್ ಮಷಿನ್‌ಗಳ ಬೆಲೆಯಲ್ಲೂ ಶೇ.2ರಿಂದ 3ರವರೆಗೆ ಏರಿಕೆಯಾಗಬಹುದು.
ಕಚ್ಚಾ ವಸ್ತುಗಳ ಬೆಲೆ ಇದೇ ರೀತಿ ಮುಂದುವರಿದರೆ ದೀಪಾವಳಿ ನಂತರವೂ ದರ ಹೆಚ್ಚಳವಾಗಬಹುದು. ಜನವರಿವರೆಗೆ ಒಟ್ಟಾರೆ ಸುಮಾರು ಶೇ.15ರಷ್ಟು ಬೆಲೆ ಏರಿಕೆಯಾಗುವ ಸಾಧ್ಯತೆ ಇದೆ ಎಂದು ಸತೀಶ್ ಹೇಳಿದ್ದಾರೆ.
AC ತಯಾರಿಕೆಯಲ್ಲಿ ಪ್ರಮುಖವಾಗಿ ಬಳಸುವ ತಾಮ್ರದ ಬೆಲೆಯೂ ಹೆಚ್ಚಾಗಿದೆ. ಕಳೆದ ವರ್ಷ ಪ್ರತಿ ಮೆಟ್ರಿಕ್ ಟನ್‌ಗೆ 8,000-9,000 ಡಾಲರ್ ಇದ್ದ ತಾಮ್ರದ ಬೆಲೆ ಈಗ ಸುಮಾರು 14,500 ಡಾಲರ್‌ಗೆ ತಲುಪಿದೆ. ಒಂದು AC ತಯಾರಿಸಲು ಸುಮಾರು 3ರಿಂದ 4 ಕೆಜಿ ತಾಮ್ರ ಬೇಕಾಗುತ್ತದೆ ಎಂದು ಅವರು ತಿಳಿಸಿದ್ದಾರೆ.
ಓಣಂನಿಂದ ದಸರಾ ಹಾಗೂ ದೀಪಾವಳಿವರೆಗಿನ ಅವಧಿ ಎಲೆಕ್ಟ್ರಾನಿಕ್ಸ್ ಮತ್ತು ಅಪ್ಲಯನ್ಸ್ ಕಂಪನಿಗಳಿಗೆ ಪ್ರಮುಖ ಮಾರಾಟದ ಸಮಯ. ವರ್ಷದ ಒಟ್ಟು ಮಾರಾಟದಲ್ಲಿ ಈ ಹಬ್ಬದ ಅವಧಿಯ ಪಾಲು ಸುಮಾರು ಶೇ.30ರಿಂದ 40ರಷ್ಟಿರುತ್ತದೆ.
ಡೈಕಿನ್ ಇಂಡಿಯಾ ಸೆಪ್ಟೆಂಬರ್ 16ರಿಂದಲೇ ತನ್ನ ಉತ್ಪನ್ನಗಳ ಬೆಲೆಯನ್ನು ಶೇ.8ರಿಂದ 10ರವರೆಗೆ ಹೆಚ್ಚಿಸಿದೆ. ತಾಮ್ರದ ಬೆಲೆ ಶೇ.25ರಿಂದ 35ರಷ್ಟು ಏರಿಕೆಯಾಗಿರುವುದು ಹಾಗೂ ಡಾಲರ್ ಮೌಲ್ಯ ಹೆಚ್ಚಾಗಿರುವುದು ಉತ್ಪಾದನಾ ವೆಚ್ಚದ ಮೇಲೆ ಪರಿಣಾಮ ಬೀರಿದೆ ಎಂದು ಸಂಸ್ಥೆಯ ಅಧ್ಯಕ್ಷ ಮತ್ತು ವ್ಯವಸ್ಥಾಪಕ ನಿರ್ದೇಶಕ ಕನ್ವಲ್‌ಜೀತ್ ಜಾವಾ ಹೇಳಿದ್ದಾರೆ.
ಥಾಮ್ಸನ್, ಕೊಡ್ಯಾಕ್ ಮತ್ತು ಬ್ಲಾಪಂಕ್ಟ್ ಬ್ರ್ಯಾಂಡ್‌ಗಳ TVಗಳನ್ನು ಮಾರಾಟ ಮಾಡುವ Super Plastronics ಕೂಡ ಅಕ್ಟೋಬರ್ ನಂತರ TVಗಳ ಬೆಲೆಯನ್ನು ಸುಮಾರು ಶೇ.7ರಷ್ಟು ಹೆಚ್ಚಿಸಲು ಮುಂದಾಗಿದೆ. ಇತರ ಅಪ್ಲಯನ್ಸ್‌ಗಳ ಬೆಲೆಯೂ ಈಗಾಗಲೇ ಶೇ.4ರಿಂದ 5ರವರೆಗೆ ಏರಿಕೆಯಾಗಿದೆ.
ಸಾಗಣೆ ವೆಚ್ಚ ಮತ್ತು ಪೂರೈಕೆ ಸರಪಳಿಯ ಸಮಸ್ಯೆಗಳು ಮುಂದುವರಿದರೆ ದೀಪಾವಳಿ ನಂತರ TVಗಳ ಬೆಲೆ ಮತ್ತಷ್ಟು ಹೆಚ್ಚಾಗಬಹುದು. ಸಣ್ಣ ಗಾತ್ರದ TVಗಳ ಬೆಲೆ ಶೇ.20ರವರೆಗೆ ಮತ್ತು ದೊಡ್ಡ ಗಾತ್ರದ TVಗಳ ಬೆಲೆ ಶೇ.10ರವರೆಗೆ ಹೆಚ್ಚಾಗುವ ಸಾಧ್ಯತೆಯಿದೆ ಎಂದು ವಿಡಿಯೋಟೆಕ್ಸ್ ನಿರ್ದೇಶಕ ಅರ್ಜುನ್ ಬಜಾಜ್ ತಿಳಿಸಿದ್ದಾರೆ.
