ವಾಷಿಂಗ್ಟನ್: ಕಳೆದ ಎರಡು ವರ್ಷಗಳಿಂದ ಜಗತ್ತನ್ನೇ ನಡುಗಿಸುತ್ತಿರುವ ರಷ್ಯಾ ಮತ್ತು ಉಕ್ರೇನ್ ಯುದ್ಧಕ್ಕೆ ಈಗ ತಾತ್ಕಾಲಿಕ ವಿರಾಮ ಸಿಕ್ಕಿದೆ. ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಸಂಧಾನದ ಫಲವಾಗಿ ಉಭಯ ದೇಶಗಳು ಮೇ 9, 10 ಮತ್ತು 11 ರಂದು ಮೂರು ದಿನಗಳ ಕಾಲ ಕದನ ವಿರಾಮ (Ceasefire) ಘೋಷಿಸಲು ಒಪ್ಪಿಕೊಂಡಿವೆ.
ಈ ಮಹತ್ವದ ಬೆಳವಣಿಗೆಯ ಕುರಿತು ಟ್ರಂಪ್ ಅವರು ಸೋಶಿಯಲ್ ಮೀಡಿಯಾದಲ್ಲಿ ಮಾಹಿತಿ ಹಂಚಿಕೊಂಡಿದ್ದು, ಯುದ್ಧ ಪೀಡಿತ ಪ್ರದೇಶಗಳಲ್ಲಿ ಎಲ್ಲಾ ರೀತಿಯ ಸೈನಿಕ ಕಾರ್ಯಾಚರಣೆಗಳನ್ನು ಸ್ಥಗಿತಗೊಳಿಸಲಾಗಿದೆ ಎಂದು ತಿಳಿಸಿದ್ದಾರೆ.
ಸಾಂಕೇತಿಕ ದಿನಗಳು: ರಷ್ಯಾದಲ್ಲಿ ಇಂದು (ಮೇ 9) ಆಚರಿಸಲಾಗುವ ‘ವಿಜಯ ದಿನ’ದ (Victory Day) ಹಿನ್ನೆಲೆಯಲ್ಲಿ ಈ ಒಪ್ಪಂದ ಏರ್ಪಟ್ಟಿದೆ. ಇದರಲ್ಲಿ ಉಕ್ರೇನ್ ದೇಶದ ಎರಡನೇ ಮಹಾಯುದ್ಧದ ಇತಿಹಾಸವನ್ನು ಸಹ ಗೌರವಿಸಲಾಗಿದೆ.
ಬೃಹತ್ ಕೈದಿಗಳ ವಿನಿಮಯ: ಕೇವಲ ಯುದ್ಧ ನಿಲ್ಲಿಸುವುದು ಮಾತ್ರವಲ್ಲದೆ, ಇಬ್ಬರೂ ಅಧ್ಯಕ್ಷರು ತಲಾ 1,000 ಯುದ್ಧ ಕೈದಿಗಳನ್ನು ಬಿಡುಗಡೆ ಮಾಡಲು ಸಮ್ಮತಿಸಿದ್ದಾರೆ. ಇದು ಮಾನವೀಯ ದೃಷ್ಟಿಯಿಂದ ದೊಡ್ಡ ನಿರ್ಧಾರ ಎಂದು ವಿಶ್ಲೇಷಿಸಲಾಗುತ್ತಿದೆ.
ಟ್ರಂಪ್ ಸಂಧಾನ ಯಶಸ್ವಿ: ರಷ್ಯಾ ಅಧ್ಯಕ್ಷ ಪುಟಿನ್ ಮತ್ತು ಉಕ್ರೇನ್ ಅಧ್ಯಕ್ಷ ಜೆಲೆನ್ಸ್ಕಿ ಅವರೊಂದಿಗೆ ಸುದೀರ್ಘ ಚರ್ಚೆ ನಡೆಸಿ ಈ ಒಪ್ಪಂದ ಮಾಡಿಸಲಾಗಿದೆ. “ಇದು ಕೇವಲ ಆರಂಭ, ಯುದ್ಧಕ್ಕೆ ಶಾಶ್ವತ ಪರಿಹಾರ ಕಂಡುಕೊಳ್ಳಲು ಮಾತುಕತೆಗಳು ಮುಂದುವರಿಯುತ್ತಿವೆ” ಎಂದು ಟ್ರಂಪ್ ಆಶಾವಾದ ವ್ಯಕ್ತಪಡಿಸಿದ್ದಾರೆ.
ಈ 72 ಗಂಟೆಗಳ ಕಾಲಾವಕಾಶವು ಯುದ್ಧ ಪೀಡಿತ ಪ್ರದೇಶದ ಜನರಿಗೆ ತುಸು ನಿಮ್ಮದಿ ತಂದಿದೆ. ಇದು ಯುದ್ಧ ಅಂತ್ಯಕ್ಕೆ ಮುನ್ನುಡಿಯಾಗುತ್ತದೆಯೇ ಎಂಬ ಕುತೂಹಲ ಈಗ ವಿಶ್ವದಾದ್ಯಂತ ಮೂಡಿದೆ.
