ಬೆಂಗಳೂರು : ಯೂಟ್ಯೂಬ್ ಮೂಲಕ ಹಣ ಗಳಿಸಲು ಅಥವಾ ಅದನ್ನೇ ವೃತ್ತಿಯನ್ನಾಗಿಸಿಕೊಳ್ಳಲು ಯೋಜಿಸುತ್ತಿರುವ ಕಂಟೆಂಟ್ ಕ್ರಿಯೇಟರ್‌ಗಳಿಗೆ ಗೂಗಲ್ ಒಡೆತನದ ಯೂಟ್ಯೂಬ್ ದೊಡ್ಡ ಆಘಾತ ನೀಡಿದೆ. ಯೂಟ್ಯೂಬ್ ಪಾರ್ಟ್‌ನರ್ ಪ್ರೋಗ್ರಾಂ (YPP) ನಿಯಮಗಳಲ್ಲಿ ಮಹತ್ವದ ಬದಲಾವಣೆಗಳನ್ನು ಘೋಷಿಸಲಾಗಿದ್ದು, ಫೆಬ್ರವರಿ 1, 2027 ರಿಂದ ಹೊಸ ಮಾರ್ಗಸೂಚಿಗಳು ಜಾರಿಗೆ ಬರಲಿವೆ. ಇದರಿಂದಾಗಿ ಹೊಸ ಕ್ರಿಯೇಟರ್‌ಗಳಿಗೆ ಜಾಹೀರಾತುಗಳ ಮೂಲಕ ಆದಾಯ ಗಳಿಸುವುದು ಮತ್ತಷ್ಟು ಕಠಿಣವಾಗಲಿದೆ.
ಹೊಸ ನಿಯಮಗಳು ಏನು ಹೇಳುತ್ತವೆ?
ಪ್ರಸ್ತುತ ಇರುವ ಮಾನದಂಡಗಳನ್ನು ಗಣನೀಯವಾಗಿ ಹೆಚ್ಚಿಸಲಾಗಿದ್ದು, ಪೂರ್ಣ ಪ್ರಮಾಣದ ಆದಾಯ ಹಂಚಿಕೆ ಪಡೆಯಲು ಹೊಸದಾಗಿ ಅರ್ಜಿ ಸಲ್ಲಿಸುವವರು ಈ ಕೆಳಗಿನ ಅರ್ಹತೆಗಳನ್ನು ಹೊಂದಿರಬೇಕಾಗುತ್ತದೆ:
ದೀರ್ಘಾವಧಿ ವಿಡಿಯೋಗಳಿಗೆ: ಕಳೆದ 365 ದಿನಗಳಲ್ಲಿ ಕನಿಷ್ಠ 1,000 ಸಬ್‌ಸ್ಕ್ರೈಬರ್ಸ್‌ ಜೊತೆಗೆ 8,000 ವ್ಯಾಲಿಡ್ ವಾಚ್ ಅವರ್ಸ್ (ವೀಕ್ಷಣಾ ಸಮಯ) ಹೊಂದಿರಬೇಕು.
ಶಾರ್ಟ್ಸ್ ವಿಡಿಯೋಗಳಿಗೆ: ಕಳೆದ 90 ದಿನಗಳಲ್ಲಿ ಕನಿಷ್ಠ 20 ಮಿಲಿಯನ್ (2 ಕೋಟಿ) ಅರ್ಹ ಶಾರ್ಟ್ಸ್ ವೀವ್ಸ್ ಪಡೆದಿರಬೇಕು.
ಕೇವಲ ಚಂದಾದಾರರ ಸಂಖ್ಯೆಯನ್ನು ಹೆಚ್ಚಿಸಿಕೊಂಡರೆ ಸಾಲದು, ಬದಲಿಗೆ ಕಂಟೆಂಟ್‌ನ ನೈಜ ವೀಕ್ಷಣೆ ಮತ್ತು ಗುಣಮಟ್ಟ ಅತ್ಯಂತ ನಿರ್ಣಾಯಕವಾಗಲಿದೆ ಎಂಬುದನ್ನು ಈ ನಿಯಮಗಳು ಸ್ಪಷ್ಟಪಡಿಸಿವೆ.
ಭಾರತೀಯ ಕ್ರಿಯೇಟರ್‌ಗಳ ಮೇಲೆ ಪ್ರಭಾವವೇನು?
'ಎಕನಾಮಿಕ್ ಟೈಮ್ಸ್' ವರದಿ ಪ್ರಕಾರ, ಈ ಬದಲಾವಣೆಯು ಭಾರತದ ಕ್ರಿಯೇಟರ್ ಎಕಾನಮಿಯ ಮೇಲೆ ವ್ಯಾಪಕ ಪ್ರಭಾವ ಬೀರಲಿದೆ. ಕಂಟೆಂಟ್ ರಚನೆಯನ್ನು ಕೇವಲ ಹವ್ಯಾಸ ಅಥವಾ ಅರೆಕಾಲಿಕ ಆದಾಯದ ಮೂಲವನ್ನಾಗಿ ನೋಡದೆ, ಗಂಭೀರ ವೃತ್ತಿಯಾಗಿ ಪರಿಗಣಿಸಬೇಕಾದ ಅನಿವಾರ್ಯತೆ ಎದುರಾಗಿದೆ.
ಹೊಸ ನಿಯಮಗಳಿಂದಾಗಿ ಮೂಲ (original) ಕಂಟೆಂಟ್, ಲಾಂಗ್-ಫಾರ್ಮ್ ವಿಡಿಯೋಗಳು ಮತ್ತು ವೀಕ್ಷಕರನ್ನು ಹಿಡಿದಿಟ್ಟುಕೊಳ್ಳುವ ಕೌಶಲಕ್ಕೆ ಹೆಚ್ಚಿನ ಮನ್ನಣೆ ಸಿಗಲಿದೆ. ದೀರ್ಘಕಾಲಿಕವಾಗಿ ಚಾನೆಲ್ ಮುನ್ನಡೆಸಲು ನಿರಂತರ ಉಪಯುಕ್ತ ಹಾಗೂ ಗುಣಮಟ್ಟದ ವಿಡಿಯೋಗಳನ್ನು ನೀಡುವುದು ಅನಿವಾರ್ಯವಾಗಲಿದೆ.
ಕೇವಲ ಯೂಟ್ಯೂಬ್ ಆಡ್ಸ್‌ಗೆ ಸೀಮಿತವಾಗದಿರಲು ಸಲಹೆ
ಕ್ರಿಯೇಟರ್‌ಗಳ ಒಟ್ಟು ಆದಾಯದಲ್ಲಿ ಶೇ. 65 ರಿಂದ 85 ರಷ್ಟು ಪಾಲು ಯೂಟ್ಯೂಬ್ ಜಾಹೀರಾತೇತರ ಮೂಲಗಳಿಂದಲೇ ಬರುತ್ತದೆ ಎಂದು ಮಾರುಕಟ್ಟೆ ತಜ್ಞರು ಅಂದಾಜಿಸಿದ್ದಾರೆ. ಹೀಗಾಗಿ, ಕೇವಲ ಗೂಗಲ್ ಆಡ್‌ಸೆನ್ಸ್ ಮೇಲೆ ಅವಲಂಬಿತರಾಗದೆ ಪರ್ಯಾಯ ಮಾರ್ಗಗಳತ್ತ ಗಮನಹರಿಸುವಂತೆ ಸೂಚಿಸಲಾಗಿದೆ:
ಬ್ರ್ಯಾಂಡ್ ಪ್ರಾಯೋಜಕತ್ವಗಳು (Sponsorships)
ಅಫಿಲಿಯೇಟ್ ಮಾರ್ಕೆಟಿಂಗ್
ಪಾವತಿಸಿದ ಪ್ರಚಾರಗಳು (Paid Integrations)
ಸ್ವಂತ ಮರ್ಚಂಡೈಸ್ ಹಾಗೂ ಡಿಜಿಟಲ್ ಪ್ರಾಡಕ್ಟ್‌ಗಳ ಮಾರಾಟ
AI ಕಂಟೆಂಟ್‌ಗೆ ಕತ್ತರಿ ಬೀಳುವ ಸಾಧ್ಯತೆ
ಕೃತಕ ಬುದ್ಧಿಮತ್ತೆ (AI) ತಂತ್ರಜ್ಞಾನದಿಂದಾಗಿ ಸ್ಕ್ರಿಪ್ಟ್, ಧ್ವನಿ ಮತ್ತು ಎಡಿಟಿಂಗ್ ಸುಲಭವಾಗಿದೆಯಾದರೂ, ಸಾವಿರಾರು ಚಾನೆಲ್‌ಗಳು ಒಂದೇ ರೀತಿಯ ಕಂಟೆಂಟ್ ತಯಾರಿಸುತ್ತಿರುವುದು ಸವಾಲಾಗಿ ಪರಿಣಮಿಸಿದೆ. ಸಂಪೂರ್ಣವಾಗಿ ಯಾಂತ್ರೀಕೃತಗೊಂಡ AI ವಿಡಿಯೋಗಳ ವಿಶ್ವಾಸಾರ್ಹತೆ ಕಡಿಮೆಯಾಗುತ್ತಿದ್ದು, ಕ್ರಿಯೇಟರ್‌ಗಳು ತಮ್ಮ ಸ್ವಂತಿಕೆ ಮತ್ತು ಮಾನವೀಯ ಸ್ಪರ್ಶವನ್ನು ಉಳಿಸಿಕೊಳ್ಳುವುದು ಅತ್ಯಗತ್ಯವಾಗಿದೆ.
