27 ವರ್ಷಗಳ ಬಳಿಕ ಯುರೋಪ್‌’ನಲ್ಲಿ ಸಂಪೂರ್ಣ ಸೂರ್ಯಗ್ರಹಣ; ಹಗಲು ರಾತ್ರಿಯಂತಾದ ಕ್ಷಣ |WATCH VIDEO

ದಶಕಗಳ ಬಳಿಕ ಯುರೋಪ್‌ನಲ್ಲಿ ಸಂಭವಿಸಿದ ಮೊದಲ ಸಂಪೂರ್ಣ ಸೂರ್ಯಗ್ರಹಣ ಹಗಲನ್ನು ರಾತ್ರಿಯಂತೆ ಮಾಡಿತು. ಐಸ್‌ಲ್ಯಾಂಡ್‌ನಿಂದ ಸ್ಪೇನ್‌ವರೆಗೆ ಜನರು ಸೂರ್ಯನನ್ನು ಚಂದ್ರ ಸಂಪೂರ್ಣವಾಗಿ ಆವರಿಸುವ ಅಪರೂಪದ ದೃಶ್ಯವನ್ನು ಕಣ್ತುಂಬಿಕೊಂಡರು.

ಬುಧವಾರ ಯುರೋಪ್‌ ಖಂಡದಾದ್ಯಂತ ಸಂಪೂರ್ಣ ಸೂರ್ಯಗ್ರಹಣ ಗೋಚರಿಸಿತು. ಬೆಟ್ಟಗಳು, ಸಮುದ್ರ ತೀರಗಳು ಸೇರಿದಂತೆ ವಿವಿಧ ತೆರೆದ ಪ್ರದೇಶಗಳಲ್ಲಿ ಸಾವಿರಾರು ಜನರು ಗುಂಪು-ಗುಂಪಾಗಿ ಸೇರಿ ಈ ಅಪರೂಪದ ಖಗೋಳ ವಿದ್ಯಮಾನವನ್ನು ವೀಕ್ಷಿಸಿದರು. ಹಲವು ದೇಶಗಳಲ್ಲಿ ಹಗಲಿನ ವೇಳೆಯೇ ಕತ್ತಲು ಆವರಿಸಿತ್ತು.

ಭೂಮಿ, ಚಂದ್ರ ಮತ್ತು ಸೂರ್ಯ ಒಂದೇ ಸರಳರೇಖೆಯಲ್ಲಿ ಬಂದಾಗ ಸಂಪೂರ್ಣ ಸೂರ್ಯಗ್ರಹಣ ಸಂಭವಿಸುತ್ತದೆ. ಇದು ಅಪರೂಪವಾಗಿ ನಡೆಯುವ ಖಗೋಳ ವಿದ್ಯಮಾನವಾಗಿದೆ. ಈ ವೇಳೆ ಸೂರ್ಯನು ಕಪ್ಪು ತಟ್ಟೆಯಂತೆ ಕಾಣಿಸಿಕೊಂಡಿದ್ದು, ಸುತ್ತಲೂ ಮಸುಕಾದ ಬೆಳಕು ಗೋಚರಿಸಿತು. ಕಳೆದ 27 ವರ್ಷಗಳಲ್ಲಿ ಯುರೋಪ್‌ನಲ್ಲಿ ಸಂಭವಿಸಿದ ಮೊದಲ ಸಂಪೂರ್ಣ ಸೂರ್ಯಗ್ರಹಣ ಇದಾಗಿದೆ ಎಂಬುದು ವಿಶೇಷ.

ಸ್ಪೇನ್‌ನಲ್ಲಿ ಅದ್ಭುತ ದೃಶ್ಯ

ಸ್ಪೇನ್‌ನಲ್ಲಿ ಸೂರ್ಯಗ್ರಹಣ ಅತ್ಯಂತ ಸ್ಪಷ್ಟವಾಗಿ ಗೋಚರಿಸಿತು. ಮ್ಯಾಡ್ರಿಡ್‌ನ ಉತ್ತರದಲ್ಲಿರುವ ಗ್ರಾಮೀಣ ಪ್ರದೇಶವಾದ ಬುಯಿಟ್ರಾಗೊ ಡಿ ಲೊಜೊಯಾದಲ್ಲಿ ಸ್ಥಳೀಯ ಕಾಲಮಾನ ರಾತ್ರಿ 8:30ರ ಬಳಿಕ ಆಕಾಶ ನಿಧಾನವಾಗಿ ಕತ್ತಲಾಯಿತು. ಸಂಪೂರ್ಣ ಸೂರ್ಯಗ್ರಹಣದ ವೇಳೆ ಚಂದ್ರನ ಅಂಚಿನ ಸುತ್ತ ಸೂರ್ಯನ ಬೆಳಕಿನ ಸಣ್ಣ ಬಿಂದುಗಳಾದ ‘ಬೈಲಿಸ್ ಬೀಡ್ಸ್’ ಹೊಳೆಯುತ್ತಿದ್ದವು. ಈ ಅದ್ಭುತ ದೃಶ್ಯ ಕಂಡು ಜನರು ಚಪ್ಪಾಳೆ ತಟ್ಟಿ, ಸಂಭ್ರಮಿಸಿದರು.

ಆದರೆ ಈ ಅಪರೂಪದ ದೃಶ್ಯ ಕೇವಲ ಒಂದು ನಿಮಿಷದಷ್ಟು ಸಮಯ ಮಾತ್ರ ಗೋಚರಿಸಿತು. ಸ್ಪೇನ್‌ನಲ್ಲಿ ಉತ್ತರ ಸ್ಪೇನ್ ಹಾಗೂ ಬಾಲೆರಿಕ್ ದ್ವೀಪಗಳ ಮೂಲಕ ಗ್ರಹಣದ ಪಥ ಹಾದುಹೋಗಿದ್ದರಿಂದ ಗ್ರಾಮೀಣ ಪ್ರದೇಶಗಳಿಗೆ ಸುಮಾರು 60 ಲಕ್ಷ ಪ್ರವಾಸಿಗರು ಆಗಮಿಸುವ ನಿರೀಕ್ಷೆಯನ್ನು ಅಧಿಕಾರಿಗಳು ಹೊಂದಿದ್ದರು. ಆದರೆ ನಿರೀಕ್ಷೆಗೂ ಮೀರಿ ಜನರು ಆಗಮಿಸಿದ್ದರಿಂದ ಹಲವು ಪ್ರದೇಶಗಳು ಜನರಿಂದ ತುಂಬಿ ತುಳುಕಿದವು.

ಇನ್ನೊಂದು ವಿಶೇಷವೆಂದರೆ, ಐಬೀರಿಯನ್ ಪರ್ಯಾಯದ್ವೀಪದಲ್ಲಿ ಕೊನೆಯ ಬಾರಿಗೆ 1912ರಲ್ಲಿ ಸಂಪೂರ್ಣ ಸೂರ್ಯಗ್ರಹಣ ಗೋಚರಿಸಿತ್ತು. ಇದೀಗ ಮತ್ತೊಂದು ಸಂಪೂರ್ಣ ಸೂರ್ಯಗ್ರಹಣ 2027ರ ಆಗಸ್ಟ್ 2ರಂದು ಸಂಭವಿಸಲಿದೆ.