ಬೆಂಗಳೂರಿನಲ್ಲಿ ರ್ಯಾಪಿಡೋ ಬೈಕ್ ಟ್ಯಾಕ್ಸಿಯಲ್ಲಿ ಪ್ರಯಾಣಿಸುತ್ತಿದ್ದ ವೇಳೆ ಸಂಭವಿಸಿದ ಭೀಕರ ಅಪಘಾತ ಯುವತಿಯ ಬದುಕನ್ನೇ ತಲೆಕೆಳಗಾಗಿಸಿದೆ. ಅಪಘಾತದಲ್ಲಿ ಗಂಭೀರವಾಗಿ ಗಾಯಗೊಂಡ ಯುವತಿ ಇದುವರೆಗೆ ₹20 ಲಕ್ಷಕ್ಕೂ ಅಧಿಕ ವೈದ್ಯಕೀಯ ವೆಚ್ಚ ಭರಿಸಿದ್ದು, ಮಹಿಳಾ ಸುರಕ್ಷತೆಯ ಭರವಸೆ ನೀಡುವ ರ್ಯಾಪಿಡೋ ಅಪಘಾತದ ಬಳಿಕ ಯಾವುದೇ ಸಮರ್ಪಕ ನೆರವು ನೀಡಲಿಲ್ಲ ಎಂದು ಆರೋಪಿಸಿ ಕಂಪನಿ ವಿರುದ್ಧ ದೂರು ದಾಖಲಿಸಿದ್ದಾರೆ. ಈ ಘಟನೆ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಚರ್ಚೆಗೆ ಗ್ರಾಸವಾಗಿದೆ.
ಹೌದು. ಬೆಂಗಳೂರು ಮೂಲದ ಒಳಾಂಗಣ ವಿನ್ಯಾಸಕರಾದ (ಇಂಟೀರಿಯರ್ ಡಿಸೈನರ್) ಸಾನಿ ಕೃಷ್ಣ ಅವರು, ರ್ಯಾಪಿಡೋ ಬೈಕ್ ಟ್ಯಾಕ್ಸಿ ಅಪಘಾತದ ಬಳಿಕ ಕಂಪನಿ ತಮ್ಮನ್ನು ಸಂಪೂರ್ಣವಾಗಿ ನಿರ್ಲಕ್ಷಿಸಿದೆ ಎಂದು ಆರೋಪಿಸಿದ್ದಾರೆ. ಈ ಅಪಘಾತದಲ್ಲಿ ಗಂಭೀರವಾಗಿ ಗಾಯಗೊಂಡ ಅವರು ₹20 ಲಕ್ಷಕ್ಕೂ ಅಧಿಕ ವೈದ್ಯಕೀಯ ವೆಚ್ಚ ಭರಿಸಿರುವುದಾಗಿ ಹೇಳಿದ್ದು, ತಮ್ಮ ನೋವಿನ ಅನುಭವವನ್ನು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದಾರೆ. ಈ ವಿಡಿಯೋ ವೈರಲ್ ಆದ ಬೆನ್ನಲ್ಲೇ ರ್ಯಾಪಿಡೋ ಪ್ರತಿಕ್ರಿಯೆ ನೀಡಿದೆ.
ಏನಿದು ಘಟನೆ?
ಕೇರಳ ಮೂಲದ 32 ವರ್ಷದ ಸಾನಿ ಕೃಷ್ಣ ಅವರು ಬೆಂಗಳೂರಿನ ಬೈರಸಂದ್ರ ನಿವಾಸಿಯಾಗಿದ್ದು, ಜೂನ್ 17ರಂದು ಬೆಳಿಗ್ಗೆ ತಮ್ಮ ಕಚೇರಿ ಇರುವ ದೊಮ್ಮಲೂರಿಗೆ ತೆರಳಲು ರ್ಯಾಪಿಡೋ ಬೈಕ್ ಟ್ಯಾಕ್ಸಿಯನ್ನು ಬುಕ್ ಮಾಡಿದ್ದರು.ಪ್ರಯಾಣ ಆರಂಭವಾಗಿ ಒಂದು ಕಿಲೋಮೀಟರ್ ಕೂಡ ಸಾಗದಿದ್ದಾಗ, ಬಾಗ್ಮನೆ ಟೆಕ್ ಪಾರ್ಕ್ ಸಮೀಪ ಬೈಕ್ ಚಾಲಕ ಟ್ರ್ಯಾಕ್ಟರ್ನ್ನು ಅಪಾಯಕಾರಿಯಾಗಿ ಓವರ್ಟೇಕ್ ಮಾಡಲು ಯತ್ನಿಸಿದ್ದಾನೆ ಎನ್ನಲಾಗಿದೆ. ಈ ವೇಳೆ ಬೈಕ್ ನಿಯಂತ್ರಣ ತಪ್ಪಿ ಅಪಘಾತ ಸಂಭವಿಸಿದೆ.ಅಪಘಾತದ ತೀವ್ರತೆಗೆ ಸಾನಿ ರಸ್ತೆಗೆ ಎಸೆಯಲ್ಪಟ್ಟಿದ್ದು, ಬಳಿಕ ಟ್ರ್ಯಾಕ್ಟರ್ ಅವರ ಮೇಲೆ ಹರಿದ ಪರಿಣಾಮ ಜೀವಕ್ಕೆ ಅಪಾಯ ಉಂಟುಮಾಡುವಷ್ಟು ಗಂಭೀರ ಗಾಯಗಳಾಗಿವೆ ಎಂದು ಅವರು ಆರೋಪಿಸಿದ್ದಾರೆ.
₹20 ಲಕ್ಷಕ್ಕೂ ಅಧಿಕ ಆಸ್ಪತ್ರೆ ವೆಚ್ಚ
ಅಪಘಾತದ ಬಳಿಕ ಸಾನಿ ಅವರನ್ನು ಮೊದಲು ಸಮೀಪದ ಆಸ್ಪತ್ರೆಗೆ ದಾಖಲಿಸಿ, ನಂತರ ಬೆಂಗಳೂರಿನ ಮಣಿಪಾಲ್ ಆಸ್ಪತ್ರೆಗೆ ಸ್ಥಳಾಂತರಿಸಲಾಯಿತು. ಅಲ್ಲಿ ಹಲವು ಶಸ್ತ್ರಚಿಕಿತ್ಸೆಗಳು ನಡೆದವು. ಬಳಿಕ ಹೆಚ್ಚಿನ ಚಿಕಿತ್ಸೆ ಮತ್ತು ಪುನರ್ವಸತಿಗಾಗಿ ಕೇರಳದ ಕೋഴിക്കೋಡ್ನ ಮಿಥ್ರಾಸ್ ಆಸ್ಪತ್ರೆಗೆ ಕರೆದೊಯ್ಯಲಾಯಿತು.ಈ ಅಪಘಾತದಲ್ಲಿ ಅವರಿಗೆ ಹಲವಾರು ಪಕ್ಕೆಲುಬುಗಳು ಮುರಿತ, ಭುಜದ ಮೂಳೆ ಮುರಿತ, ಮುಖಕ್ಕೆ ತೀವ್ರ ಗಾಯಗಳಾಗಿ ಸೌಂದರ್ಯ ಶಸ್ತ್ರಚಿಕಿತ್ಸೆಯ ಅಗತ್ಯ, ಯಕೃತ್ತಿಗೆ ಗಂಭೀರ ಹಾನಿ, ಶ್ವಾಸಕೋಶ ಕುಸಿತ ಹಾಗೂ ತುರ್ತು ಸ್ಪ್ಲೀನ್ (ಪ್ಲೀಹೆ) ಶಸ್ತ್ರಚಿಕಿತ್ಸೆ ಸೇರಿದಂತೆ ಅನೇಕ ಗಂಭೀರ ಗಾಯಗಳಾಗಿವೆ.
ಅಪಘಾತ ನಡೆದ ಎರಡು ವಾರಗಳಾದರೂ ಅವರು ಇನ್ನೂ ಹಾಸಿಗೆ ಹಿಡಿದಿದ್ದು, ಪೋಸ್ಟ್ ಟ್ರಾಮಾಟಿಕ್ ಸ್ಟ್ರೆಸ್ ಡಿಸಾರ್ಡರ್ (PTSD) ಚಿಕಿತ್ಸೆಯನ್ನೂ ಪಡೆಯುತ್ತಿದ್ದಾರೆ.
ಸಾನಿ ಅವರ ಪ್ರಕಾರ, ಈಗಾಗಲೇ ವೈದ್ಯಕೀಯ ವೆಚ್ಚ ₹20 ಲಕ್ಷ ದಾಟಿದೆ. ಅವರ ಸಂಬಂಧಿ ಅದ್ವೈತ್ ಪಿ. ಅವರ ಹೇಳಿಕೆಯಂತೆ, ಒಟ್ಟು ಚಿಕಿತ್ಸೆ ಮತ್ತು ಆರೈಕೆ ವೆಚ್ಚ ₹25 ಲಕ್ಷ ಮೀರಿದ್ದು, ಮುಂದಿನ ದಿನಗಳಲ್ಲಿ ಇನ್ನಷ್ಟು ಹೆಚ್ಚಾಗುವ ಸಾಧ್ಯತೆ ಇದೆ.
ರ್ಯಾಪಿಡೋ ವಿರುದ್ಧ ಗಂಭೀರ ಆರೋಪ
ಇನ್ಸ್ಟಾಗ್ರಾಂನಲ್ಲಿ ವೈರಲ್ ಆದ ವಿಡಿಯೋದಲ್ಲಿ ಸಾನಿ, ಮಹಿಳಾ ಸುರಕ್ಷತೆ ಬಗ್ಗೆ ಜಾಹೀರಾತು ಮಾಡುವ ರ್ಯಾಪಿಡೋ ಕಂಪನಿ ಅಪಘಾತದ ಬಳಿಕ ಯಾವುದೇ ಸಮರ್ಪಕ ನೆರವು ನೀಡಲಿಲ್ಲ ಎಂದು ಆರೋಪಿಸಿದ್ದಾರೆ.
ರ್ಯಾಪಿಡೋ ಪ್ರತಿಕ್ರಿಯೆ
ಸಾಮಾಜಿಕ ಜಾಲತಾಣಗಳಲ್ಲಿ ಈ ಪ್ರಕರಣ ಭಾರೀ ಚರ್ಚೆಗೆ ಗ್ರಾಸವಾದ ನಂತರ ರ್ಯಾಪಿಡೋ ಅಧಿಕೃತ ಹೇಳಿಕೆ ಬಿಡುಗಡೆ ಮಾಡಿದೆ.”ನಾವು ಸಂತ್ರಸ್ತೆಯ ಕುಟುಂಬದೊಂದಿಗೆ ನಿರಂತರ ಸಂಪರ್ಕದಲ್ಲಿದ್ದೇವೆ. ಅವರಿಗೆ ಸಾಧ್ಯವಾದ ಎಲ್ಲ ರೀತಿಯ ನೆರವು ಮತ್ತು ಬೆಂಬಲವನ್ನು ನೀಡಲು ಮುಂದೆಯೂ ನಮ್ಮ ಸಂಪರ್ಕ ಮುಂದುವರಿಯಲಿದೆ,” ಎಂದು ಕಂಪನಿ ತಿಳಿಸಿದೆ.
