ಬೆಂಗಳೂರು: ಪ್ರತಿಯೊಬ್ಬ ನಾಗರಿಕರಿಗೂ ಡಿಜಿಟಲ್ ಇ-ಖಾತಾವನ್ನು ಸಂಪೂರ್ಣ ಆನ್‌ಲೈನ್ ಹಾಗೂ ಮುಖಾಮುಖಿರಹಿತ ವ್ಯವಸ್ಥೆಯ ಮೂಲಕ ಬೆರಳ ತುದಿಯಲ್ಲಿ ಲಭ್ಯವಾಗಿಸಬೇಕೆಂಬ ಮುಖ್ಯಮಂತ್ರಿಗಳಾದ ಡಿ.ಕೆ. ಶಿವಕುಮಾರ್ ಅವರ ಪರಿಕಲ್ಪನೆಯಂತೆ ಗ್ರೇಟರ್ ಬೆಂಗಳೂರು ಪ್ರಾಧಿಕಾರವು 'ಇ-ಆಸ್ತಿ 2.0' ತಂತ್ರಾಂಶವನ್ನು ಅನುಷ್ಠಾನಗೊಳಿಸಿದೆ. ಇದನ್ನು ಗ್ರೇಟರ್ ಬೆಂಗಳೂರು ಅಭಿವೃದ್ಧಿ ಸಚಿವ ಕೃಷ್ಣಬೈರೇಗೌಡ ಅವರು ಲೋಕಾರ್ಪಣೆಗೊಳಿಸಿದ್ದಾರೆ.
ಹಿಂದಿನ ಬೃಹತ್ ಬೆಂಗಳೂರು ಮಹಾನಗರ ಪಾಲಿಕೆ ವ್ಯಾಪ್ತಿಯಲ್ಲಿ ಅಕ್ಟೋಬರ್ 2024ರಲ್ಲಿ ಜಾರಿಗೆ ಬಂದಿದ್ದ ಇ-ಆಸ್ತಿ 1.0 ತಂತ್ರಾಂಶದ ಯಶಸ್ಸು ಹಾಗೂ ಸುಮಾರು 25 ಲಕ್ಷ ಇ-ಖಾತಾಗಳ ಗಣಕೀಕರಣದ ಸಾಧನೆಯನ್ನು ಪರಿಗಣಿಸಿ ಭಾರತ ಸರ್ಕಾರವು ಈ ಯೋಜನೆಗೆ "ರಾಷ್ಟ್ರೀಯ ಇ-ಆಡಳಿತ ಚಿನ್ನದ ಪ್ರಶಸ್ತಿ - 2025" ಅನ್ನು ಪ್ರದಾನ ಮಾಡಿದೆ. ಈ ಸಾಧನೆಯ ಮುಂದುವರಿದ ಭಾಗವಾಗಿ ಗ್ರೇಟರ್ ಬೆಂಗಳೂರು ಪ್ರಾಧಿಕಾರವು ತನ್ನದೇ ಆಂತರಿಕ ಮಾಹಿತಿ ತಂತ್ರಜ್ಞಾನ ತಂಡದ ಮೂಲಕ ಮುಂದಿನ ಪೀಳಿಗೆಯ ಸುಧಾರಿತ ತಂತ್ರಜ್ಞಾನ ಒಳಗೊಂಡ 'ಇ-ಆಸ್ತಿ 2.0' ವೇದಿಕೆಯನ್ನು ಅಭಿವೃದ್ಧಿಪಡಿಸಿದೆ.
ಇ-ಆಸ್ತಿ 2.0 ಯೋಜನೆಯ ಪ್ರಮುಖ ಉದ್ದೇಶಗಳು
ಇ-ಆಸ್ತಿ 1.0 ಯಿಂದ ಸುಗಮ ಪರಿವರ್ತನೆಯನ್ನು ಖಚಿತಪಡಿಸಿಕೊಳ್ಳುತ್ತಲೇ ನಾಗರಿಕ ಸ್ನೇಹಿ, ವೇಗದ, ಹೆಚ್ಚು ಸುರಕ್ಷಿತ, ಸಮನ್ವಯಗೊಂಡ ಹಾಗೂ ಸ್ವಯಂಚಾಲಿತ ಇ-ಖಾತಾ ವ್ಯವಸ್ಥೆಯನ್ನು ಒದಗಿಸುವುದು ಈ ಯೋಜನೆಯ ಪ್ರಮುಖ ಉದ್ದೇಶವಾಗಿದೆ. ಇದರ ಅಡಿಯಲ್ಲಿ ನಾಗರಿಕರ ಅರ್ಜಿಗಳ ವಿಲೇವಾರಿಯ ವೇಗ ಹಾಗೂ ದಕ್ಷತೆಯನ್ನು ಹೆಚ್ಚಿಸುವುದು, ಹೊಸ ವ್ಯವಹಾರ ನಿಯಮಗಳು ಹಾಗೂ ಆಡಳಿತಾತ್ಮಕ ಅಗತ್ಯಗಳನ್ನು ಅನುಷ್ಠಾನಗೊಳಿಸಲು ಹೊಂದಿಕೊಳ್ಳುವ ವೇದಿಕೆಯನ್ನು ಒದಗಿಸುವುದು ಗುರಿಯಾಗಿದೆ.
ಅಲ್ಲದೆ, ಸಾಧ್ಯವಿರುವ ಕಡೆಗಳಲ್ಲಿ ಕಾರ್ಯಹರಿವುಗಳನ್ನು ಸರಳೀಕರಿಸಿ ಸ್ವಯಂಚಾಲಿತಗೊಳಿಸುವುದು, ಕಾವೇರಿ, ಬೆಸ್ಕಾಂ, ಬಿಡಬ್ಲ್ಯುಎಸ್‌ಎಸ್‌ಬಿ ಹಾಗೂ ನಗರ ಯೋಜನೆ ಸೇರಿದಂತೆ ಇತರ ಸರ್ಕಾರಿ ವ್ಯವಸ್ಥೆಗಳೊಂದಿಗೆ ಉತ್ತಮ ಸಮನ್ವಯ ಸಾಧಿಸುವುದು ಮತ್ತು ವಿವಿಧ ಹಂತಗಳಲ್ಲಿರುವ ಅರ್ಜಿಗಳ ಮೇಲ್ವಿಚಾರಣೆ ಹಾಗೂ ಗೋಚರತೆಯನ್ನು ಸುಧಾರಿಸುವುದು ಈ ನೂತನ ವ್ಯವಸ್ಥೆಯ ಮೂಲ ಉದ್ದೇಶಗಳಾಗಿವೆ.
ನೂತನ ತಂತ್ರಾಂಶದ ಪ್ರಮುಖ ವೈಶಿಷ್ಟ್ಯಗಳು ಮತ್ತು ಮಾಡ್ಯೂಲ್‌ಗಳು
ಈ ಉನ್ನತೀಕರಿಸಲಾದ ವ್ಯವಸ್ಥೆಯಲ್ಲಿ ಹಲವು ಪ್ರಮುಖ ಮಾಡ್ಯೂಲ್ ಹಾಗೂ ಸುಧಾರಣೆಗಳನ್ನು ಪರಿಚಯಿಸಲಾಗಿದೆ. ನಾಗರಿಕರು ಕಚೇರಿಗಳಿಗೆ ಖುದ್ದಾಗಿ ಭೇಟಿ ನೀಡುವ ಅಗತ್ಯವನ್ನು ಕಡಿಮೆಗೊಳಿಸಿ, ಸರಳ ಹಾಗೂ ಪಾರದರ್ಶಕವಾಗಿ ಇ-ಖಾತಾ ಸೇವೆಗಳನ್ನು ಪಡೆಯಲು ಉನ್ನತೀಕರಿಸಲಾದ ನಾಗರಿಕ ಮಾಡ್ಯೂಲ್ ಅನ್ನು ರೂಪಿಸಲಾಗಿದೆ. ಕರಡು ಇ-ಖಾತಾವನ್ನು ಅಂತಿಮ ಇ-ಖಾತಾವಾಗಿ ಪರಿವರ್ತಿಸುವ ಪ್ರಕ್ರಿಯೆಗೆ ಅವಕಾಶ ಕಲ್ಪಿಸಲಾಗಿದ್ದು, ವಿವಿಧ ಸ್ವರೂಪದ ಆಸ್ತಿ ಮಾಲೀಕತ್ವ ಬದಲಾವಣೆ ಹಾಗೂ ಖಾತಾ ವರ್ಗಾವಣೆ ಸೇವೆಗಳನ್ನು ಒದಗಿಸಲಾಗುತ್ತದೆ.
ಹೊಸ ಖಾತಾ ಹಾಗೂ ಸಗಟು ಖಾತಾ ಅಂದರೆ ಬಹುಮಹಡಿ ಕಟ್ಟಡಗಳ ಫ್ಲಾಟ್‌ಗಳು ಅಥವಾ ಘಟಕಗಳ ಅರ್ಜಿಗಳನ್ನು ಸಲ್ಲಿಸಲು ಸೌಲಭ್ಯ ಕಲ್ಪಿಸಲಾಗಿದೆ. ಇದರ ಜೊತೆಗೆ ಬಿಡಿಎ ಅಥವಾ ಬಿಎಂಐಸಿಎಪಿಎ ಮುಂತಾದ ಸಕ್ಷಮ ಪ್ರಾಧಿಕಾರಗಳಿಂದ ಅನುಮೋದನೆಗೊಂಡ ನಿವೇಶನ ವಿಭಜನೆ, ಅಂತಿಮ ಬಹುಮಹಡಿ ವಾಣಿಜ್ಯ ಘಟಕಗಳ ಎ-ಖಾತಾ ವಿಭಜನೆ ಹಾಗೂ ಆಸ್ತಿಗಳ ಒಂದುಗೂಡಿಸುವಿಕೆ ಮಾಡ್ಯೂಲ್‌ಗಳನ್ನು ಹೊಸದಾಗಿ ಪರಿಚಯಿಸಲಾಗಿದೆ. ಕಾವೇರಿ, ಬೆಸ್ಕಾಂ ಹಾಗೂ ಬಿಡಬ್ಲ್ಯುಎಸ್‌ಎಸ್‌ಬಿ ವ್ಯವಸ್ಥೆಗಳೊಂದಿಗಿನ ಸಮನ್ವಯದಿಂದ ಇ-ಖಾತಾ ಆಧಾರದ ಮೇಲೆ ಎಲ್ಲಾ ವ್ಯವಸ್ಥೆಗಳಲ್ಲಿ ದಾಖಲೆಗಳು ಸ್ವಯಂಚಾಲಿತವಾಗಿ ನವೀಕರಣಗೊಳ್ಳಲಿವೆ.
ಸೇವೆಗಳ ಕಾರ್ಯಾರಂಭದ ಹಂತ-ಹಂತದ ವೇಳಾಪಟ್ಟಿ
ಸೇವೆಗಳ ನಿರಂತರತೆಯನ್ನು ಕಾಪಾಡಿಕೊಳ್ಳುವ ಮತ್ತು ಸುಗಮ ಪರಿವರ್ತನೆಯನ್ನು ಖಚಿತಪಡಿಸುವ ದೃಷ್ಟಿಯಿಂದ ಇ-ಆಸ್ತಿ 2.0 ರ ಕಾರ್ಯಾರಂಭವನ್ನು ಹಂತ ಹಂತವಾಗಿ ಕೈಗೊಳ್ಳಲು ಯೋಜಿಸಲಾಗಿದೆ. ಸೆಪ್ಟೆಂಬರ್ 22, 2026 ರಂದು ಇ-ಆಸ್ತಿ 2.0 ನಾಗರಿಕ ಮಾಡ್ಯೂಲ್ ಹಾಗೂ ಇಲಾಖಾ ಮಾಡ್ಯೂಲ್ ಕಾರ್ಯಾರಂಭಗೊಂಡಿವೆ.
ಸೆಪ್ಟೆಂಬರ್ 25, 2026 ರಂದು ಅಂತಿಮ ಇ-ಖಾತಾ ತಿದ್ದುಪಡಿ ಹಾಗೂ ಹೊಸ ಖಾತಾ ಮತ್ತು ಬಹು-ಘಟಕಗಳ ಹೊಸ ಖಾತಾ ನಾಗರಿಕ ಮಾಡ್ಯೂಲ್ ಚಾಲನೆಗೆ ಬರಲಿದೆ. ಸೆಪ್ಟೆಂಬರ್ 30 ರಂದು ಅಂತಿಮ ಇ-ಖಾತಾ ತಿದ್ದುಪಡಿ ಇಲಾಖಾ ಮಾಡ್ಯೂಲ್, ಅಕ್ಟೋಬರ್ 05 ರಂದು ಅಂತಿಮ ವಾಣಿಜ್ಯ ಬಹುಮಹಡಿ ಘಟಕಗಳ ಎ-ಖಾತಾಗಳ ವಿಭಜನೆ, ಅಕ್ಟೋಬರ್ 10 ರಂದು ಆಸ್ತಿ ವಿಭಜನೆ ಮತ್ತು ಉಪ-ವಿಭಜನೆ ಹಾಗೂ ಅಕ್ಟೋಬರ್ 15 ರಂದು ಆಸ್ತಿಗಳ ಒಂದುಗೂಡಿಸುವಿಕೆ ಮಾಡ್ಯೂಲ್‌ಗಳು ಕಾರ್ಯಾರಂಭಗೊಳ್ಳಲಿವೆ.
ನಿರೀಕ್ಷಿತ ಫಲಿತಾಂಶಗಳು ಮತ್ತು ಮುಂದಿನ ಹೆಜ್ಜೆ
ಇ-ಆಸ್ತಿ 2.0 ಅನುಷ್ಠಾನದಿಂದ ಸರಳ ಹಾಗೂ ಆಧುನಿಕ ವ್ಯವಸ್ಥೆಯ ಮೂಲಕ ನಾಗರಿಕರ ಅನುಭವದಲ್ಲಿ ಸುಧಾರಣೆಯಾಗಲಿದ್ದು, ಸುಗಮಗೊಳಿಸಲಾದ ಡಿಜಿಟಲ್ ಕಾರ್ಯಹರಿವುಗಳಿಂದ ಅರ್ಜಿಗಳ ತ್ವರಿತ ವಿಲೇವಾರಿ ಸಾಧ್ಯವಾಗಲಿದೆ. ಅರ್ಜಿ ವಿಲೇವಾರಿ ಹಾಗೂ ಸ್ಥಿತಿಗತಿ ಮಾಹಿತಿಯಲ್ಲಿ ಹೆಚ್ಚಿನ ಪಾರದರ್ಶಕತೆ ಸಿಗುವುದರೊಂದಿಗೆ ಮಾನವ ಹಸ್ತಕ್ಷೇಪದ ಪ್ರಮಾಣ ಕಡಿಮೆಯಾಗಲಿದೆ. ದತ್ತಾಂಶ ಸುರಕ್ಷತೆ, ಏಕರೂಪತೆ ಮತ್ತು ಇತರೆ ಸಂಸ್ಥೆಗಳೊಂದಿಗೆ ಸುದೃಢ ಸಮನ್ವಯ ಏರ್ಪಡಲಿದ್ದು, ಮುಂಬರುವ ದಿನಗಳಲ್ಲಿ ಹೊಸ ವೈಶಿಷ್ಟ್ಯಗಳನ್ನು ತ್ವರಿತವಾಗಿ ಅಳವಡಿಸಿಕೊಳ್ಳಲು ಇ-ಆಸ್ತಿ 2.0 ದಾರಿ ಮಾಡಿಕೊಡಲಿದೆ.
