ನಮ್ಮಲ್ಲಿ ಸಾಕಷ್ಟು ಸೌಲಭ್ಯಗಳಿದ್ದರೂ, ಕುಟುಂಬದವರ ಪ್ರೋತ್ಸಾಹವಿದ್ದರೂ ವಿವಿಧ ಕಾರಣಗಳನ್ನು ಹೇಳುತ್ತಾ ತಮ್ಮ ಗುರಿ ಸಾಧಿಸಲು ಹಿಂದೆ ಸರಿಯುತ್ತಾರೆ. ಆದರೆ ಕೆಲವರು ಇದಕ್ಕೆ ಸಂಪೂರ್ಣ ಭಿನ್ನವಾಗಿರುತ್ತಾರೆ. ಯಾವುದೇ ಸವಾಲು ಎದುರಾದರೂ ತಮ್ಮ ಗುರಿ ಸಾಧಿಸುವವರೆಗೆ ಹಠ ಬಿಡುವುದಿಲ್ಲ.
ಸರ್ಕಾರಿ ಉದ್ಯೋಗ ಪಡೆಯಬೇಕೆಂಬ ಛಲವಿದ್ದರೆ ಯಾವುದೇ ಸವಾಲು ಅಡ್ಡಿಯಾಗುವುದಿಲ್ಲ ಎಂಬುದಕ್ಕೆ ಜಾರ್ಖಂಡ್‌ನ ಕವಿತಾ ಕುಮಾರಿ ಉದಾಹರಣೆಯಾಗಿದ್ದಾರೆ. ಹೋಂಗಾರ್ಡ್ ನೇಮಕಾತಿಯ ದೈಹಿಕ ಪರೀಕ್ಷೆಯಲ್ಲಿ ಸೀರೆಯುಟ್ಟು, ಬರಿಗಾಲಿನಲ್ಲಿ 1600 ಮೀಟರ್ ಓಡಿದ ಅವರು ಕೇವಲ 6 ನಿಮಿಷಗಳಲ್ಲಿ ಓಟ ಪೂರ್ಣಗೊಳಿಸಿದ್ದಾರೆ. ಶೂ, ಟ್ರ್ಯಾಕ್‌ಸೂಟ್‌ ಸೇರಿದಂತೆ ಯಾವುದೇ ಕ್ರೀಡಾ ಸೌಲಭ್ಯವಿಲ್ಲದಿದ್ದರೂ ಕವಿತಾ ತೋರಿದ ಅದಮ್ಯ ಆತ್ಮವಿಶ್ವಾಸ ಮತ್ತು ಪರಿಶ್ರಮಕ್ಕೆ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಮೆಚ್ಚುಗೆ ವ್ಯಕ್ತವಾಗುತ್ತಿದೆ.
ಇಂತಹ ಮಹಿಳೆಯೊಬ್ಬರ ಸಾಹಸ ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಮೆಚ್ಚುಗೆಗೆ ಪಾತ್ರವಾಗಿದೆ. ಜಾರ್ಖಂಡ್‌ನ ರಾಮಗಢ್‌ನಲ್ಲಿ ಸರ್ಕಾರಿ ಉದ್ಯೋಗ ಪಡೆಯುವ ಉದ್ದೇಶದಿಂದ ಮಹಿಳೆಯೊಬ್ಬರು ಚೀರೆಯುಟ್ಟು, ಬರಿಗಾಲಿನಲ್ಲಿ 1600 ಮೀಟರ್ ಓಡಿ ಗಮನ ಸೆಳೆದಿದ್ದಾರೆ.
ಜಾರ್ಖಂಡ್ ಸರ್ಕಾರ ಇತ್ತೀಚೆಗೆ ಹೋಂಗಾರ್ಡ್ ಹುದ್ದೆಗಳ ನೇಮಕಾತಿಗಾಗಿ ಅಧಿಸೂಚನೆ ಹೊರಡಿಸಿತ್ತು. ಈ ಹುದ್ದೆಗಳಿಗೆ ಹಲವರು ಅರ್ಜಿ ಸಲ್ಲಿಸಿದ್ದರು. ರಾಮಗಢ್‌ನ ಕವಿತಾ ಕುಮಾರಿ ಕೂಡ ಹೋಂಗಾರ್ಡ್ ಹುದ್ದೆಗೆ ಅರ್ಜಿ ಸಲ್ಲಿಸಿದ್ದರು. ನೇಮಕಾತಿಯ ಭಾಗವಾಗಿ ನಡೆದ ದೈಹಿಕ ಸಾಮರ್ಥ್ಯ ಪರೀಕ್ಷೆಯಲ್ಲೂ ಅವರು ಭಾಗವಹಿಸಿದ್ದರು.
ಈ ವೇಳೆ ಕವಿತಾ ಕುಮಾರಿ 1600 ಮೀಟರ್ ಓಟದ ಸ್ಪರ್ಧೆಯಲ್ಲಿ ಪಾಲ್ಗೊಂಡರು. ವಿಶೇಷವೆಂದರೆ, ಅವರು ಯಾವುದೇ ಕ್ರೀಡಾ ಉಡುಪು ಅಥವಾ ರನ್ನಿಂಗ್ ಶೂ ಧರಿಸಿರಲಿಲ್ಲ. ಚೀರೆಯುಟ್ಟೇ, ಬರಿಗಾಲಿನಲ್ಲಿ ಇತರ ಅಭ್ಯರ್ಥಿಗಳೊಂದಿಗೆ ಸ್ಪರ್ಧಿಸಿ ನಿಗದಿತ ಸಮಯಕ್ಕಿಂತಲೂ ಮುಂಚಿತವಾಗಿ ಓಟವನ್ನು ಪೂರ್ಣಗೊಳಿಸಿದರು.
1600 ಮೀಟರ್ ಓಟವನ್ನು 10 ನಿಮಿಷಗಳಲ್ಲಿ ಪೂರ್ಣಗೊಳಿಸುವ ಗುರಿ ನೀಡಲಾಗಿತ್ತು. ಆದರೆ ಕವಿತಾ ಕುಮಾರಿ ಕೇವಲ 6 ನಿಮಿಷಗಳಲ್ಲೇ ಓಟವನ್ನು ಪೂರ್ಣಗೊಳಿಸಿ ಎಲ್ಲರನ್ನೂ ಅಚ್ಚರಿಗೊಳಿಸಿದರು. ಬಿಸಿಲಿನ ನಡುವೆಯೂ ಸೀರೆಯ ಸೆರಗನ್ನು ಸೊಂಟಕ್ಕೆ ಬಿಗಿಯಾಗಿ ಕಟ್ಟಿಕೊಂಡು ಅವರು ಓಡಿದ ದೃಶ್ಯಗಳ ವಿಡಿಯೋ ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.
ತೀವ್ರ ಬಡತನದ ನಡುವೆಯೂ ಸರ್ಕಾರಿ ಉದ್ಯೋಗ ಪಡೆದು ತಮ್ಮ ಕುಟುಂಬಕ್ಕೆ ಆಧಾರವಾಗಬೇಕು ಎಂಬ ಕವಿತಾ ಕುಮಾರಿಯ ಸಂಕಲ್ಪಕ್ಕೆ ದೇಶಾದ್ಯಂತ ನೆಟ್ಟಿಗರು ಮೆಚ್ಚುಗೆ ವ್ಯಕ್ತಪಡಿಸುತ್ತಿದ್ದಾರೆ. ಅವರ ಪರಿಶ್ರಮ ಮತ್ತು ಛಲಕ್ಕೆ ಹಲವರು ‘ಸಲ್ಯೂಟ್’ ಎಂದು ಕಾಮೆಂಟ್ ಮಾಡುತ್ತಿದ್ದಾರೆ. ಈ ಘಟನೆ ತಿಳಿದು ಸ್ಥಳೀಯ ಡಿಫೆನ್ಸ್ ಅಕಾಡೆಮಿಯ ಸದಸ್ಯರು ಕವಿತಾ ಕುಮಾರಿಯ ಮನೆಗೆ ತೆರಳಿ, ಶಾಲು ಹೊದಿಸಿ ಸನ್ಮಾನಿಸಿದ್ದಾರೆ.
ಕವಿತಾ ಕುಮಾರಿಯ ಈ ಸಾಧನೆ ಕೇವಲ ಒಂದು ಓಟದ ಗೆಲುವಲ್ಲ, ಕನಸು ನನಸಾಗಿಸಿಕೊಳ್ಳಲು ಸೌಲಭ್ಯಗಳಿಗಿಂತ ಛಲ ಮತ್ತು ಪರಿಶ್ರಮವೇ ಮುಖ್ಯ ಎಂಬುದನ್ನು ತೋರಿಸಿದೆ. ಸರ್ಕಾರಿ ಉದ್ಯೋಗ ಪಡೆಯುವ ಅವರ ಹೋರಾಟಕ್ಕೆ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಮೆಚ್ಚುಗೆ ವ್ಯಕ್ತವಾಗುತ್ತಿದ್ದು, ಅವರ ಆತ್ಮವಿಶ್ವಾಸ ಅನೇಕರಿಗೆ ಸ್ಫೂರ್ತಿಯಾಗಿದೆ.
