ಬಾಲಿವುಡ್‌ನ ಫಿಟ್ನೆಸ್ ಪ್ರಿಯ ನಟಿ ಅಲಯಾ ಎಫ್ ತಮ್ಮ ಕಾಯಾಕಲ್ಪ ಹಾಗೂ ಫಿಟ್ನೆಸ್ ವಿಚಾರದಲ್ಲಿ ಮತ್ತೊಂದು ಹೆಜ್ಜೆ ಮುಂದೆ ಇಟ್ಟಿದ್ದಾರೆ. ಈ ಹಿಂದೆ ಹಲವಾರು ಬಾರಿ ’75 ಹಾರ್ಡ್ ಫಿಟ್ನೆಸ್ ಚಾಲೆಂಜ್’ ಯಶಸ್ವಿಯಾಗಿ ಪೂರ್ಣಗೊಳಿಸಿದ್ದ ಅವರು, ಇದೀಗ ಅದನ್ನು ‘118 ದಿನಗಳ ಕಠಿಣ ಸವಾಲು’ ಆಗಿ ಪರಿವರ್ತಿಸಿಕೊಂಡು ನಿಯಮಿತವಾಗಿ ಅಭ್ಯಾಸ ಮಾಡುತ್ತಿದ್ದಾರೆ.
ಸಾಮಾನ್ಯವಾಗಿ ’75 ಹಾರ್ಡ್ ಚಾಲೆಂಜ್’ ಎಂಬುದು ಮಾನಸಿಕ ಶಕ್ತಿ ಮತ್ತು ಶಿಸ್ತನ್ನು ಹೆಚ್ಚಿಸುವ 75 ದಿನಗಳ ಕಠಿಣ ಯೋಜನೆಯಾಗಿದೆ. ಇದರಲ್ಲಿ ಯಾವುದೇ ದಿನ ಅಥವಾ ಕೆಲಸವನ್ನು ತಪ್ಪಿಸದೇ ನಿರಂತರವಾಗಿ ಕೈಗೊಳ್ಳಬೇಕಾಗುತ್ತದೆ. ಆದರೆ ಈ ಬಾರಿ ಅದನ್ನು 118 ದಿನಗಳಿಗೆ ವಿಸ್ತರಿಸಿರುವ ಬಗ್ಗೆ ಮಾತನಾಡಿರುವ ನಟಿ, “ಮೊದಲ ಬಾರಿ ಈ ಸವಾಲು ಸ್ವೀಕರಿಸಿದಾಗ ನನ್ನ ಜೀವನ ಸಂಪೂರ್ಣ ಬದಲಾಯಿತು. ಆ ನಂತರ ನನಗೆ ಇದು ಅಭ್ಯಾಸವಾಗಿ ಮಾರ್ಪಟ್ಟಿತು. ಈ ಫಿಟ್ನೆಸ್ ಪ್ರಯಾಣ ನನ್ನಲ್ಲಿ ಇನ್ನೇನು ಬದಲಾವಣೆ ತರಬಹುದು ಎಂಬ ಕುತೂಹಲದಿಂದ ನಾನು ಇದನ್ನು ಮುಂದುವರಿಸುತ್ತಿದ್ದೇನೆ” ಎಂದಿದ್ದಾರೆ.
ಹಬ್ಬಗಳು, ಮದುವೆ ಸಮಾರಂಭಗಳು ಹಾಗೂ ತಮ್ಮ ಜನ್ಮದಿನದಂತಹ ಆಚರಣೆಗಳ ನಡುವೆಯೂ ಈ ಕಠಿಣ ನಿಯಮವನ್ನು ಪಾಲಿಸುತ್ತಿರುವ ಅವರು, “ಹೆಚ್ಚು ಪ್ರಲೋಭನೆಗಳು ಇರುವ ಸಮಯದಲ್ಲೇ ಇಂತಹ ಒಳ್ಳೆಯ ಅಭ್ಯಾಸಗಳನ್ನು ಬೆಳೆಸಿಕೊಳ್ಳುವುದು ಮುಖ್ಯ. ಇದರಿಂದ ಮಾನಸಿಕವಾಗಿ ಹೆಚ್ಚು ದೃಢವಾಗಲು ಸಾಧ್ಯವಾಗುತ್ತದೆ. ಈ ಅಭ್ಯಾಸದಿಂದ ನನಗೆ ಮಾನಸಿಕ ಸ್ಪಷ್ಟತೆ ಸಿಕ್ಕಿದ್ದು, ಸರಿಯಾದ ನಿರ್ಧಾರಗಳನ್ನು ತೆಗೆದುಕೊಳ್ಳಲು ನೆರವಾಗಿದೆ” ಎಂದು ಹೇಳಿದ್ದಾರೆ.
ಇನ್ನು ನಟಿ ಅಲಯಾ ಅಭಿನಯಿಸಿದ್ದ ‘ಶ್ರೀಕಾಂತ್’ ಚಿತ್ರಕ್ಕೆ ಇತ್ತೀಚೆಗೆ ಅತ್ಯುತ್ತಮ ಹಿಂದಿ ಚಿತ್ರ ರಾಷ್ಟ್ರೀಯ ಚಲನಚಿತ್ರ ಪ್ರಶಸ್ತಿ ಲಭಿಸಿದೆ. ಈ ಕುರಿತು ಸಂತಸ ಹಂಚಿಕೊಂಡಿರುವ ಅವರು, ತಮ್ಮ ನಟನೆಯ ಚಿತ್ರಕ್ಕೆ ಇಂತಹ ಗೌರವ ಸಿಕ್ಕಿರುವುದು ಹೆಮ್ಮೆಯ ವಿಷಯ ಎಂದು ತಿಳಿಸಿದ್ದಾರೆ. ಕಳೆದ ಎರಡು ವರ್ಷಗಳಿಂದ ತೆರೆಮೇಲೆ ಕಾಣಿಸಿಕೊಳ್ಳದಿದ್ದರೂ, ಪ್ರಸ್ತುತ ಹಲವಾರು ಸಿನಿಮಾಗಳ ಕೆಲಸಗಳಲ್ಲಿ ಬ್ಯುಸಿಯಾಗಿದ್ದು ಶೀಘ್ರದಲ್ಲೇ ಅಧಿಕೃತವಾಗಿ ಹೊರಬರಲಿವೆ ಎಂದು ಸ್ಪಷ್ಟಪಡಿಸಿದ್ದಾರೆ.
